Tirhthalahle 11 - Zanniat Bible

Peter In Jerusalem Pawlpui Ah

¹ Nalangte le Judea ram songai a umtu sangtute hmuahhmuah in Pathian ai thu tu Gentile mite inkhai co ngah zo i, ti ling tlang i.

² Peter tu Jerusalem a hleng fangin Gentile mite zarhtanruai a nuamtute in sawi tlang ai,

³ “Zarhtan lo Gentile mite inn ah cam ai amahte hnenah rong tianin ai i,” ti tlang i.

⁴ Ciamanin Peter in thil canghnak umdan hmuahhmuah a hampan in rel sio i.

⁵ “Joppa khua ai saw i ngen laiah larhnak hmuhhnak nai ing. Van in ningli nai pon lamkhatpui bang thil pakhat i hiangniu ah zuktolh i.

⁶ A song phatak niu in i kian fangin ramsa le inn ai vulhhnak sumhnamte le bokvak thai nunghing le hampalak vaniute hmu ing.

⁷ Cen aw za ai cia aw in, ‘Peter, tho tu, ro tulai ai tu,’ tiin iti i.

⁸ Ikhalselai kaimah in, “Bawipa, ilo i! Biahnak lamah a cianghlimlo tihnak le rong ningdulkul i ka songah lut awng kel lo i,’ tiin ti ing.

⁹ Ciafangin van in aw za lehthio ai, ‘Pathian in cianghlim i, a ticiahnak khiah nang in cianghlimlo i tiin ruat mah,’ tiin ti i.

¹⁰ Ciatihin vel thum tian cang ai hnuataber ah amahte veksen in van ah lang lehsal i.

¹¹ Cialak fangin Ceasarea in hlathnak mite pathum khiah i riahbuk inn ah hleng tlang i.

¹² Cen zaikhai hnuakfual loin feh tuhin Rauhla in i ruai i. Hemi Joppa khuami kin unaute paruk, Jesuh sangtute khai Ceasarea ah i hlun tlang ve ai kin veksen in Cornelius ai inn ah feh i ing.

¹³ Cornelius in vancungmi zuktolh ai a inn ai a dinghnak thu khiah kin rel i. Cia vancungmi in Cornelius hnenah, ‘Joppa ah mi hlat tulai a hming Simon Peter tihnak pa koruai tu.

¹⁴ Amah in thurel tuhai cia a thurelhnak thawmin nangmah le na innsang nunohnak ngah tlang tuh i si,” tiin ti i.

¹⁵ Cen thu rel i pan fangin a hampan in i vumah Rauhla Thianghlim a hleng bangin amahte vum ahkhai hleng ve i.

¹⁶ Ciafangin Bawipa in, ‘John incen tidap thawn baptisma ning pe awng i; ikhalselai ning tu Rauhla Thianghlim thawn baptisma pehnak mite i tuh i si,’ ti ai a ti awnghnak khiah hih lehsal ing.

¹⁷ Pathian in Bawi Jesuh Khrih kinmah in sang ai kin hnenah Rauhla Thianghlim tu lehsawng in kin pe awng bangin he Gentile mite hnen ahkhai cia lehsawng heh pe ve i, ti khiah a fiang roh i. Akontih in kin bang rongra in Pathian heh kham thil tuh ising!” tiin ti i.

¹⁸ Ciami za fangin anite in sawi awl ai Pathian thangphat in, “Pathian in Gentile mite hnen ahkhai sualsirhnak le nunhnak can pe ve zo i!” tiin ti tlang i.

Antioch Ai Pawlpui

¹⁹ Stephen rek hnua reemhnak a um manin Jesuh sangtute hrekkhat tu khuahacang ah piak sio i. Mi tampui tu Phoenisia, Cyprus le Antioch tian hleng ai Judah mi hnen ian ah Thuthangpha rel tlang i.

²⁰ Ikhalselai sangtute hrekkhat tu Cyprus le Cyrene khua in Antioch khua ah feh tlang ai Bawi Jesuh Khrih ai Thuthangpha heh Gentile mi hnenah rel i.

²¹ Bawipa ai huham amahte hnenah um ai mi tampui in sang ai Bawipa lam hoi sek i.

²² Ciami thula tu Jerusalem khua hleng ai Jerusalem ai pawlpui in Antioch khua ah Barnabas hlat i.

²³ Barnabas Antioch khua a hleng fangin Pathian in mizapui hnenah hmuifu pe zia a hmu ai ang ngai in amahte thinlung veksen in Bawipa sang tlang ai rinsantlak sangtu cang thil tuhin thazang pe i.

²⁴ Barnabas tu mipha bik i ai Rauhla Thianghlim le sangkhohnak thawn a dimmi i. Cen mi tampui Bawipa hnenah fehpui i.

²⁵ Cen Barnabas tu Saul si tuhin Tarsus ah feh i.

²⁶ Saul a hmu fangin Antioch ah fehpui ai kum khat song amahte pahnih in pawlpui minungte khiah pumkhawmpui ai mi tampui zirh kawm i. Hemi Antioch khua ah hnuahlunte khiah “Khristian” tiin a ko pan hmasaber hmun i.

²⁷ Cialaitak in prophet hrekkhatte tu Jerusalem an Antioch ah feh tlang i.

²⁸ Amahte lakai prophet pakhat Agabus tihnak pa ding ai Rauhla huham thawn, “Laivum pumpuhluk ah rian tlung tuh i,” tiin rel i. (Ciami rian tu Claudius in Rome kumpimangbawi laiah hleng i).

²⁹ Hnuahlunte in amahte ti ben thai tawp in Judea ramai a umtu sangtute bawmhnak pe tuhin tawlrel tlang i.

³⁰ Amahte tawlrelhnak bangin tangka khiah Barnabas le Saul kut in pawlpui upate hnenah kuat tlang i.