Suahhlannak 7 - Zanniat Bible

¹ Ciafangin Bawipa in Moses hnenah, “Sik tucuk, Pharoah hnenah nang tu Pathian bangin na bawn tuhai, na u Aaron heh a hnenah prophet bangin thurel tuh i.

² I thupeciahnak hmuahhmuah Aaron rel tulai, amah in Pharoah hnenah a ram songin Israel mite suakruai tuhin rel tuseh.

³ Ikhalselai Pharoah ai thinlung tu ruhruai tuhai, Egypt ram songah ngaihsunurkul a phunphun in bawn inkhai,

⁴ Pharoah in ning thu ning ngai nuam tuh lo i. Ciafangin a ram heh harsa roh in bawn tuhai Egypt mite tu a roh ngai in cawhkuan pe tuh ing; ciatihin i minung Israel mite tu a bur a bur in Egypt ram songin suah tuh ing.

⁵ Egypt ram an Israel mite suah ai amahte vumah i ban thahat i hlir fang ian in Egypt mite in Bawipa ngaingai i tiin i ling tuh i,” tiin ti i.

⁶ Bawipa ai ruaihnak bangin Moses le Aaron in bawn kawm i.

⁷ Pharoah hnenah thu a rel fangin, Moses tu kum sawmriat khim ai Aaron tu kum sawm riat le kum thum khim i.

Aaron Ai Faikiang

⁸ Bawipa in Moses le Aaron hnenah,

⁹ “Pharoah in, ‘Ziang ngai ning i le ilo, ngaihsunurkul bawn tucuk ih,’ ning ti lekhaw, nang Moses in Aaron hnenah, ‘Na faikiang lang tulai, Pharoah hmaiah lon tu; cen rul cang tuseh,’ ti tu,” tiin ti i.

¹⁰ Moses le Aaron tu Pharoah hnenah kawi ai Bawipa ai thupeciahnak bangin bawn kawm i. Pharoah le a kuthnia tlangsuakte hmaiah Aaron ai faikiang heh laipua lakah lon ai rul ah cang peupeu i.

¹¹ Cen Pharoah in mifimte le dawithiam mite ko ai amahte dawi in Aaron ai bawnhnak bangin bawn tlang ve i.

¹² Amahte faikiang heh laipua lakah lon ai rul ah cangruai sek ve i. Ikhalselai amahte rulpuite ciah Aaron ai rul in thon sek i.

¹³ Ikhalselai Bawipa ai a rel cia bangin Pharoah ai thinlung tu a ruh ze ai Moses le Aaron thu heh ngai nuam hrimhrim lo i.

Egypt Ramah Hnawmcanhnak Thisan

¹⁴ Cen Bawipa in Moses hnenah, “Pharoah ai thinlung tu a bingbir ze i. I minungte tu hlat nuam lo i.

¹⁵ Pharoah heh zing lamai Nile runpui ah a feh fangin tawk tu. Varkam in iang tulai rul ai canghnak awng faikiang khiah keng tu.

¹⁶ Cen Pharoah hnenah, ‘Hebrew mite ai Pathian Bawipa in na hnenah i hlat ai, i minungte in nelrawn ramkhing ah i bia thil tuhin i minungte hlat tuseh, na ti i. Ikhalselai tun tian tu a thu ngai lo isi.

¹⁷ Bawipa ai thu tu hetihin i: Bawipa ing ti khiah i bawn tuhhnak thil in ling tuh isi. Sik tu, hemi faikiang in runpui ai ti khiah vit tulai ti khiah thisan cang tuh sek i.

¹⁸ Nga hmuahhmuah thi tuh sek ai runpui tu uih tuh ze manin Egypt mite in runpui ai ti ding thil tuh lo i,’ tiin rel tuh isi,” tiin ti i.

¹⁹ Cen Bawipa in Moses hnenah, “Aaron heh, ‘Na faikiang lang tulai Egypt ram songai ummi runpui ituseh, tizir ituseh, tili ituseh, ti hmuahhmuah vumah na faikiang hlir tu. Ti tu thisan cang tuhai Egypt ram song khuahacang ah, tikuang songai ti le lung bel songai a khawlhnak ti tianin thi cang tuh sio i,’ tiin rel tu,” ti i.

²⁰ Bawipa ai thupeciahnak bangin Moses le Aaron in bawn kawm i. Pharoah le a kuthnia tlangsuakte hmai rori ah Aaron in a faikiang ai runpui ti khiah vit i. Ciasawng fangin ti tu thi cang sek i.

²¹ Runpui songai nga hmuahhmuah thi sek i; ciamanin a rim nam ze in Egypt mite in runpui ai ti tu ding thil tlang lo i. Egypt ram tu thisan lekin dim i.

²² Cen Egypt ramai dawithiam mite in amahte dawi in ciami bang ciah bawn tlang ve i. Pharoah thinlung tu a ruh kel in ruh leh thotho i. Bawipa ai a rel cia bangin Moses le Aaron thu heh ngai hrimhrim lo i.

²³ Ciabang ngaihsunurkul rin zai nam loin Pharoah tu a kumpibawi inn ah tlung teu i.

²⁴ Cen Egypt mite in runpui ai ti ding thil nawn lo manin varkam ah tikhur co tlang lianglo i.

²⁵ Bawipa in runpui ti a vit hnuaah ni sarih rai i.