Suahhlannak 8 - Zanniat Bible

Sumphurh

¹ Bawipa in Moses hnenah, “Pharoah hnenah feh tulai, Bawipa in, “I minungte in i bia tuhin hlat tu.

² Ngai tu, hlat nuam hlahle sikhaw na ram heh sumphurh in na cawh tuh ing.

³ Nile runpui heh sumphurh lekin dim tuh i. Runpui in suak tuhai na kumpibawi inn le na ithmun khan, na khuahluan vumah le na kuthnia tlangsuakte le na minungte inn tianin lut tlang tuh i. Na tapkha le na bel song tianin hleng tuh sio i.

⁴ Na minung, na kuthnia tlangsuakte le nangmah vum tianin dawk tuh murhmo i,’ ti i, tiin rel tu,” tiin ti i.

⁵ Bawipa in Moses heh, “Aaron hnenah, “Runpui vumah ituseh, tizir vumah ituseh, tili vumah ituseh, na faikiang dang tulai, Egypt ram songah sumphurh suakruai tu,’ tiin rel tu,” tiin ti i.

⁶ A tihnak bangin Aaron in a faikiang ti vumah dang ai sumphurh suak ngaingai ai Egypt ram ciah khuk diamdo i.

⁷ Ikhalselai dawthiamte inkhai amahte dawi in sumphurh heh a ramah suakruai ve i.

⁸ Ciafangin Pharoah in Moses le Aaron ko ai, “Kaimah hnenin le i minungte hnenin sumphurhte lang thai sek tuhin Bawipa hnenah sawngen tu hram ih. Bawipa hnenah hibawl tuhin ning minungte hlat tuh ing,” tiin ti i.

⁹ Cen Moses in Pharoah hnenah, “Sumphurhte tu ning inn hmuahhmuah songin tlan sio ai Nile runpui song lek ah um thai tuhin zaifangin nangmah, na kuthnia tlangsuakte le na minungte ca sawnget tuh ing; a can i rel tu,” tiin ti i.

¹⁰ Pharoah in, “Thaininghla ngen tu,” tiin ti i. Ciafangin Moses in, “Bawipa kin Pathian bangmi Pathian dang um lo i, ti na ling thai tuhin na ti ang ngaingai in cang tuh i.

¹¹ Sumphurhte in nangmah ituseh, ning innte ituseh, na kuthnia tlangsuakte le na minungte ituseh, ning hlum tuhai Nile runpui song lek ah um tuh i,” tiin ti i.

¹² Cen Moses le Aaron tu Pharoah hnenin suak kawm ai Pharoah hnenai hlengruaihnak sumphurhte thu ah Moses in Bawipa hnenah sawngen i.

¹³ Moses ai ngenhnak bangin Bawipa in khimruai ai inn songai um sumphurh le vuan song le lolai ai um sumphurhte ciah thi sek i.

¹⁴ Egypt mite in sumphurhte tu a bur lian puipui in pum ai amahte ram khiah sumphurh uih rimsia nam in dim i.

¹⁵ Pharoah in sumphurhte thi sek ti a hmu fangin a thinlung ruh lala i. Bawipa ai rel cia bangin Moses le Aaron ai thu ngai sah nuam lo i.

Thosem

¹⁶ Moses hnenah Bawipa in, “Aaron hnenah, ‘Na faikiang in laipua sat tulai, Egypt ramsong hmuahhmuah ai laivut heh thosem ah cang tuh i,’ tiin rel tu,” tiin ti i.

¹⁷ Ciatih bangin bawn i. Aaron in a faikiang heh lang ai laivut khiah sat i. Ciafangin laivut heh thosem ah cang ai minung le ramsa vumah khop diamdo i. Egypt ram songai laivut hmuahhmuah khiah thosem ah cang sio i.

¹⁸ Ciafangin Egypt ramai dawithiam mite inkhai thosem heh bawn tum napui bawn thiam tlang lo i. Khuahacang ah thosem tu minung le ramsa vumah dim i.

¹⁹ A dawithiam mite in Pharoah hnenah, “Hemi tu Pathian ai thiltihnak i,” tiin ti tlang i. Ikhalselai Pharoah ai thinlung tu hak thotho ai, Bawipa ai rel cia bangin Moses le Aaron ai thu tu ngai nuam hrimhrim lo i.

Thothi

²⁰ Bawipa in Moses hnenah, “Runpui ah Pharoah a feh fangin Pharoah tawk tuhin zingniu in feh tulai a hnenah, ‘Bawipa in, “Kaimah i bia thai tuhin i minungte hlat tu;

²¹ Hlat hlahle sikhaw nangmah le na kuthnia tlangsuakte le na minungte vumah le na innsang ah thothi in dimruai tuh ing, tiin tunin na tiam cia ing. Egypt mite ai inn ituseh, a ding hmun laipua tianin thothi in dim tuh sio i.

²² Ikhalselai cia nia ahcen i minungte umhnak Goshen ram tu zuah tuh ing; kaimah heh Bawipa ing ai hetih ai thil a titu heh Kaimah ing ti khiah na ling tuhin, Goshen ram ahcen thothi pakhat bangkhai leng tuh lo i.

²³ Ciatihin i minung le na minungte lakah hlaihdanhnak bawn tuh ing. Cia ngaihsunurkul heh thangha hrimhrim ah hleng tuh i,’ tiin rel tu,” tiin ti i.

²⁴ Bawipa in ngaihsunurkul tu bawn ngaingai ai thothi siar cawk loin Pharoah kumpibawi inn ah le a kuthnia tlangsuakte inn ah le Egypt ramsong hmuahhmuah ah dim sio i. A rampui tu thothi in hnawmcan sio i.

²⁵ Ciafangin Moses le Aaron tu Pharoah in ko ai, “Feh tu ilai kin ram songah ning Pathian hnenah hibawlhnak sel tu ih,” tiin ti i.

²⁶ Cen Moses in, “Ciatih menma tu cang thil lo i; zaimantifangin Bawipa kin Pathian hnenah kin hibawlhnak sumhnam heh Egypt mite thinrawtiarhnak cang tuh i. Egypt mite mithmuh ah hibawlhnak bawn in kin sumhnam rohnak in Egypt mite thinrawtiarhnak cang lekhaw lungto in kin thi tianin kin sep tuh i.

²⁷ Ciamanin kin Pathian in thu a kin pehnak bangin Bawipa hnenah hibawlhnak sel tuhin nelrawn ramkhing ah ni thum song feh kin kul tuh hrimhrim i,” tiin ti i.

²⁸ Pharoah in, “A hla ze tian feh tuh lo ile i sikhaw Bawipa ning Pathian hnenah hibawlhnak sel tuhin nelrawn ramkhing ah ning hlat tuh ing. Kaimah ca sawngen tu” tiin ti i.

²⁹ Ciafangin Moses in, “I feh sawngpah in Bawipa hnenah sawngen tuhai thangha fangin thothite na hnen le na kuthnia tlangsuakte hnenin le na minungte hnenin tlan tuh sek i. Ikhalselai i minungte in Bawipa hnenah hibawl sel thil tuh thu ah i zawl hrimhrim malaw,” tiin ti i.

³⁰ Moses khai Pharoah hnenin suak ai Bawipa hnenah sawngen i.

³¹ Cen Moses ai a ngenhnak bangin Bawipa in khimruai i. Pharoah le a kuthnia tlangsuakte le a minungte hnenin thothi pakhat khai tang loin pai berh i.

³² Ikhalselai Pharoah ai thinlung tu ruh leh thotho ai Israel mite suakruai nuam hrimhrim lo i.