Thuṭhentule 3 - Zanniat Bible

A Tanghnak A Dang Miphunte

¹ Canaan ram songah ral a tawng lai lo Israel mite cuhnak ah he ram songah Bawipa in miphun dang a tlawmniu tangruai i.

² Israel mite a hrekkhat in raltawng heh zaibang i ti a ling lai lomi in raltawng zirhnak tuhin le ling tuhin tangruai hrim i.

³ Canaan ram songai a tangtute tu; Filistin khuapuite panga, a veksen in Canaan mi, Sidon mi, Baal Hermon in Hamath tlangkawn tian Lebanon tlang ai umtu Hiv mite i.

⁴ Bawipa in a pupate hnenah Moses hmangin thu a pehnak tu Israel mite in hlun le hlun lo hliahhnak ah ciami a dang miphunte khiah umruai hrim i.

⁵ Ciamanin Israel mite in Canaan miphun, Hit miphun, Amor miphun, Perizz miphun, Hiv miphun le Jebus miphunte lakah umhnak khuar in um tlang i.

⁶ Nupui pasal tuhin hoi dun ai a khuavang khai bia tlang ve i.

Othniel

⁷ Israel mite in Bawipa Pathian tu hai tlang sio i; Bawipa daih lohnak bawn tlang i, sual tlang ai Baal khuavang le Asherah khuavangte bia i.

⁸ Ciamanin Israel mite vumah Bawipa ai thinrawhnak mai bangin ko ai Masopotamia kumpibawi Cushan Rishathiam nehruai i. Ciatihin Israel mite in Masopotamia kumpibawi khiah kum riat song a naper per sah tlang i.

⁹ Ciafangin Israel mite in Bawipa hnenah au tlang ai Bawipa in anite luatruai tuhin minung pakhat hlat i. Ciami pa tu Kaleb naupa Kenaz ai fapa Othniel i.

¹⁰ Othniel tu Bawipa ai rauhla in umpui ai Israel mite hotu ah cang i. Othniel tu raltawng tuhin feh ai Bawipa in a hnenah Masopotamia kumpibawi vumah nehhnak pe i.

¹¹ Israel ram song khiah kum sawmli song ral dap i. Cen Kenaz ai fapa Othniel tu thi i.

Ehud

¹² Israel mite tu Bawipa hmaiah sual tlang lala i. Ciamanin Moab kumpibawi Eglon khiah Israel mite tahin hatruai i.

¹³ Cen Eglon in Ammon mi le Amalech mite sawm ai Israel mite neh ai Ung khung khuapui tihnak Jericho khua lang i.

¹⁴ Israel mite in Moab kumpibawi Eglon khiah kum hlairiat song a naper persahtu cang i.

¹⁵ Cen Israel mite in Bawipa hnenah au tlang ai amahte luatruai tuhin mi pakhat hlat i. Amah tu Benjamin hin songin Gera ai fapa, kehtlak pa Ehud i. Ciafangin Israel mite in a siahkhon thawn Ehud heh Moab kumpibawi Eglon hnenah hlat i.

¹⁶ Ehud in nak hnih san ralvang pakhat, dong khat sau amah ca bawn ai a kiahhan lam nak a angki fual songah hencih i.

¹⁷ Ciatihin amahte siah khiah Ehud in Eglon hnenah pe i. Eglon tu mithau bikraw i.

¹⁸ Ehud in a pe ben fangin siah phurtute tlung ruai i.

¹⁹ Ikhalselai amah tu Gilgal ai amahte birhnak lungto kher hmun in let ai, “Aw, kumpibawi thuthup na rel tuh pakhat nai ing,” tiin ti i. Ciafangin kumpibawi in a salte hnenah, “Midang hmuah suak tu sio ih,” tiin thupe i. A tihnak bangin suak tlang sio i.

²⁰ Ciafangin kumpibawi tu amah lek dap niu ai a inn vumta a cawlumhnak khan ai a um laitak ah Ehud in a hnenah kawi ai, “Nangmah ca Pathian hnenin thu pakhat keng ing,” tiin ti i. Cen kumpibawi ciah ding i.

²¹ A ding laiteng ah Ehud in a kiahhan lam nak ai a thuphnak vang heh a kekeh lam kut in suah ai kumpibawi thinhnai ah dawt i.

²² A vang tu phum sio i; a cawng tianin phum sio ai a hnua lamah hlehpet i. Cen Ehud in phok leh lo ai a vang ciah a thau in phum sio i.

²³ Ehud tu sumpua ah suak ai dawngkham hmuah a kham hnua fangin hlum i.

²⁴ Kumpibawi ai hnenumte kawi tlang ai dawngkham a khamhnak a hmu tlang fangin kumpibawi tu a inn songah buruk to lai i tuh i, tiin ruat tlang i.

²⁵ Raipui iang tlang ai dawngkham khiah hong kel lo i. Ciamanin tawhfung lang ai dawngkham hong tlang i; ciafangin kumpibawi tu suat vumah a thi in hmu tlang i.

²⁶ Hnenumte in a bawipa a iang tlang teng ah Ehud tu tlan zo teu i. Lungto zuk birhnak kan ai Sairah ah tlan i.

²⁷ Sairah a hleng fangin Israel mite, Epharaim tlang vumah Israel mite tu raltawng tuhin Ehud in tuucangki hmut dekdo i. Ciami tlang in amah rori in konghoi i.

²⁸ “I hlun tu ih; Bawipa Pathian in ning ral Moab mite vumah nehhnak ning pe zo i,” tiin ti i. Cen Israel mite in hlun tlang murhmo ai Moab mite Jordan runpui a tan dawn fangin pom tlang sio i. Mi pakhat bang khai Jordan runpui tan man lo i.

²⁹ Ciata ah a hat ngaingai Moab ralkap thawng hra zolo rek berh i. Aisu khai luat lo i.

³⁰ Cia nia ah Israel mite in Moab mite khiah neh i. Ciatihin Israel ram songah kum sawmriat song daphnak um i.

Shamgar

³¹ Ehud hnua ai amahte hotu khiah Anath ai fapa Shamgar i. Shamgar in Filistin mite zaruk kawlpaw khalhnak faikiang zum in rek berh i. Amah khai Israel mite luatruai i.