Suahhlannak 40 - Zanniat Bible

Ponhlam Tunghnak Le Aphnak

¹ Bawipa in Moses hnenah,

² “Hla hmasaber ni khat nia ah, Bawipa umhnak Ponhlam heh tung tlang tuh i si.

³ Ciami hlam songai Thutiam Kuang songah Thupe Sawmkhat dah tu ilai thingkuang heh ponzar berah dah tuh i si.

⁴ Cabuai khai dah tu ilai a thilrite khai a vumah dah tuh i si. Maivarhnak fung dah tu ilai a vumah mai var tuh i si.

⁵ Thutiam Kuang ai a hmaicang ah yihmui rimur taihnak sui ai bawnhnak puleng dah tu ilai a luthnak dawngkham ah ponzar khai tuh i si.

⁶ Cen Ponhlam ai hmaiah maitai hibawlhnak puleng dah tuh i si.

⁷ ciami puleng le Ponhlam karlak ah kutsomhnak hleng dah tu ilai a songah ti khai dah tuh i si.

⁸ A kulhhnak heh mun tu sio ilai luthnak kotka ah ponzar khai khaih tuh i si.

⁹ “Cen thau lang tu ilai, Pathian umhnak Ponhlam le a songai a umhnak hmuahhmuah pawh tuh i si. Ciatihin Ponhlam le a thilri hmuahhmuah Pathian hnenah ap tu ilai inn thianghlim ah cang tuh i.

¹⁰ Maitai hibawlhnak puleng le a thilrite khai thau pawh tuh i si. Ciatihin Pathian hnenah ap tu ilai a thianghlim puleng cang tuh i.

¹¹ Kutsomhnak le a kado khai thau pawh tu ilai ciatihin Pathian hnenah pe tuh i si.

¹² “Aaron le a fapate tu ponhlam dawngkham ah koih tulai tidap in takhlu tlang tuseh.

¹³ Aaron tu hnikpon cianghlim silh tu ilai kaimah ca suangbawi na ruaihthilhnak tuhin thau pawh in cianghlimruai tu ih.

¹⁴ A fapate khai a hiangah kawi tu selai angki silruai tu ih.

¹⁵ A pa thau ning pawh bangin a fapate khai thau pawh tuh i si; ciatihin kaimah ca suangbawi na ruaih thil tuh i. Thaupawhhnak a imanin a zomzet in suangbawi na ruaih tuh i,” tiin ti i.

¹⁶ Bawipa ai thupeciahnak bangin Moses in bawn i.

¹⁷ Ciamanin Egypt ram a hlum hnua kum hnihhnak hla hmasaber ni khat nia ah Bawipa umhnak ponhlam khiah tung ben liang i.

¹⁸ Moses amah rori in tung i. Moses in khuam hniaphahte heh toh ai khuamte heh bir i; thingtlangte khai mun ai bangkhangte khai bet i.

¹⁹ Innphu khuk khai pharh ai, Bawipa ai thupeciahnak bangin Ponhlam heh khuk i.

²⁰ Cen thukham nganhnak lungtlepte heh lang ai Thutiam Kuang songah thun i. A laangte tu thingkuang vumah khaihhnak a kual songah mun ai thingkuang heh sin i.

²¹ Pathian umhnak Ponhlam songah Thutiam Kuang heh dah ai dak tuh loin ponzar in berruai i. Bawipa ai thupeciahnak bangin thukham nganhnak lungtlepte dahhnak kuang heh ponzar in ciatihin berruai i.

²² Ponhlam song ahcen cabuai khai dah i; hlam song sak lam nak deuh ponzar pualam ah dah ai,

²³ Bawipa ai thupeciahnak bangin Bawipa ca selhnak sang heh cabuai vumah dah i.

²⁴ Hlam song thotho ah hlang lam nak cabuai ai a sir ah maivarhnak khuam dah i.

²⁵ Bawipa ai thupeciahnak bangin Bawipa ai hmaiah heh maivarhnak vumah var tuhhnak maikhuatte dah i.

²⁶ Sui ai bawnhnak yihmui rimur taihnak puleng tu ponzar hmaiah dah i.

²⁷ Ciami puleng vumah Bawipa ai thupeciahnak bangin yihmui rimur heh mai in tai i.

²⁸ Ponhlam song luthnak dawngkham ah pon zar i.

²⁹ Maitai hibawlhnak hrang puleng tu dawngkham hmaiah toh i. Ciami puleng vumah pehnak rong dah ai maitai hibawlhnak khai bawn ai Bawipa ai thupeciahnak bangin sa khiah a bo tianin in tai sek i.

³⁰ Ciami puleng le Ponhlam karlak ah kutsomhnak hleng dah ai takhlu tuhhnak tidap khai dah i.

³¹ Ciami tidap in Moses, Aaron le Aaron ai fapate in amahte kut ke som tlang i.

³² Bawipa ai ponhlam song a lut cang fangin ituseh, puleng a feh cang fangin ituseh, Bawipa ai thupeciahnak bangin takhlu hmasa de i.

³³ Ponhlam le puleng cingkim ai kulhhnak palkawng khai Moses in bawn sio ai kulhhnak kotka ahkhai pon zar i. Ciatihin Moses in naper hmuahhmuah khiah delh ihang.

Bawipa Ponhlam Vumai Mairo

³⁴ Ponhlam tu mairo in tuam ai Bawipa ai songlawi tleuhnak in dim i.

³⁵ Ciatihin Bawipa ai songlawi tleuhnak in a dim manin a songah Moses lut thil lo i.

³⁶ Riahbuk in hmundang ah Israel mite a thawn fangin Pathian umhnak Ponhlam in mairo a thawn fang ian in thawn ve de i.

³⁷ Mairo thawn hlah lekhaw hmundang ah thawn thil de lo i.

³⁸ Ramkhing lakai amahte a vakvai song hmuahhmuah ah Bawipa amahte hnenah um i ti larruaihnak ah Ponhlam vumah sun ah mairo hmu ai zan ah maivar ngio khiah hmu tlang i.