Suahhlannak 5 - Zanniat Bible

Pharoah Hmaiah Moses Le Aaron

¹ Cen Moses le Aaron tu Pharoah hnenah feh kawm ai a hnenah, “Israel ai Pathian in, ‘I minungte tu nelrawn ramkhing ah feh ai kaimah caah biahnak puai bawn thil tuhin Egypt ram an suak tlang tuseh,’ na ti i,” tiin ti kawm i.

² Ciafangin Pharoah in, “Bawipa tu aisu i? Zaimanin Bawipa thu ngai in Israel heh feh siang tuh ing? Bawipa tu i linghnak ilo i. Ciamanin Israel heh suak siang tuh lo ing,” tiin ti i.

³ Cen anite in, “Hebrew mite ai Pathian tu kinmah hnenah lar i. Bawipa kin Pathian hnenah hibawl sel thil tuhin nelrawn ramkhing ah ni thum song feh tuhin kin hlat tu hram. Ciatihin kin bawn lo fangin, ralte in maw, urhnak in maw, kin rek tuh i,” tiin ti kawm i.

⁴ Ciafangin Egypt kumpibawi in Moses le Aaron hnenah, “Ning minungte naper phaniu in per thil thai loin ning tawlrelhnak tu ziang ning daih manin i? Hemi salte heh naper hmunah fehruai tu ih!

⁵ Ning minungte heh kin ramsong minung ngaingai tahin tam sawn ihang. Ciahlaiah anite naper per tuh loin tum lai i si,” tiin ti i.

⁶ Cia nia ah Pharoah in Egypt mi salkhawngtu le Israel mite napertute hotu hnenah thupe ai,

⁷ “A hlan bangin ukkhe emhnak ah hamparo pe nawn mahang ih; amahte hlan lamin hamparo si tlang tuseh.

⁸ Ikhalselai ukkhe tu he hlan ai amahte bawn zah bawn tuh thotho in ruai tuh i si; ṭhum hrimhrim mah ih. Thazawng manin phuncam tlang ai, ‘Pathian hnenah hibawlhnak sel tuhin feh tuh i ing,’ tiin tihnak i.

⁹ Tam amam le har amam in naper ruai tu ih. Thudon lek a pongtute ai thu ngai loin naperhnak ah thakol in per tlang tu sawn seh,” tiin ti i.

¹⁰ Ciafangin salkhawngtu le naper hotute tu a minungte hnenah feh tlang ai, “Pharoah in, ‘Hamparo pe tuh nawn lo ing;

¹¹ ning hmuhnakhnak ah si tu ilai lang tu ih; ikhalselai ukkhe tu ning bawn kel zah thotho in bawn tuh i si,’ ning ti i,” tiin rel tlang i.

¹² Ciamanin Israel mite tu hamparo si tuhin Egypt ramah suk le so ah vak tlang i.

¹³ Salkhawngtute in rangruai hlethlo ai, hamparo ning pe lai ai ni khat ai ning bawn zah thotho in ni khat ah bawn tuh i si, ti tlang i.

¹⁴ Pharoah ai minung, salkhawngtute in Israel naper hotute amahte naperhnak hmuahhmuah ṭuanvo pe mite heh, “Zaimanin a hlanai ni khat songai ning bawn kelde ukkhe heh tunin bawn ben lo i si,” tiin hau ai vit tlang dekdo i.

¹⁵ Ciafangin Israel mite naper hotute tu Pharoah hnenah kawi tlang ai, “Bawipa, zaimanin na salte hetihin kin bawn isi?

¹⁶ Tunah hamparo kin pe lo isi, ikhalselai bawipa, ‘Ukkhe bawn tu ih’ kin ti thotho isi. Ciahlaiah bawipa, vit tianin tuar betbet i ing. Na minungte mawh rori i,” tiin cam tlang i.

¹⁷ Ciafangin Pharoah in, “Ningmah heh thazawng mi i si, thazawng mi phun hrimhrim ning imanin, ‘Feh nga ing khaw Bawipa hnenah hibawlhnak sel tuh i ing,’ ti dekdo i si.

¹⁸ Ciamanin tun rori in ning naper pan tu ih! Hamparo tlawmniu bangkhai ning pe tuh lo ing; ikhalselai ukkhe tu ning bawn tuh zah thotho in bawn tuh hrimhrim i si,” tiin ti i.

¹⁹ Israel mite naper hotute in, “Ning bawn kel zah thotho nisiar in ukkhe bawn tuh i si,” ti ai Pharoah tihnak thu ling fangin kin harsa ruahro i, ti ling tlang i.

²⁰ Pharoah hnenin suak ai amahte iangtu Moses le Aaron tawk tlang fangin,

²¹ anite hnenah, “Ning thil bawnhnak heh Bawipa in hmu tu hram selai, Pharoah le a kuthnia tlangsuakte in kin hua tuhin ning bawn manin Bawipa in ning cawh tuseh. Kin rek tuhin amahte kut songah vangsau dah sah i si,’ tiin ti tlang i.

Moses Ai Sawngenhnak

²² Cen Moses tu Bawipa hnenah let lehsal lala ai, “Bawipa, zaimanin he Israel mite vumah harsahnak hlengruai isi? Zaimanin amahte hnenah kaimah heh i hlat isi?

²³ Nangmah aiawh in Pharoah hnen i hleng sawngpah in na minungte heh hnawmcan ṭiode i. Nangmah in le anite o tuhin zaikhai bawn lo isi,” tiin ti i.