Ṭahhlapawl 5 - Zanniat Bible

Ninghiokun Ai Sawngenhnak

¹ Aw Bawipa, kaimah vumai a thil canghnak heh i hih tu hram law. I sik tulai i zakthihnak heh i hmu sah tu hram law.

² Kin ram le ro kin naihnakte khai Kin ling awng lo mite ai kut songah hleng i. Kin innte tu ramdang mite caah cang i.

³ Kin pate ral kut in thi i, Ngakṭah farah ah cang i. Kin nute hmaitong ah cang i.

⁴ Kin dinghnak ti a lai kul i; Kin tihnak zanthing khai a man pe kin kul i.

⁵ Kin hawng ah hak kin orh i; Ramsa bangin catloin hnawtmi i ing. Kin cawl ze napui cawlum nia nai lo i ing.

⁶ Rong kham ngah nuam in, Egypt ram le Assyria ramah rong ngen in feh tlang i ing.

⁷ Kin pupate sual ai um nawn lo ihang; Ikhalselai anite sualman kin in co tlang i ing.

⁸ Sal tahin a pha cuang lo mite inkhai Kin vumah bawi cang tlang i. Amahte kut songin kin suahthaitu Aisu khai um fawn lo i.

⁹ Mirek hmang pawl hampalak ah vak thliahthlo i; Thi tuh lau kongin nung nuam in rong si tlang i ing.

¹⁰ Kin rikamhnak in kin taksa saruai sio i; Kin vun tu lungthu bangin ling i.

¹¹ Kin nupuite khengkhebel in sualpui i, Zion mual rori ah. Judah khuatenau cangcang ah kin fanute sualpuihnak tuar i.

¹² Kin hotute fehpui ai, Amahte hawng in awk ai thi i. Kin patarte khai hmaizahhnak pe lo i.

¹³ Kin tlangvalte sal bangin fang rialruai i; Kin naupang tuallengte tu tlu lianglo i, Amahte phurruaihnak zanthing a rit ze manin.

¹⁴ Kin patarte in kin hlum zo i, Amahte to dehnak khuapui kotka khiah. Tlangvalte inkhai kin hlum zo i, Amahte tum dehnak congcingte khiah.

¹⁵ Kin nunhnak songin anghnak pai zo sek i. Kin nuamhnak le kin lamhnak tu, Lungsiahnak in rol zo i.

¹⁶ Kin sui lukhuk kin lu in tlok zo i. Kin sual zo ai kin lampui pit zo i.

¹⁷ Hemi manin thin kin ur i, Kin thin runruh in ur i. Hebang manin mit kin vai ihang.

¹⁸ Zaimantifangin Zion mual tu khing sukso ai zamhnak ihang’ Hampalak ai mehlengte vak i, Siatbalhnak khuarop ah cenin.

¹⁹ Ikhalselai, Bawipa nang cenin kumzangza in uktu bawi isi. Na bawi tohkham tu can tong tianin kho tuh ngio i.

²⁰ Zaimanin tun tian, kin zangtak lai isi? Zaifangin kin hih leh ni nga si?

²¹ Na hnenah kin letruai leh tu hram law. Aw Bawipa, kin letruai leh tu hram law Hlanlai kin songlawihnak tepawl heh kin pe leh tu sal law.

²² Ilekhaw kumzangza in kin hnawl tuh isim? Kin vumai na thinrawhnak heh bo nia um tuh lo i awm?