Thusimtu 4 - Zanniat Bible

¹ Cia hnuaah laipua vumah diklohnak a tuartute thula ruat ing. Naunehhnak tuartute ai mithli hmu ing; aisu khai hnemtu nai fawn lo i! Naunehtute tu a kut songah thil tithilhnak nai tlang ai, a nauneh mite tu aisu khai bawmtu nai tlang lo i.

² A thi cia mite a thi zo manin a nung laite tahin mi bawngpha i tiin ruat ing.

³ Anite tahin mi bawngpha sawn tu laipua vumai thil sual bawnhnak hmuahhmuah a hmu lai lotu le a te lai lote i.

⁴ Cen minung in harsa ngai in naper ai thil a tibenhnak hmuahhmuah khai zaiman ini tifangin: a minungpui hlaih nuam in le lan a nuam manin i, ti hmu ing. Hemi khai thulovang i ai hlivua hnawh hnelhno thawn bang dun i.

⁵ “Mivoi tu naper loin a kutzep ai hnuavai fangin rong loin thi i,” ti i.

⁶ Kaimah incen, “Harsa ngai in naper ai thulovang thotho tuh rongbenpui dim nai tahin thinlung nuamniu in kuthuam dim nai pha sawn i,” ti ing.

⁷ Nun songah zaikhai i lomi pakhat hmu lala ing.

⁸ Mi pakhat tu fapa nai lo i, unau khai nai lo i; amah lekin um ai milian cang nuam in catloin naper i; ikhalselai lianhnak ah a lungkhim awng kel lo i. “Aisu ca ber ah hetih lawmlam in naper ai nunnuamhnak can rin nai loin um ing,” ti khai ruat awng lo i. Hemi khai thulovang i ai a nuam lo ngai nunhnak i.

⁹ Mite pahnih heh pakhat tahin pha sawn i, zaimantifangin amahte naper man tam deuh ngah kawm i.

¹⁰ Pakhatkhat tlu pang selai a khatta in tho i. Ikhalselai mi pakhat lek tu tlu pang selai a ninghiokul i, thotu aisu khai nai lo i.

¹¹ Ciahlaiah mi pahnih it kawm fangin tu khualum kawm i. Ikhalselai mi pakhat lek tu akontih in khualum thil tuh i?

¹² Mi pakhat lek tu neh bai niu i; ikhalselai mite pahnih tu ṭang kawm thil tuh i; rihual thum ai hualhnak tu baiziap in cat awng lo i.

¹³ A tar ai a voimi kumpibawi, midang ai ruathnak pha pehnak khai a sang nuam nawn lomi tahin khangthar farah mifim pha sawn i.

¹⁴ Thawnginn in a suaktu khai kumpibawi i thai i, a ram songah farah harsa in a suaktu ikhalselai!

¹⁵ Hemi laivum ai a ummi minung hmuahhmuah ai thu i ruat fangin kumpibawi roltu tuh mino pakhat heh hmun khatkhat ah um i ti ling ing.

¹⁶ Kumpibawi ai ukhnak tu minung siar cawk lo i tuh i. Ikhalselai a thi fangin tu a bawn awnghnak thil manin a vumah aisu khai a lungawi um tlang tuh cuang lo i. Hemi khai zaikhai ilo ai hlivua hnawh hnelhno bang thotho i.