Tirhthalahle 19 - Zanniat Bible

Ephesa Khua Ah Paul Hleng Leh I

¹ Apollos Corinth khua ah a um laitak in Pual tu cia ram songah khual tlawng ai Ephesa khua ah hleng i. Ciata ah hnuahluntu hrekkhat tawk ai,

² Paul in, “Sangtu zo i si ai Rauhla Thianghlim ngah tlang aw i sim?” tiin zawt i. Anite in, “Rauhla Thianghlim um i, ti rin ling bang hlah ing,” tiin sawn tlang i.

³ “Ciatih ilekhaw zaibang baptisma lang tlang i si?” tiin Paul in zawt i. Anite in, “John ai baptisma,” tiin ti tlang i.

⁴ Ciafangin Paul in, “John ai baptisma tu sualsirtute caah i ai amah John in i hnua ai a hlengtu tuh pa tu Israel mite in sang tuhhnak mi i, cia mi tu Jesuh i” tiin ti i.

⁵ Ciami za fangin Bawi Jesuh hming in baptisma lang tlang i.

⁶ Paul in amahte vumah kut suan ai amahte vumah Rauhla Thianghlim hleng i; pong phun dangdang in pong tlang ai Pathian thu tu prophette bangin phuang tlang i.

⁷ Anite tu pasalpui ciang hlaihnih dung khim i.

⁸ Paul tu synagogue ah feh ai hla thum song ralpha ngai in misenpui hnenah thu rel i. Anite thawn thu el dun tlang de ai Pathian Ukhnak thu khiah amahte thinlung ah lut ngah tuhin zuam i.

⁹ Ikhalselai mi hrekkhat tu lung ruh roh ai sang nuam tlang lo i; ciamanin miburpui hmaiah Bawipa ai lampui thu khiah relsiat tlang dekdo i. Ciamanin Paul in hlum ai sangtute khiah fehpui ai Tirannas tihnak thurelhnak innpui ah nisiar in thuzirh i.

¹⁰ Ciatihin kum hnih song um ai Asia ram songai a umtu Judah mi ituseh, Gentile mi ituseh, amahte veksen in Bawipa ai thu tu za tlang i.

Sceva Ai Fapate

¹¹ Pathian in Paul khiah hmang ai a lamdang ngaihsunurkul pawl bawn i.

¹² A pavua le a elvelh ponniute rin miurte hnenah koih fangin amahte urhnak lawm tlang ai amahte songin khuasiate khai suak i.

¹³ Nuamhmuncang ah vak ai khuasia a hnawttu Judah mi hrekkhat inkhai Bawi Jesuh hming in Paul bangin bawn tum tlang i. Anite in khuasiate hnenah, “Paul ai relhnak Jesuh hming in ning hnawt i ing,” tiin ti i.

¹⁴ Judah mi Suangbawi Sang pakhat a hming Sceva tihnak pa ai fapate unau pasarih in ciatih bangin bawn i.

¹⁵ Ikhalselai khuasia in anite hnenah, “Jesuh ling ing; Paul thula khai ling ing. Ikhalselai ning tu aisute i si?” tiin ti i.

¹⁶ Khuasia molhmi pa in unaute pasarih khiah nem ai tawng dekdo ai neh sek i. Maliam tuar le hnikpon zik in inn in tlan tlang sek i.

¹⁷ Ciami thula khiah Ephesa khua ai a ummi Judah mi le Gentile mi hmuahhmuah in za fangin lau tlang ngai ai Jesuh hming tu upathnak pe amam i.

¹⁸ Sangtute songin mi tampui kawi ai zapui hmaiah amahte thilbawn tawnghnak tepawl khiah phuang dekdo i.

¹⁹ Mitkher thiam tampui inkhai amahte mitkher laibute hmunkhat ah khawm tlang ai zapui mithmuh ah mai in tai i. Ciatih ai amahte taihnak mitkher laibute tu a man kom fangin ngun tangka thawng sawmnga i.

²⁰ Ciatihin Bawipa ai thu tu a roh ngai in zai ai hat amam i.

Ephesa Ai Buaihnak

²¹ Ciatih bangin thil a um hnuaah Paul in Macedonia ram le Achaia ram dung tlawng in Jerusalem ah lan tuh khiah a thinlung in ruat i. “Ciata i hleng hnuaah Rome khai hmu kul tuh ing,” tiin ti i.

²² Ciamanin amah bawmtute lakai pahnih Timothy le Erastus khiah Macedonia ah hlat ai amah cenin Asia ram songah can tam deuh hmang i.

²³ Cia can dungah Ephesa khua ah Bawipa ai lampui thula thubuai lianpui pakhat um i.

²⁴ Ngun in pumsutu Demetrius tihnak pa in khuasia nu Artemis ai biakinn zuk khiah ngun in bawn ai a napertute caah paisa tampui ngah i.

²⁵ Ciamanin a napertute le anite bangin napertu dangdang khiah kokhawm ai anite hnenah, “U le naute, he kin naperhnak manin nainung tlang ising ti khiah ning linghnak i.

²⁶ Ikhalselai tunah Paul tihnak pa in zaibang in naper i, ti khiah ningmah rori in hmu ai ning linghnak i. ‘Minung ai bawn fawmhnak pathian tu pathian ilo i,’ tiin ti ai Ephesa khuasong le Asia ram veksen ti tuh tlak in mi tampui thinlung ah a relhnak heh lut ngah i.

²⁷ Ciatih imanin he kin naperhnak heh a hmingsia tuh ihang ti khiah laukulhnak um i. Ciahlaiah Asia ram le lailung vum pumpuhluk ah mi cangcang ai biahnak a thupui ngai Artemis ai biakinn heh mi in zaikhai siar tuh nawn lo ai a thupuihnak heh bo tuh i,” tiin ti i.

²⁸ Ciami heh misenpui in za fangin thinraw tlang roh ai, “Ephesa khua ah Artemis tu a lianber i,” tiin au tlang dekdo i.

²⁹ Ciatih ai auhnak aw in khua song dim sio i. Mizapui in, Macedonia mite pahnih Paul thawn khual a tlawngtu Gaius le Aristarchus khiah pom ai puai sik hmun bualrawn ah suahpui i.

³⁰ Mipui hmaiah Paul amah rori suak nuam napui sangtute in kham tlang i.

³¹ Cia peng songah thunaitu a rualpuite hrekkhat in cia bualrawn ah feh tuh hrimhrim loin thucah tlang fawn i.

³² Ciatihin bualrawn ah buai tlang hnelhno i; mihrek in pakhat thu au i, midang in thudang au tlang ve i; mi tam sawn incen ciata ah zaimanin suak ising ti rin ling tlang lo i.

³³ Judah mite in Alexander khiah hmaiah suakruai manin mi tampui in he thubuai a suakruaitu heh amah i vuah bang tiin ruat i. Cen Alexander in dap tu ih, tiin a kut in hmuh ai amah dinhmun ṭan in thurel tum i.

³⁴ Ikhalselai Judah mi a ilam khiah misenpui in ling fangin amahte au kel in au tlang leh hluahhlo ai, “Ephesa khua ah Artemis a thupui ber i,” tiin nazi pahnih song au tlang i.

³⁵ A tawphnak ah cia khua ai thunaitu lakah cazi pa in misenpui tu dapruai deuh ai amahte hnenah, “Ephesa khua mite, Ephesa khua tu a thupuimi Artemis ai biakinn le vancung in a hlahnak milim umhnak hmun i ti khiah mi zongzong ling siohnak i.

³⁶ A el bentu aisu um i si? Aisu inkhai el ben tuh lo i si. Ciamanin dap niu in um tu ilai ruat cialep loin zaikhai bawn mah ih.

³⁷ Hemite in biakinn song thilri ru tlang lo i, kin khuazingnu khai relsiat tlang lo napui heta ah suahpui i si.

³⁸ Demetrius le a hnuahlunte in aisu vum ahkhai sual mawhhluk tuh nai lekhaw tazacuai thilhnak zung nai hlen ising; thukhan nia le thukhantu upa khai nai hlen ising. Ciata ah tazacuai thil i.

³⁹ Ciahnak tahin thupui deuh ning daih lekhaw kin dan bangin khuasong mi veksen ai pumkhawmhnak ah relcat tuhhnak i.

⁴⁰ Zaimantifangin tunnia ai thil canghnak manin buaihnak suahpui i si tiin mawhhluk tuar pang tuh ti laukul i. Hetluk lawmlam in buaihnak thu ah hluk tuh cuang um lo i; cen zaimanin ning buai tlang i ti bang selai rel pha nai tuh lo ising,” tiin ti i.

⁴¹ Ciatihin a ti hnuaah a taikhawmtute khiah piakruai sek i.