Tirhthalahle 16 - Zanniat Bible

Paul Le Silas Hnenah Timothy Feh

¹ Paul tu Darbe le Lystra khua ah tlawng i; ciata ah hnuahluntu Timothy um i. A nu tu Judah mi i ai Khristian i, a pa tu Greek miphun i.

² Lystra le Iconium khua ai umtu sangtute in Timothy heh porh tlang roh i.

³ Paul in Timothy fehpui a nuam manin a zarhtan sah i. Zaimantifangin ciata ai a umtu Judah mite in Timothy ai pa tu Greek mi i ti khiah ling tlang sio manin i.

⁴ Khua pakhat hnua pakhat hleng betbo ai Jerusalem khua ai nalangte le pawlpui upate in a relcathnak dante khiah sangtute hnenah rel betbo ai hlun tuhin khai forh i.

⁵ Ciamanin pawlpuite tu sanghnak lamah hat deuhdeuh ai ni khat hnua ni khat minung tam amam i.

Paul In Larhnak Hmu I

⁶ Asia ram songah Thuthangpha rel tuhin Rauhla Thianghlim in siang lo manin Phrygia le Galatia ram songah khual tlawng kawm i.

⁷ Mysia ramri hleng fangin Bithynia ram songah lut tum i, ikhalselai Jesuh ai Rauhla in siang lo i.

⁸ Ciamanin Mysia ram tu lan ai Troas khua ah zu kawm i.

⁹ Cia zan ah Paul in larhnak hmu ai ciami a hmuhnak ahcen Macedonia mi pakhat ding ai, “Macedonia ah kawi tulai kin bawm tu,” tiin ninghio ngen i.

¹⁰ Paul in larhnak a hmu ben sawng fangin Macedonia ah feh tuhin pai kawm i ing, zaimantifangin ciata ai mite hnenah Thuthangpha rel tuhin Pathian in kin ko i tiin sang kawm i ing.

Philipi Ah Lydia Thinthlenghnak

¹¹ Troas khua in lawng thawn feh kawm ai Samothrace lamah a cang ngai in feh i ing; cen a thangha ah Neapolis khua hleng i ing.

¹² Cia khua in lai lamin Philipi khua hleng i ing. Philipi khua tu Macedonia ram songai peng pakhat ai khuapui i. Rome ai ukhnak khua i fawn i. Ciata ah ni tampui cam i ing.

¹³ Sabbath nia ah kin khai khuapui songin tipui kamah feh i ing; ciata ah Judah mite hmunkhat ah sawngenhnak hmun um na tu tiin ruat i ing. To kawm ai ciata ai a kawitu nupangte thawn, thu ruat tlang i ing.

¹⁴ Amahte lakai pakhat, kin thu a ngaitu Thyatira khuami a hming Lydia i ai ani tu pon sannum zuartu i. Ani tu Pathian biatu i ai Paul ai thurelhnak phatak niu in ngai tuhin Bawipa in Lydia ai thinlung dawngkham hong sah i.

¹⁵ A innsangte baptisma lang tlang sio hnuaah, Lydia in, “Bawipa sang taktak i tiin i ruat le i sikhaw i inn ah cam tu ve hram ih!” tiin kin sawm i. Ciatihin kin sawm manin feh kawm i ing.

Philipi Thawng Songah

¹⁶ Ni khat ah sawngenhnak hmun kin feh laiah, khuasia molhmi hmai lam thu a relciathaitu nupang pakhat in kin hmuak i. Hmai lam thu a rel cia manin a bawite caah tangka tampui ngah de i.

¹⁷ Paul le kinmah khel lamin kin hlun betbo ai, “Hemite heh Cungnungber Bawipa ai salte i! Nunohnak thu ning hnenah phuang i!” tiin au betbo i.

¹⁸ Ciatihin ni tampui au manin hnuavai fangin Paul tu a thintok ze ai khellet her in a khuasia hnenah, “Hemi nu songin suak tuhin Jesuh hming in thu na pe ing!” tiin ti i. Cia sawngpah in khuasia tu suak teu i.

¹⁹ A naitute in tangka ngahthilhnak lampui um nawn lo i ti khiah ling fangin Paul le Silas pom ai thunaitu bawite hnen miburpui taikhawmhnak hmunah duk tlang i.

²⁰ Rome acuzah thukhantu bawite hmaiah fehpui ai, “Hemite heh Judah miphun i ai kin khua songah buaihnak suakruai i.

²¹ Kin dan thawn a kaih dun lomi dan zirh kawm i; kin tu Rome acuzah minungte i ing ai he amahte zirhhnak dan heh pom thil lo i ing, hlun khai hlun thil lo i ing,” tiin ti tlang i.

²² Cen mizapui khai Paul le Silas huatu ah tel tlang ve i. Cia hnuaah acuzah thukhantu bawite in Paul le Silas ai hnikpon zik sah sek ai vit tuhin thupe i.

²³ A roh ngai in vit ai thawnginn ah khum i, thawnginn uktu pa tu phatak niu in tawh kalh tuhin thupe i.

²⁴ Ciami thupehnak a ngah bangin thawnginn uktu pa in Paul le Silas khiah thawnginn songta khan songah khum ai thingtum rit ngai pahnih in hrengkhen i.

²⁵ Zan seulai dung fangin Paul le Silas khiah sawngen ai Pathian thangphat in la sa kawm i; cen a dang thawngto mite in ngai tlang i.

²⁶ Mangrin loin a roh ngai in hlinhlin ai thawnginn tu a ham tianin hlin sek i. Cia sawngpah in dawngkhamte tu hong sio ai thawngto mite hmuahhmuah ai kut khihhnak thir cikcin dolh sek i.

²⁷ Thawnginn uktu khai phawk ai thawnginn dawngkhamte hong sio i ti a hmu fangin thawngto mite tlan zo sek i tiin ruat ai, a ralvang phok in amah veve rek dun tum i.

²⁸ Ikhalselai Paul in a aw naih tawp in au ai, “Nangmah veve tuahmawh mah! Kin veksen in um tlang hlen i ing,” tiin ti i.

²⁹ Thawnginn uktu pa in mai koih tu ih, ti ai thawnginn songah rang ngai in lut ai Paul le Silas ke keham ah hlawng hlelhlo in bok i.

³⁰ Cen sumpua ah suahpui ai, “I bawipate, nunohnak ngah tuhin ziang bawn tuh ing?” tiin zawt i.

³¹ Anite in, “Bawi Jesuh sang tulai nangmah le ning innsang in nunohnak ngah tuh i si,” tiin ti kawm i.

³² Cen Pathian thu tu amah le a innsang veksen hnenah rel kawm i.

³³ Cen cia zan rori ah thawnginn uktu pa in fehpui ai amahte hmaihma som sah i; cen cia ben sawngpah in amah le a innsang veksen in baptisma lang tlang i.

³⁴ Cen Paul le Silas khiah a inn ah tlun ai rong ai tuh pe i. Amah le a innsang veksen in Pathian sang manin anghnak in dim tlang i.

³⁵ A thangha ah Rome acuzah thukhantu bawite in palik bawite hlat ai, “Khiamite khiah hlat tu ih,” tiin thupe i.

³⁶ Ciamanin thawnginn uktu pa in Paul hnenah, “Thukhantu bawite in nangmah le Silas hlat tuhin thupe zo i. Ciamanin suak tu ilai dap niu in feh tu ih,” tiin ti i.

³⁷ Ikhalselai Paul in palik bawite hnenah, “Sualhnak zaikhai nai lo napui mizapui hmai rori ah kin vit tlang i si; Rome acuzah minung ve i ing! Ciahlaiah thawng ah kin toh i si. Cen tunah a thupniu in kin fehruai tum i sim? Feh lamlam hlah ing! Rome acuzah upate amahte rori heta ah kawi tlang tu selai kin suah tuseh!” tiin ti i.

³⁸ Ciatih ai a tihnak khiah palik bawite in Rome acuzah ai thunaitu bawite hnenah rel i; cen Paul le Silas tu Rome mi i ti ling fangin thinlau tlang roh i!

³⁹ Ciamanin Paul le Silas hnenah feh ai ngaithiamhnak ngen tlang i; cen thawnginn in suah kawm ai khua songin hmundang ah feh tu ih, tiin ngen tlang i.

⁴⁰ Anite khai thawnginn in suak kawm ai Lydia ai inn ah feh kawm i. Ciata ah sangtu unaute in tawk ai thazang pehnak thu rel kawm hnuaah cia khua in suak kawm i.