Thusimtu 2 - Zanniat Bible

¹ I thinlung niu in, “Tun tu nuamhnak tep tuh ve ihang ing; thil dang ruat loin nuamhnak lek ti tuh ve ihang ing,” tiin ti ing. Ikhalselai ciami tu zaikhai i cuang lo i.

² Hnihnak tu voihnak i! nuamhnak tang zai hnempui i?

³ Minung in laivum kum tlawmniu a nung songah thilpha bawn tuh i hmuthilhnak tuhin, fimhnak lampui hlun in tha i thoruaitu in zu ding ai, ciatihin thupha heh i thinlung in si ing.

⁴ Thil thupui ngaingai bawn ing; Kai ca inn sa ai, cabit vuan bawn ing;

⁵ papar vuan le thingkung cinghnak vuandum nuam ngai bawn ai thai a phuncang a thaimi thingkung tampui bir ing.

⁶ Thingkung khang lai tepawl ti burhhnak ah tiin tili khai bawn ing;

⁷ Tualsuak sal nai ai ciahlaiah sal nu le sal pa tampui lai bet ing. I naihnak kawlpaw le tuute khiah i hlanai Jerusalem ai a um awngtu ai naihnak tahin tam sawn i.

⁸ Kumpibawite le ramkulhte hnenin sui le ngun khawl diamdo ing. Lasatu ah nupang ituseh pasal ituseh dah ing; pasal in nunnuam a ti dehnak nuzawl khai tampui nai ing.

⁹ Jerusalem ah i hlanai kumpibawi awng hmuahhmuah tahin i lian deuh ai i thawmlian deuh i. Cen i fimhnak khai amah kel i.

¹⁰ I mit in thilpha i hmuhnak hmuahhmuah ngah sio ing. I thinlung in nuamhnak a daihhnak hmuahhmuah co sio ing. I naperhnak in thinlung nuamhnak ngah ai ciami tu i perman i ngahhnak lehsawng i.

¹¹ Hemi thil hmuahhmuah heh kaimah in ruat ai i bawnhnak le i perhnak hmuahhmuah i ngaisung fangin, sik tu ih, zaikhai ilo i; hlivua hnawh hnelhno bang lek i ti fiang ngai in ling ing. Vanhang hnia minung caah cenin thil hnempui zaikhai um lo i.

¹² Cen fimhnak, voihnak le tawhnakte heh ruat ai santeh ing. Kumpibawi ai a bawn awnghnak ti siar lo a hnua ai a kawitu in zaikhai bawnthilhnak dang nai cuang lo i.

¹³ Ciatihin tleuhnak in thimhnak a lan bangin fimhnak in voihnak lan i, ti ling ing.

¹⁴ Mifim in a lu ah mit nai i, ikhalselai mivoi tu khuathim lakah vak i. Cen anite pahnih vumah mi zongzong hnenah khualairel a tlunghnak tu tlung tuh thotho i ti hmu ing.

¹⁵ Ciafangin kaimah hlanlam niu in, “Mivoi tawkhnak heh tawk tuh ve ingkhaw, i fim heh zai hnempuihnak um cuang i?” tiin ti ing. Hemi khai heh thulovang thotho i.

¹⁶ Mivoi ling tlang nawn lo bang thotho in mifim khai ling tlang tuh ve lo i. Hmai lam ahcen kin veksen in haihnak i tuh sek ising. I, mivoi bangin mifim khai thi ve thotho i.

¹⁷ Ciamanin nunhnak heh i hua i, zaimantifangin vanhang hnia ai thil hmuahhmuah cenin lungsiahnak hlengruaitu ian i. Thil hmuahhmuah heh thulovang i. Hlivua hnawh hnelhno menma i.

¹⁸ Vanhang hnia ai i bawnhnak le i naperhnak hmuahhmuah heh i hua i; i lehhnua ai i roltu hnenah hlup tuh ing ti ling cia ing!

¹⁹ Ciami pa tu mifim i tuh le mivoi i tuh rin aisu in ling i si? Zaizai khai ita tuseh i fimhnak le i naperhnak in a suakhnak a thai hmuahhmuah heh amah ai ukhnak i tuh fawn i! Ciami khai thulovang menma i.

²⁰ Laivum ai i naperhnak le i thil tihnak hmuahhmuah i ruat betbo fangin thinpit in um ing. A roh ngai ai na i per khiah i sir i.

²¹ Zaimantifangin zaikhai a per lotu hnenah fimhnak le linghnak le thiamhnak thawn na a pertu in a naihnak hmuahhmuah hlup tuh ihang! Hemi khai zaikhai ilo ai thil pha lo ze i.

²² Rimsu le harsa in a nunsong hmuahhmuah ni hniaah naper ai ziang ngah i?

²³ A nunsong hmuahhmuah heh tuarhnak le thincawlhnak ciang i. Zan fang khai a thin nuam cuang lo i. Hemi khai heh thulovang thotho i.

²⁴ Minung ca ahcen ai le ding le a naper in nuamhnak a ngahhnak heh a pha ber i. Ciami khai tu Pathian hnenin a hlenghnak i ti hmu zo ing.

²⁵ Zaimantifangin amah tel loin aisu in ai le ding thil tuhai nuam thil tuh i?

²⁶ I, amah lungawiruaitu hnenah fimhnak le thiamhnak le anghnak pe i. Ikhalselai misual hnen ahcen, Pathian lungawiruaitu hnenah pe leh tuh sio in, phurh tuh le khawm tuh ṭuanvo pe i. Ciami khai thulovang i; hlivua hnawh hnelhno bang i.