Thusimtu 6 - Zanniat Bible

¹ Laivum ai thil sual pakhat i hmuhnak tu minung caah a rit ze i:

² Mi pakhat hnenah Pathian in lianhnak, thilri le mi ai upathnak khai pe ai a thinlung in a daihhnak hmuahhmuah nai lohnak zaikhai nai lo i. Ikhalselai a thilrite nunnuam ngai ai a hmangthilhnak tu Pathian in pe lo i; midang sawn in nuam ngai in hmang i. Hemi tu thil mawi lo le thil pha lo ze i.

³ Mi pakhat in fate zakhat khai nai khalselai, kum raipui nung in sanpha ngai khai ikhalselai, a naihnak thilrite nunnuam in hmang thil hlah lekhaw ani tahin a thi cia ai tehnak nauniu pha sawn i.

⁴ Ciami nauniu tu tesanhnak nai lo, khuathim lakai a liamhnak i ai zaikom inkhai a hming lar awng lo i;

⁵ ni khai hmu awng lo ai zaikhai linghnak nai lo napui, thinnuam lomi pa tahin dapthen in cawlumhnak ngah i.

⁶ Mi pakhat tu kum thawng khat vel hnih not nung khalselai thinlung muanghnak nai hlah lekhaw ziang hnempui i? Aisusu khai a feh tuhhnak heh hmunkhat sio ilo im?

⁷ Minung in a pumpui hrang lek ah naper i, ikhalselai tawk zo i ti um awng lo i.

⁸ Akontih in mifim in mivoi tahin hnempuihnak nai deuh cuang i? Mifarah pa tu zaitin nung tuh ing ti ling khalselai ziang hnempui cuang i?

⁹ Ciamanin thinlung vakvai in umruai hnelhno tahin na mithmuh ai umhnak thilri vumah lungkhimhnak nai heh pha sawn i. Ciami khai thulovang i ai hlivua pom tum thawn bang dun i.

¹⁰ Thil um sa tu a hming bawn cia sio i ai zaibang thil i ti khiah lingciahnak ciang i. Minung in amah tahin a hat deuhmi heh tawng thil tuh lo i.

¹¹ Zaimantifangin tam deuh pong lekhaw sullam nai lo amam i. Ciatih ilekhaw akontih in minung caah hnempuihnak um tuh cuang i?

¹² Minung nunhnak hrangah thilpha heh, laivum can comniu a nun songah le nihlim bangin a liam zual a nunhnak songah heh aisu in ling thil tuh i? Aisu in a thi hnuaah laivum ah ziang cang tuh i ti ling thil tuh i?