Tirhthalahle 18 - Zanniat Bible

Corinth Ah

¹ Cia hnuaah Pual tu Athens in feh ai Corinth khua ah hleng i.

² Ciata ah Pontus ramai a suakmi Judah mi Aquila tawk i. Aquila tu a nupui Prisilla thawn Italy in a tlantute i. Zaimantifangin Rome kumpibawi Claudius in Judah mi hmuahhmuah Rome khua in a hnawt manin tlan kawm i. Paul in tawk ai,

³ amahte hnenah cam ai anite thawn naper tlang i. Aquila le Prisilla tu ponhlam bawn in pumcawmtute i ai anite bangin Paul khai ponhlam bawn in pumcawm ve i.

⁴ Sabbath nia cang fangin Synagogue ah Judah mi le Greek mite thinlung fiangruai tuhin thu ruat tlang, el dun tlang de i.

⁵ Macedonia in Silas le Timothy hleng kawm fangin Paul tu a can naihnak hmuahhmuah in Pathian thurelhnak ah hmang ai Jesuh tu Messiah taktak i tiin Judah mite hnenah rel dekdo i.

⁶ Anite in Paul engsan tlang ai pong siava in sawn fangin Paul in a lungkhim lo larruai in a hnikpon ai laivut thin ta ai, “Ning pairal lekhaw ningmah ai mawh ihang! Kai mawh i hluk mah ih! Tunai panin Gentile mite hnenah feh tuh ihang ing!” tiin ti i.

⁷ Ciamanin feh ai Gentile mi Titius Justus tihnak pa inn ah um i; Titius Justus tu Pathian biatu i ai a inn tu synagogue hiangniu ah um i.

⁸ Synagogue uktu upa ber Crispus khai a songkhatte thawn Bawipa sang tlang i; cen Corinth khuami tampui inkhai Pathian thu za ai sang manin baptisma lang tlang i.

⁹ Zankhat ah Pual in larhnak hmu ai Bawipa in hetihin thupe i, “Paul, lau mah! Rel tu thliahthlo, awl mah!

¹⁰ Na hnenah um ing. Aisu inkhai harhnak na pe thil tuh lo i, zaimantifangin he khua songai mi tampui heh i minung i,” tiin ti i.

¹¹ Ciamanin Paul tu kum khat le hrek song um ai misenpui hnenah Pathian thu zirh ṭiode i.

¹² Gallio in Achaia ram uktu Rome Mangki bawi a cang laiah Judah mite taikhawm tlang ai Paul heh pom in zung ah suahpui i.

¹³ “Hemi pa in mi tampui hnenah kin dan thawn a kaih dun lomi Pathian biadan kin zirh i,” tiin ti tlang i.

¹⁴ Pual a pong tum fangin Gallio in Judah mite hnenah, “Thilpha lo le thilsual pakhatkhat bawn manin iselai Judah mite ning vumah thinsau ngai in um tuh ing.

¹⁵ Ikhalselai tun tu ning biahnak ai ponkam, hming le ning dan man ai thu el dun ning imanin ningmah hlanlam relcat tu ih! Ciabang thu ah thukhantu cang thil tuh lo ing,” tiin ti i.

¹⁶ Ciatihin a zung in Judah mite heh hnawt sek i.

¹⁷ Synagogue inn uktu Sosthenes khiah zung hmai rori ah pom ai vit tlang i. Ikhalselai Gallio in zaikhai siar sah lo i.

Antioch Ah Let Leh

¹⁸ Pual tu Corinth khua ai sangtute thawn ni tampui song a um hnuaah Prisilla le Aquila thawn lawng in Syria ah feh tlang i. Cencherae in lawng in a feh hlanah thu tiamkamhnak a bawn awng zo bangin Paul tu a sam met i.

¹⁹ Ephesa khua a hleng fangin ciata ah Prisilla le Aquila heh hlum i. Synagogue ah lut ai Judah mite thawn thu ruat tlang i.

²⁰ Rai deuh um tuhin sawm napui a lungkhim lo i.

²¹ A feh tuh fangin thucah ta ai, “Pathian lungkhim lekhaw ning hnenah kawi leh tuh ing,” tiin ti i. Ciata in lawng in Ephesa ah feh i.

²² Ceasarea khua hleng fangin Jerusalem khua lamah hong ai ciata ah pawlpui khiah tawk ta ai Antioch ah feh lehsal i.

²³ Cia khua ah ni raipui a um hnuaah suak lehthio ai Galati le Phrygia ram hlursuah in tlawng zianzo ai sangtute hmuahhmuah thazang hatruai i.

Ephesa Le Corinth Ah Apollos

²⁴ Cialai ah Alexandria khua ai te awng, Apollos tihnak Judah pa tu Ephesa khua ah hleng i. Amah tu pong thiam ngai i ai Lai Thianghlim khai a ling ngai mi i.

²⁵ Bawipa lampui thula zirh cialep mi i ai, thintha tho ngai le fel ngai in Jesuh ai thula rel ai zirh i. Ikhalselai a linghnak tu John ai baptisma thula ian i.

²⁶ Ralpha ngai in synagogue ah thu rel i. A thurelhnak tu Prisilla le Aquila te in za fangin a inn ah sawm ai Pathian lampui thula khiah felfai deuh in rel kawm i.

²⁷ Cen Apollos tu Achaia peng ah feh tum manin Ephesa khua ai sangtute in bawm tlang ai Achaia khua ai hnuahlunte hnenah Apollos khual tlung siang thai tuhin lai ngat i. Achaia khua a hleng fangin Pathian ninghiohnak manin sang cia mite caah bawntu pha ngai in cang i.

²⁸ Zaimantifangin mi thu el thiam ze ai Jesuh tu Messiah ngaingai i, tiin Lai Thianghlim songai lang in fiangruai ai ciatihin zapui hmaiah thu eldunhnak ah Judah mite heh neh ṭiode i.