Suahhlannak 28 - Zanniat Bible

Suangbawite Thilthuam

¹ “Kaimah ca ruaihtu suangbawi tuhin Israel mite lakin na u Aaron le a fapate Nadab, Abihu, Eleazar le Ithamar heh na hnenah ko tu.

² Na u Aaron tu mawihnak le mitsih mawi co thai in suangbawi thilthuam thianghlim bawt tuh i si.

³ Thiamhnak i pehnak kutzung thiamthil pawl ko tulai kaimah ca suangbawi thianghlim naṭuan thil tuhin Aaron ai hnikponte bawtruai tuh i si.

⁴ Amahte bawn tuhhnak hnikponte tu kangbet pakhat, hawngorh lamkhat, angki fual lamkhat, a coih liang ai a ṭial nai angki puata lamkhat, lupawng lamkhat le elpen pakhat i tuh i. Na u Aaron le a fapate in kaimah ca suangbawi tuhin kutzungthiamte in ciami hnikpon thianghlim pawl heh bawn tlang tuh i.

⁵ Ciatihin a bawn fangin sui ituseh, a mepian le a sannum le a san tuuhmul le pon mankhung pawl khai hmang tuseh.

⁶ Hawngorh angki tu, sui le a mepian, a san, a sannum tuuhmul le pon mankhung le a coihhnak pon in bawn tuseh.

⁷ A kodar ah a penhnak tuhin rite pahnih um tuhai, a sir veve ah pencih tuh i.

⁸ Mawi ngai ai takhnak elpen heh a penhnak rite pahnih thawn peh dun tuhai a bawndan khai bangvek tuh i. Elpen heh sui le a mepian, a san, a sannum tuuhmul le a phiarhnak pon mankhung thotho in bawnhnak i tuh i.

⁹ A mankhung a sanmi lungtote pahnih lang tulai a vumah Jacob ai fapate hlaihnih hming kher in ngan tu ih.

¹⁰ Amahte kum bangin a sangsang in lung mankhung san pakhat ah hming ruk, a dang lungvar san vumah hming ruk kher tuh i si.

¹¹ Lungvar lamai kutzungthiam mi le hming khen thiam mite ai bawnhnak thawn Jacob ai fapate hlaihnih hmingte heh lung mankhung pahnih in kher tu ilai lungmankhung pawl khiah sui in a tlang khap tuh i si.

¹² Israel miphunte hlaihnih hihhnak tuhin songsilh angki ai kodar bathnak rite ai vum ahhen lungvarte bet tuh i si. Ciatihin amahte hming heh Aaron in a kodar ah bet tuh ṭio ai Bawipa in anite tu hih tuh ṭiode i.

¹³ Sui elpente pahnih le

¹⁴ rihual bang ai hualhnak sui rihualte hual hnih bawn tu ilai, sui rihual heh sui elpen ah ngerh tuh i si.

Suangbawi Sang Ai Kangbet

¹⁵ “Cen Pathian daihhnak tintaih tuhin kangbet bawt tuh i si. Songsilh angki ang thotho in a pha bik ai coihhnak tuh i. Sui le a mepian, a sannum, a san tuuhmul le a takhnak pon mankhung in bawn tuh i si.

¹⁶ Zungpui pakua kau le sau, a tung le a vang camra dun tuhai hmun hnih in hlephnak i tuh i.

¹⁷ A vumah lungvar tluan li in bet tuh i si, tluan khathnak ah a san, a mepian le sannum bet tuh i.

¹⁸ A tluan hnihhnak ah a tangphaw, a pawl le daimond lungvar mankhung;

¹⁹ tluan thumhnak ah sannum, a san le a tleumi lungmankhung;

²⁰ tluan lihnak ah a tangphaw, a sannum, a varmi lungto mankhung bet tuh i si. Hemi lungmankhung hmuahhmuah heh sui in a cingkim tuam tuh i si.

²¹ A mankhung lungtote hlaihnih dah tu ilai, Jacob ai fapate hming a vumah khen tu ṭen ih. Ciami amahte hming heh fiang ngai in ngan tu ilai pakhat vumah Israel phun ai hming pakhat ṭen in ngan tu ih.

²² Kangbet hrang rihual bang ai a hualhnak sui ciang in suikhi bawn tuh i si.

²³ Kangbet vum lam hmur veve ah bet tuhin sui rihualte pahnih bawn tuh i si.

²⁴ Ciami sui rihualte pahnih heh suikual pahnih vumah khit tuh i si.

²⁵ Ciami sui rihual ai khat lam hmur pahnih heh lungmankhung bethnak vumah khit tuh i si. Ciatih bangin songsilh angki ai hmai lam kodar bat vumah khit tuh ve i si.

²⁶ Cen suikualte pahnih bawn tu ilai kangbet ai hnia lam hmur, hawngorh sangtu a songlam hmurah sih tu veve ih.

²⁷ A dang suikualte pahnih bawn rih tu ilai hawngorh angki hmai lam kodarbat hnia lamah khit tu ilai a pha bik ai takhnak, elpen ai vumah sih tuh i si.

²⁸ Kangbet ai a kualte tu hawngorh ai a kualte thawn a mepian rihual in pen tuhai ciatihin kangbet heh elpen ai vumah leng luklo loin kep tuh hliang i.

²⁹ “Aaron tu Hmun Thianghlim ah a lut fangin Israel miphunte hming heh a thinhnai ai um thurelcathnak kangbet vumah kher tuh imanin Bawipa kaimah in anite khiah a catloin hih tuh ṭio de ing. Ciami kangbet khiah Aaron lung zawnah um tuh i.

³⁰ Urim le Thummim tihnak lung cianghlim khiah thurelhnak kangbet songah dah tuhai Aaron tu Bawipa hmai a lut fangin a kang ah um tuh i. Ciabang can ah a kangbet khiah sil tuh de ai ciatihin Israel miphun ca i daihsahhnak khiah ling tuh de i.

A Dang Suangbawi Thuamte

³¹ “Songsilh angki pua ai silhnak angkifual pui heh tuuhmul mepian lekin bawn tuh i si.

³² Angkifualpui ai a laiteng ah lu munhnak tuhin a kua bawn tuh i si. Ciami a kua rong cingkim heh savun angki ning bawn bangin a zik thil tuh loin kam tuh i si.

³³ Ciami angki ai a hnia lam hmur heh tuuhmul mepian, a sannum, le a san in tale thai cuangin coih tuh i si. Angki ai a cingkim ah ciatihin coih tu ilai ning coihhnak a karlak ah sui sengserel khaih tuh i si.

³⁴ Ciatih bangin angkifualpui ai a hnia lam hmur a cingkim a veksen in tale thai zuk coihhnak le sui sengserel khaihhnak um tuh sio i.

³⁵ Aaron tu suangbawi na a ruaih cang fangin ciami angki sil tuh ṭiode i. Bawipa ai mithmuh hmun thianghlim songah a lut le a suak leh fangin sengserel pau selso heh za thil tuhai Aaron heh thiruai tuh lo i.

³⁶ “Sui ciang ai bawnhnak calbet bawn tuhai a vumah, ‘Bawipa ca a thianghlimmi,’ tiin ngan tuh i si.

³⁷ Ciami calbet heh lupawng hmai lamah mepian thiamri in khaih tuh i si.

³⁸ Aaron in a cal ah bet tuhai, ciatih bangin Israel mite in Bawipa hnenai a pehnak vumah sawihnak um tuh lo i. Amahte pehnakte khai Bawipa ai sangtlak tuhin ciami calbet heh Aaron in a cal ah bet tuh ṭiode i.

³⁹ “Thiamfung thawn Aaron angki le lupawng tak tu ilai a elpen heh a coihhnak pon mankhung in tak tuh i si.

⁴⁰ Aaron ai fapate ca mawihnak le mitsih mawi co tuhin angki, elpen le lukhukte khai bawn sah tuh i si.

⁴¹ Ciami hnikponte heh Aaron le a fapate silruai tu ih. Ciaben fangin i naruaihtu suangbawi cang tuhin pumpehnak le Pathian hnenah aphnak thawn sathau pawh tu ilai ciatihin suangbawi ah cang tuh i.

⁴² Amahte taksa dak thai tuh loin amahte el le kawng huphnak tuhin bongbi com khui sah tuh i si.

⁴³ Aaron le a fapate suangbawi na ruaih tuhin Hmun Thianghlim songah a lut fangin ituseh, taikhawmhnak hlam songai puleng hamah kawi fang ituseh, amahte zahmawh dak tuh loin le thiruai lohnak tuhin ciami bongbi com khiah feng tuh de i. Hemi tu Aaron le a tesinfate ca a zomzet in hlun tuhhnak dan i.