Suahhlannak 33 - Zanniat Bible

Feh Tuhin Bawipa Thupehnak

¹ Bawipa in Moses hnenah, “Egypt ram an na hoisuakmi minungte thawn he hmun an Abraham le Isaac le Jacob hnenai na tesinfate hnenah pe tuhin i thukhamhnak ramah feh tu ih.

² Ning hmaiah vancungmi fehruai tuhai Canaan mi, Amor mi, Hit mi, Perizz mi, Hiv mi le Jebus mite heh hnawt tuh sek ing.

³ Hnawi le khoitizu luang hmun ramah feh tuh i si. Ikhalselai kai tu ning hnenah feh tuh lo ing. Zaimantifangin milungruh pawl ning imanin lampui lakah ning siatsuah pang tuh sek ing,” tiin ti i.

⁴ Ciami thusia heh Israel mite in za fangin lungsia in kap tlang i; aisu inkhai amahte sui le ngun khai hmang nuam tlang lo i.

⁵ Cen Bawipa in Moses hnenah, “Israel mite hnenah, ‘Ning tu milungruh pawl i si. Camkhatniu rin ning hnenah vak inglai ning siatsuah ngah tuh sek ing. Ciamanin ning sui le ngun hawk tusek ih. Cia hnuaah ning vumah ziang bawn tuh ing ti ling tuh ing,’ ti i, tiin rel tuh i si,” tiin ti i.

⁶ Ciamanin Sinai Mual a hleng hnua Israel mite tu amahte sui le ngun hmang nuam tlang lo i.

Bawipa Ai Ponhlam

⁷ Israel mite in riahbuk a khur hmuncang ah, Moses in Ponhlam heh lang ai riahbuk in a pualam a hla deuh hmunah sa i. Ciami ponhlam heh, “Bawipa ai umhnak ponhlam,” tiin a hming bawn i. Bawipa a tawk nuamtute tu riahbuk in suak ai ciami ponhlam ah kawi tlang de i.

⁸ Moses tu ciami ponhlam a kawi cang fangin, mizapui tu amahte dawngkham ṭen ah ding ai Bawipa ponhlam songah Moses a lut hlanlo sik tlang de i.

⁹ Ciami Ponhlam songah Moses a lut fangin mairo heh a zualpui in zam de ai Ponhlam dawngkham ah zel de i; cen ciami mairo songin Bawipa in Moses hnenah thurel de i.

¹⁰ Ponhlam dawngkham ah mairo um khiah mizapui in a hmu fangin ding tlang ai Ponhlam dawngkham in amahte lu ut tlang ṭen de i.

¹¹ Rualpui pha pon dun bangin, Bawipa le Moses tu hmaiton in pon dun de i. Cia hnuaah Moses tu riahbuk ah tlung leh de i. Ikhalselai Moses bawmtu tlangval Joshua, Nun ai fapa tu hlam songah tang hlen de i.

Bawipa In Umpui Tuhin Thukhamhnak

¹² Moses in Bawipa hnenah, “Hemi Israel mite Canaan ramah hoi tuhin i ruai ti khiah ling ing; ikhalselai kaimah thawn feh tuhin aisu hlat isi, ti cenin i rel lai lo isi. ‘Nang tu na ling ai hmaipha ngah in i angruai isi,’ tiin iti zo isi.

¹³ Ciamanin i vumah na ang lekhaw kaimah in na lingfiang amam ai na angruai ngio tuhin na tumhnak i rel tuhin ninghio na ngen ing. Hemi Israel mite tu na miphun tuhin na rilhnak khai hai hram malaw,” tiin ti i.

¹⁴ Ciafangin Bawipa in, “Na hnenah feh tuh ve ai muanghnak na pe tuh ing,” tiin ti i.

¹⁵ Cen, Moses in, “Kin hnenah na feh tuh ve lo fang cenin he hmun an kin fehruai nawn mahang.

¹⁶ Zaimantifangin kin fehpui hlahle sikhaw na minungte le kaimah in na hmaipha kin codan heh akontih in midang in kin ling tuh i? Na umpuihnak in laipua vumai miphun hmuahhmuah lakah kin tumcedan kin larhnak tuh heh in,” tiin ti i.

¹⁷ Ciafangin Bawipa in Moses hnenah, “Na ngenhnak bangin bawn tuh ing; zaimantifangin i ling ze mi isi ai na vumah i ang ze i,” tiin ti i.

¹⁸ Cen Moses in, “Bawipa, ninghio niu in na songlawi zia i hmuh tu hram law,” tiin ngen i.

¹⁹ Ciafangin Bawipa in, “I songlawi zia heh na hmuh tuhai i hming thianghlim khiah na hmai rori ah phuang tuh ing; Kai tu Bawipa ing. I ngaihhar nuamhnak tu ngaihhar tuhai, i ninghio nuamhnak tu ninghio tuh ing.

²⁰ Ikhalselai, “I hmai rori tu i hmu thil tuh lo isi. Zaimantifangin i hmai i hmutu heh aisu khai nung tuh lo i,” tiin ti i.

²¹ Cia hnuaah Bawipa in, “Sik tu, lungpui vumah dinhmun pha i hiangah um i.

²² Na hiangniu in i songlawihnak na kan fangin lungpui kua songah na thup tuhai i kan ngah hlanlo i kut in na hup tuh hlen ing.

²³ Cen i kut i thawn teu fangin i hnua lam lek i hmu tuh isi; i hmai tu i hmu ngah tuh lo isi,” tiin ti i.