Tirhthalahle 13 - Zanniat Bible

Barnabas Le Saul Hlat Tlang I

¹ Antioch khua ai pawlpui songah prophet le thuzirhtu hrekkhat um i. Anite tu Barnabas, Simeon (Mihang ti inkhai kohnak), (Cyrene khuami) Lusius, Manaen (Mangki bawi Herod thawn a khang tlangtu) le Saul i.

² Anite tu Pathian bia in rong ul tlang lakah Rauhla Thianghlim in, “Barnabas le Saul heh kin thiahhnak naper lek per tuhin a tumce in dah tu ih,” tiin ti i.

³ Rong ul sawngen ben fangin amahte lu vumah kut suan tlang ai Barnabas le Saul khiah hlat i.

Cyprus Tikulh Hleng Kawm I

⁴ Rauhla Thianghlim ai hlathnak a imanin Barnabas le Saul tu Seleusia khua ah zu kawm ai ciata in tangphawlawng to in Cyprus tikulh ah feh kawm i.

⁵ Salamis khua a hleng fangin Judah mite ai synagogue ah Pathian thu rel kawm i. A naper bawmtu tuhin John Mark fehpui i.

⁶ Cyprus tikulh song tlawng tlang betbo ai Paphos khua tian hleng tlang i. Ciata ah mitkher thiam Bar-Jesuh tihnak tawk i. Ani tu Judah mi, prophet ing tiin a tiduntu i.

⁷ Ani tu Cyprus tikulh uktu mangki bawi Sergius Paulas ai rualpui i. Sergius Paulas tu mifim ngai i. Pathian thu a ling nuam manin Barnabas le Saul a hnenah ko i.

⁸ Ikhalselai mitkher thiam Elimas in daih lo i; (Elimas tihnak tu Greek hming i). Sergius Paulas khiah amahte relhnak sang tuh loin forh dekdo i.

⁹ Cen Saul, Paul ti inkhai kohnak, tu Rauhla Thianghlim in dim ai Paul in mitkher thiam pa heh hmaicang in sik meng ai,

¹⁰ “Nang, Satan ai fapa! Thilpha hmuahhmuah a engsantu heh nangmah isi. Mi zawlhnak pha lo a phunphun in na dim ai Bawipa ai thudik heh thudon ah cangruai tuh ian zuam isi.

¹¹ Tun rori ah Bawipa ai kut heh na vumah hleng tuh i, na mit caw tuhai can tawkfang song tu sun khuavar hmu tuh lo isi,” tiin ti i. Tun rori ah Elimas ai mit khiah mairo hang in khuk ai amah fehpuitu si tuhin mitcaw cingin vak hnelhno i.

¹² Ciatih ai a canghnak tu Mangki bawipa in a hmu fangin sangtu ah cang i; zaimantifangin Bawipa ai thula a zirhhnak ah a ngaihsunur roh i.

Pisidia Ram Antioch Khua

¹³ Paul le a rualpuite tu lawng in Paphos in feh tlang ai Pamphylia ram Perga khua hleng i. Ciata in John Mark in letsan ai Jerusalem ah tlung i.

¹⁴ Perga in feh tlang lehthio ai Pisidia ram Antioch khua hleng i. Ciata ah Sabbath nia ah synagogue ah feh ai to i.

¹⁵ A khawmtute in Moses dan laibu le prophette ai nganhnak laibu siar tlang hnuaah synagogue hotute in, “U le naute, kin veksen caah thapehnak ponkam rel tuh nai le i sikhaw rel tu ih,” tiin ti i.

¹⁶ Ciafangin Paul ding ai a kut zap kongin thurel pan i: “Kin phunpui Israel mite le heta ai Pathian a biatu Gentile mi hmuahhmuah khai, i ngai tu ih!

¹⁷ Israel ai Pathian in kin pupate ril ai Egypt ramai a um laiah miphun tampui cangruai i. Ciami Pathian in Egypt ram in a huham thawmlian thawn suahpui ai,

¹⁸ nelrawn ramkhing ah kum sawmli song sik ai kilkhawl i.

¹⁹ Canaan ramai a umtu miphunte pasarih khiah siatsuah sek ai amah ai miphun Israel heh ram khurtu ah bawn i.

²⁰ Hetih ai thil a canghnak heh kum za li le sawmnga song rai i. Cia hnuaah Prophet Samuel san a hleng hlan song Thukhantute dah i.

²¹ Cen Israel mite in kumpibawi a ngen tlang fangin Pathian in kum sawmli song amahte kumpibawi cang tuhin Benjamin hin songin Kish ai fapa Saul pe i.

²² Cen Saul a hnawt hnuaah Pathian in David khiah kumpibawi cangruai i. David ai thu tu Pathian in hetihin ti i: ‘Jesse ai fapa David tu i daihzawng i. Bawn i ruai nuamhnak hmuahhmuah bawn tuh i,’ tiin ti i.

²³ Cen David ai tesinfa Jesuh tu a thukhamciahnak bangin Pathian in Israel mite nunotu tuhin bawn i.

²⁴ Jesuh ai naper a pan hlan deuh ah, John in Israel mi hmuahhmuah hnenah sualsir tuhin le baptisma lang tuhin thu rel i.

²⁵ Cen John in a naṭuan ben dawn fangin mizapui hnenah, ‘Aisu i tiin iti i si?’ tiin zawt i. ‘Ning ianghnak hnelhno heh kaimah ilo ing! Ikhalselai ngai tu ih! Amah tu kaimah hnuaah hleng tuhai kai tu a kedawl ri hawktu tuhin rin i tlak lo i,’ tiin ti i.

²⁶ I phunpui Israel mite, Abraham ai tesinfate le heta ai Pathian a biatu Gentile mite, he nunohnak Thuthangpha heh kin veksen caah pehnak i.

²⁷ Zaimantifangin Jerusalem ah a um awngtu mizapui le Hotute in Jesuh tu nunotu i tiin ling tlang lo i. Prophette ai nganciahnak thu Sabbath nia cangcang ah amahte siarhnak khai a sullam ling lo i. Ikhalselai Jesuh rekhnak in prophette ai ponkam khiah khimruai i.

²⁸ Cen anite in Jesuh rek thil tuhin thula si hnelhno napui, hmu thil cuanglo manin Pilat hnenah rekhnak thupe tuhin ngen tlang ngio i.

²⁹ Cen Lai Thianghlim in a thula a rel cia awng hmuahhmuah khiah anite bawn sek hnuaah thinglamteh vuman hla ai hlan ah phum i.

³⁰ Ikhalselai Pathian in thihhnak in thoruailehsal ai,

³¹ amah thawn Galilee in Jerusalem tian khual a tlawngtute hnenah ni tampui song lar i. Tunah amah aiawh ah ciamite tu Israel mite hnenah thulingtute i.

^32-33 Cia Thuthangpha heh tunah ning hnenah koih ing. Pathian in kin pupate hnenah thu a kham awnghnak tu tun amahte tesinfa kinmah hnenah Jesuh thihhnak in a thoruailehhnak thawmin khimruai zo i. Ciami heh Saam pahnihhnak songah: ‘Nangmah heh i Fapa isi, tunnia ah na pa i zo ing,’ tiin um i.

³⁴ Cen Jesuh tu hlan songah uih le hmon in ziamral tuh lo ai a tho leh tuh thu ah Pathian in hetihin rel cia i. ‘David hnenai khamciahnak a thianghlimmi hmuifuhnak tu Ningmah hnenah ning pe tuh ing,’ tiin ti i.

³⁵ Cen hmundang ahkhai, ‘A thianghlimmi na cengfa heh hlan songah ziamralruai siang tuh lo isi,’ tiin ti i.

³⁶ Zaimantifangin David tu amah ai san songah Pathian ai daihhnak na ruaih ve napui, a thi fangin a pupate hnenah phum ai a taksa tu hlan songah ziam ta i.

³⁷ Ikhalselai Pathian in hlan songin a thoruaihnak mipa cenin ciatih bang ilo i.

^38-39 I miphunpui Israel mite, ning veksen in fiang ngai in ning ling kulhnak tu: Jesuh hming in sualngaithiamhnak thuthang ning hnenah phuang i; ning sualhnak songin Moses ai dan in ning luatruai thil lo i, ikhalselai Jesuh a sangtu hmuahhmuah amahte sualhnak songin luat i, ti khiah ling ning kul i.

⁴⁰ Ciatih imanin ralring tu ih, a hnia lamai prophette ai rel cia awnghnak ning vumah khim pang tuh i. Prophette in:

⁴¹ “Sik tu ih! Ning, mi hnihsan thai pawl; Ngaihtam tu ilai thi tu ih! Zaimantifangin tunnia ai i bawnhnak heh, mi in ning rel khalselai Ning sang nuam lohnak thil i tuh i,’ tiin rel i,” tiin ti i.

⁴² Paul le Barnabas tu synagogue in suak kawm ai mizapui in hmaizarh Sabbath nia ah kawi kawm leh tuhin le cia Thuthang rel leh tuhin sawm tlang i.

⁴³ Mizapui pumkhawmhnak in piak tlang hnuaah Paul le Barnabas tu Judah mi tampui le Judah biahnak ai a luttu Gentile mite tampui in hlun tlang i. Nalangte in amahte hnenah thu rel tlang ai Pathian ninghiohnak songah nung tuh ṭio in thazang pe tlang i.

⁴⁴ A hmaizarh Sabbath nia ah mi tampui, khuasong mi hmuahhmuah tikhop in Pathian thu ling nuam in suak tlang i.

⁴⁵ Ciami heh Judah mite in hmu fangin iksik ai Paul ai thurelhnak el ai zohsuam tlang i.

⁴⁶ Ikhalselai Paul le Barnabas in ralpha amam in rel kawm i. “Pathian thu ning hnenah rel hmasa tuh heh a kulhnak i. Ikhalselai ning in ning daih tlang lo i, el tlang ai kumkhua nunhnak ngah tuh tlak in ningmah in ruat dun lo manin kaimah in ning zam tuhai Gentile mite hnenah feh tuh i ing.

⁴⁷ Zaimantifangin Bawipa ai thukham kin pehnak tu hetihin i: ‘Laivum pumpuhluk heh nun o thil tuhin ningmah heh Gentile mite caah Tleuhnak ah ning bawn zo i,’ ti i,” tiin ti i.

⁴⁸ Cia thu tu Gentile mite in za fangin ang tlang ngai ai Bawipa ai Thuthangpha heh songloih tlang roh i. Cen kumkhua nunhnak caah ril mite tu sangtu ah cang i.

⁴⁹ Bawipa ai thu tu cia ramsong khuahacang ah thang i.

⁵⁰ Ikhalselai khua songai upate le Pathian sangtu upat tlak Gentile nupangte khiah Judah mite in holtok tlang ai anite in Paul le Barnabas heh reem ai amahte peng songin hnawt i.

⁵¹ Paul le Barnabas in amahte vumah lungkhim lohnak larruai tuhin keborh thin ai Iconium ah feh kawm i.

⁵² Antioch khua ai hnuahlunte tu anghnak le Rauhla Thianghlim in dim tlang i.