Tirhthalahle 10 - Zanniat Bible

Peter Le Cornelius

¹ Ceasarea khua ah Cornelius tihnak pa um i. Ani tu, “Italy Ralkap burpui,” tihnak Rome ralkap bukhat uktu ralbawi captain i.

² Ani tu Pathian kihzah ngai mi i ai; a innsang in Pathian a biatu ṭio i. Judah mifarahte tampui bawm ai catloin Pathian hnenah saw a ngen thai ṭiotu i.

³ Vaikhat tu zan lam nazi pathum dung fangin larhnak hmu i; cia a hmuhnak ah Pathian ai vancungmi pakhat a hnenah kawi ai, “Cornelius!” tiin ko i.

⁴ Cia vancungmi heh a lau kongin sik ai, “Ziang i, Bawipa?” tiin zawt i. Vancungmi in, “Pathian in na sawngenhnak le mifarahte na bawmhnak vumah a ang in na ngenhnak na ngai sah i.

⁵ Ciamanin Joppa khua ah Simon Peter tihnak pa ko tuhin mi hlat tu.

⁶ Simon Peter heh Tipui kamai a ummi saphaw in thil bawntu Simon ai inn ah cam i,” tiin ti i.

⁷ Cen vancungmi tu feh leh i; cia hnuaah Cornelius in a inn ai a umtu hnenumte pahnih le ralkap pakhat ko i. Ralkap pa tu biahnak lamah a zuam le a kungmi i ai amah kiltu lakah pakhat i.

⁸ Thilcanghnak hmuahhmuah khiah a rel sio hnuaah Joppa khua ah hlat i.

⁹ A thangha ah feh tlang betbo ai Joppa khua hleng dawn fangin sun laiteng dungah Peter tu sawngen tuhin inn vumah kai i.

¹⁰ A rikam manin rong ai nuam i. Rong ai tuh pai tlang laitak ah Peter in larhnak hmu i.

¹¹ Vancung hong ai pon lianpui bang thil pakhat a ning pali in laivum ah a zukhla khiah hmu i.

¹² A songah ke li nai ramsa a phunphun, a bokvak ramsa le vaniu a phunphun um i.

¹³ Aw pakhat in a hnenah, “Peter, tho tu, ro tulai ai tu!” tiin ti i.

¹⁴ Ikhalselai Peter in, “Bawipa, ilo i! A thiang lomi le a rimmi ai i nuam hrimhrim lo i,” tiin ti i.

¹⁵ Cia aw in rel lehthio ai, “Pathian in thiang i a tihnak tu a thiang loin ruat mah,” tiin ti i.

¹⁶ Ciatihin vel thum tian a lar hnuaah cia thil tu van ah kai leh teu i.

¹⁷ Cia larhnak ai a sullam khiah Peter in a ruat hnelhno laitak ah Cornelius ai hlat mite tu Simon ai inn ah hleng ai kotka pualam ah ding i.

¹⁸ “Heta ah Simon Peter tihnak mikhual um aw im?” tiin auh tlang i.

¹⁹ Peter in a hmuhnak ai sullam a ruat laitak ah Rauhla in, “Ngai tu, mi pathum in na si i!

²⁰ Na thuam pai tulai feh tu; cen anite hnenah feh tuh heh aican in um mah; kaimah ai hlat mite i,” tiin ti i.

²¹ Ciamanin Peter tu inn hniaah tolh ai a situte hnenah, “Ning sihnak tu kaimah ing ziang ning kul pa? tiin ti i.

²² Anite in, “Ralbawi Cornelius in kin hlat i. Ani tu mi pha ngai i. Pathian bia ai Judah mite in upat tlang ngai i. Rel tuhai na naihnak khiah za i nuam i tiin a inn ah nangmah na sawm tuhin Pathian vancungmi in ruai i,” tiin ti i.

²³ Peter in cia zan tu a hnenah cam tuhin sawm ai cam tlang i. A thangha fangin Peter tu pai ai anite thawn feh tlang i; Joppa khua ai Khrih a sangtute khai tel tlang ve i.

²⁴ A tit lamah Ceasarea ah hleng tlang ai Cornelius in a songkhatte le a sawmmi a rualpuite thawn iang tlang ngio i.

²⁵ Peter tu inn ah a lut sawng fangin Cornelius in hmuak ai a hmaiah ut in a keham ah bok i.

²⁶ Ikhalselai Peter in dingruai ai, “Ding tu! Kaimah khai minung ve nangkhaw,” tiin ti i.

²⁷ Inn songah lut kongin Peter in Cornelius heh pon betbo i; inn song ahcen mi tampui taikhawm tlang i.

²⁸ Peter in anite hnenah, “Kin biahnak dan bang lekhaw Judah mi in Gentile mi leng tuh le pawl tuh heh a khamhnak i, ti khiah ling tlang sio i si. Ikhalselai aisu khai mi cianghlimlo le mi ningdulkul in ruat tuhhnak ilo i, ti khaih Pathian in i hmuh zo i.

²⁹ Ciamanin ningmah in mi hlat ai i ko fangin kam khat khai el loin kawi ing, zaimanin i ko i si ti khiah tunah i rel tuhang ih,” tiin ti i.

³⁰ Cornelius in, “Kin hnua ni thum laiah, tun camcu dung zan lam nazi pathum ah i inn ah sawngen ing. Cia sawngpah in hnikpon tleu ngai sil in mi pakhat i hmaiah ding ai,

³¹ ‘Cornelius, Pathian in na sawngenhnak za ai mifarah na bawmhnakte khai hnikhnaih sio i.

³² Joppa ah Simon Peter tihnak ko tuhin mi hlat tu. Joppa ah Tipui kamai a umtu saphaw in thil bawntu pa Simon ai inn ah cam i,’ tiin ti i.

³³ Ciamanin tun rori in na ko ing; cen nangmah inkhai ning i hio ai kawi isi. Tun heta Pathian hmaiah kin veksen in um tlang ai Bawipa in rel tuhin na ruaihnak ngai tuhin na iang tlang i ing,” tiin ti i.

Peter Ai Thurelhnak

³⁴ Peter in rel pan ai, “Pathian in aisusu khai a bangran liang in mi sik i, ti thutak khiah ling ing.

³⁵ Zaibang miphun ita inkhai Pathian kihzah ai a hmaiah thildik bawn lekhaw Pathian ai cotlak mi i.

³⁶ Mi zongzong ai Bawipa a imi Jesuh Khrih hnenin daphnak Thuthangpha heh Pathian in Israel mite hnenah pe i, ti khiah ling tlang i si.

³⁷ John in baptisma thuthang a rel hnua Galilee ai panin Israel ramsong hmun cangcang ah thil thupui a canghnak khai ling sio i si.

³⁸ Nazareth mi Jesuh vumah zaibang in Pathian in Rauhla Thianghlim le huham burh i ti khai ling sio i si. A hnenah Pathian a um manin khuahacang ah feh ai thilpha bawn betbo ai Satan ai hnawmcan mite hmuahhmuah cakruai sio i.

³⁹ Judah ram songah le Jerusalem ai a bawnhnak hmuahhmuah a hmutu le a lingtute heh kinmah i ing. Cen ani tu thinglamteh vumah khen in rek i.

⁴⁰ Ikhalselai ni thumhnak nia ah Pathian in thihhnak in thoruai leh ai kin hnenah larruai i.

⁴¹ Mi zongzong hnenah ilo in a thulingtu tuhin a ril mite hnenah larruai i. Thihhnak in a tho leh hnuaah amah thawn ai tlang ding tlang i ing.

⁴² Cen mi hnenah Thuthangpha rel tuhin le ani tu Pathian in a nungmi le a thi mite vumah thukhantu ai a bawn khiah reltu tuhin kin ruai i.

⁴³ “Prophet hmuahhmuah in amah ai thu khiah rel tlang ai amah a sangtu hmuahhmuah in a hming thawmin amahte sualhnak ngaithiam tuh i, tiin ti i,” tiin rel i.

Gentile Mite Rauhla Thianghlim Ngahhnak

⁴⁴ Ciatihin Peter a pong hnelhno laiah a thurelhnak a ngaitute hmuahhmuah vumah Rauhla Thianghlim zuktolh i.

⁴⁵ Joppa in Peter thawn a kawitu Jesuh sangtu Judah mite tu Gentile mite hnen ahkhai Pathian in a lehsawng Rauhla Thianghlim burh i ti hmu fangin ngaihsunur tlang ngai i.

⁴⁶ Zaimantifangin ciamite tu pon phundang in pong tlang ai Pathian ai thawmlian zia thangphat tlang khiah za manin i. Peter in,

⁴⁷ “Kinmah in kin ngah zo bangin hemite inkhai Rauhla Thianghlim ngah tlang ve i. Ciamanin tidap in baptisma lang tuh khiah aisu in dawn thil tuh i?” tiin ti i.

⁴⁸ Ciamanin Jesuh Khrih hming in baptisma lang tuhin thupe i. Cen anite hnenah cam rih tuhin Peter hnenah sawm tlang i.