Thusimtu 5 - Zanniat BibleNgaihhlah In Thukham Bawn Mah 1 Pathian biakinn ah na feh fangin ralring in feh tu. Zaikhai ruat loin sualhnak a bawntu mivoite ai hibawlhnak tahin a thu hlunnuamhnak thinlung thawn feh pha sawn i. 2 Ruat hmasa loin pong mah; Pathian hmaiah ngaihhlah ze in pong tuh khai ruat mah. Pathian tu vancung ah um i; nang tu laipua vumah um isi; ciamanin na ponghnak tam ze maseh. 3 Thinhar fangin mang tam i, mivoite tu pongtam i. 4 Pathian hnenah thukhamhnak na bawn fangin na thukhamhnak bangin bawn tuhin na tirhting mah. Zaimantifangin Pathian in mivoi heh zaihnak ahkhai kul lo i. Na thukham bangin pe tu. 5 Na thukham bangin na pe lo tahin thukhamhnak zaikhai bawn lo pha sawn i. 6 Na ponkam in sualhnak ah na hoi maseh! Na hoi lekhaw Pathian ai palai hmaiah, “Bawn sual ing!” ti mah. Ciahlahle na ponghnak manin Pathian a thinraw tuhai na thil bawnhnak hmuahhmuah a lovang cang tuh sio i. 7 Mang tam le thulovang tam i. Pathian kihzah tu! Nunhnak Tu Thulovang I 8 Ramkulh pakhatkhat songah mifarah cawh ai anite co tuhhnak le ngah tuhhnak khai ngah loin um tlang hmu lesikhaw aican in um mah; zaimantifangin bawi pakhat tu a vumah bawi dang pakhat um lai ai a veksen vumah bawi upa ber in sik ngio i. 9 Lairam ai a suakhnak tu mi zongzong ca tuhin i. Kumpibawi inrin lairam song suak ring ve i. 10 Tangka a daihtu heh a lungkhim zah in tangka nai tuh awng lo i; tangka lek a ruattu in zaizah a miat ita inkhai a tlawm ze ti tuh ṭio i. Ciami khai zaikhai ilo i! 11 Naihnak a tam fangin aitu tam ve nengno i; thilri naitute caah amahte mit in sik ti siar lo zai hnempuihnak um pa? 12 Napertu cenin tlawm a ai inkhai, tam a ai inkhai, a mitmu ur ngai de i; ikhalselai milian pa tu a naihhnak a tam manin mitmu thil lo i. 13 Laivum ah thil poi ngai pakhat i hmuhnak tu: minung in amah siatsuahtu tuh lianhnak a khawl diamdo khiah i. 14 Cen a khawlhnak tu rin lopui in pairal ai a fapa hnenah ro hlup tuh zaikhai tang nawn lo i! 15 Kawngkolh in a nu pum songin a suak bangin kawngkolh in let tuh i; a naper man hmuahhmuah a kengthilhnak zaikhai nai tuh lo i. 16 Hemi khai heh thil pha lo ngai i, a kawi lam bang rori in a let heh; naper i ing, hlivua hnawh ai a pom tum tlang i ing; ciatih lek ai na a per heh amah caah ziang miathnak um i? 17 A san song hmuahhmuah khuathim songah rong ai in lungsiahnak, thincawlhnak, urhnak le thinrawhnak thawn um fawn i! 18 Ciamanin i hmuhnak tu hetihin i: Minung in a pha ber a bawnthilhnak tu Pathian in can comniu a pe songah ai le ding in a perhnak songin a ngahhnak nunnuampui khiah i. Ciami tu a covo i. 19 Pathian in minung tu a nunnuampui tuhin lianhnak le thilri pe lekhaw, a naper man heh nunnuampui in angpui tuh i. Ciami tu Pathian lehsawng i. 20 Ciabang minung in a san com khiah ruat tuh hang lo i, zaimantifangin Pathian in a thinlung heh anghnak in dimruai i. |
Zanniat Bible © Bible Society of Myanmar, 2018.
Bible Society of Myanmar