Suahhlannak 22 - Zanniat Bible

Cawhkuan Dante

¹ Mi pakhat in kawlpawcang ihlahle tuu ru ai ro i, ihlahle zuar lekhaw, kawlpawcang lu khat ca kawlpawcang lu nga le tuu lu khat ca tuu lu li in kuan tuseh.

^2-4 Ciatihin a ru man heh kuan tu hrimhrim seh. Zaikhai nai hlah lekhaw a ruhnak kuan tuhin ani tu zuar tuseh. Ikhalselai a ruhnak kawlpawcang, ihlahle laak, ihlahle tuu heh a hnenah a nung in hmu lekhaw a let hnih in kuan tuseh. “Ruko pakhat in zan ah inn bal ai pom ngah ai rek lekhaw a rektu heh mirek ilo i. Ikhalselai nisuak hnuaah rek lekhaw mirek i.

⁵ “Mi pakhat in lo ah ituseh, cabit vuandum ah ituseh a sumhnamte hampa airuai laiah a ri pilh in midang lo ai rong ai sio lekhaw sumhnam naitu pa in a lo pha ber ihlahle a cabit vuandum a pha ber in kuan tuseh.

⁶ “Mi pakhat in mai tai ai hampa khai a kang hnuaah a khawl cia rongte ihlahle rongkung ihlahle lo songai birhnak thingkungte kang sek lekhaw maitaitu in a siatsuahhnak hmuahhmuah kuan tuseh.

⁷ “Mi pakhat in midang hnenah tangka ituseh, a dang thil mankhung ituseh dahruai ai mi in ru sah ai a rutu pom ngah lekhaw a let hnih in kuan tuseh.

⁸ Cen a rutu pom ngah hlah lekhaw a dahhnak pa in a rual pa ai thilri a ru lo khiah phuang tuhai Pathian hmaiah siatti ding tuseh.

⁹ “Mi pahnih thil cuh dun ai kawlpawcang ituseh laak le tuu ituseh, hnikpon ihlahle a paimi thildang pakhatkhat kaimah ai i ti kawm veve lekhaw amahte thu heh Pathian hmaiah suahpui tuh i. Pathian in mawh a pehnak in a let hnih in kuan tuseh.

¹⁰ “Mi pakhat in midang pakhat hnenah laak, kawlpaw, tuu, ihlahle sumhnam pakhatkhat kilkhawlruai ai, a sumhnam heh thi, ihlahle tuahmawh ngah, ihlahle ruko in tlanpui ai aisu inkhai a hmutu um hlah lekhaw,

¹¹ Bawipa hmaiah cukcam in a rualpui ai sumhnam lang le lang lo hliah tuseh. Ruko in ru ihlah lekhaw a kilkhawltu in kuan maseh. A naitu sung tuseh.

¹² Ikhalselai ciami sumhnam heh ru lekhaw a kilkhawltu in kuan tuseh.

¹³ Sahrang in dawp lekhaw sa val khiah a lingpui hrangah tlun tuseh. Sahrang ai dawphnak tu kuan kul tuh lo i.

¹⁴ “Mi pakhat in midang ai sumhnam zawng ai a naitu um lo songah thi i, ihlahle tuahmawh lekhaw a zawngtu in kuan tuseh.

¹⁵ Ikhalselai a naitu pa um lekhaw kuan kul lo i. Man nai ai zawng ilekhaw a zawng man a khimniu in pe tuseh.

Ziaza Le Biakhnak Lam Dan

¹⁶ “Fenu him mi ai thawlthan hlan, mi pakhat in zawl in sualpui lekhaw a man hmuahhmuah pe tuh sio ai hoi tuseh.

¹⁷ Ikhalselai a hoi tuh heh fenu nu ai pa in lungkhim hlah lekhaw fenu nu ai a manzah heh tangka in pe tu thotho seh.

¹⁸ “Dawithiam nupang tu a nung in zuah tuh lo i si.

¹⁹ “Ramsa sualpuitute heh rek tuh i si.

²⁰ “Bawipa Pathian hnen siarlo, a dang khuavang hnenah hibawlhnak a seltu heh rek tuh i si.

²¹ “Ramdangmi mikhual heh hnawmcan tuh lo ai rimsuruai tuh lo i si. Zaimantifangin ningmah khai Egypt ramah mikhual awng ve i si.

²² Hmaitong ituseh, nupa nai lo farah ituseh, zohsuam tuh lo i si.

²³ Zohsuam le i sikhaw bawmhnak ngen in i hnenah au tlang lekhaw amahte awka ngai sah tuhai,

²⁴ I thinrawhnak heh maikang bangin ko tuhai, raltawng hmunah ralvang in ning rek tuh ing. Ning nupuite heh hmaitong ah cang tuh ve ai, ning fate khai pa nai lo farah ah cang tuh ve i.

²⁵ “Ningmah in i minungte lakai mifarah hnenah tangka ning put fangin tangka puttute in a bawn de bangin bawn mah ilai tangka khang lang sah tuh lo i si.

²⁶ Na rulhnak tuhin thukhamhnak ah silhpon lang sah le i sikhaw nitla hlanah san leh tuh tengteng i si.

²⁷ Zaimantifangin a silh tuh heh ciami niu lek i. Ciahlahle ziang sil tuh i? Bawmhnak ngen in i hnenah au lekhaw a aw ngai sah tuh ing; zaimantifangin kai tu mi ninghio thai ing.

²⁸ “Pathian thangsiat tuh lo ai ning miphun hotute khai siatcam tuh lo i si.

²⁹ Ning rong, ning cabitti le ning olive thaute heh i hnenah pe tuhin hnuakfual tuh lo i si. “Ning fapa upa ber heh i hnenah i pe tuh i si.

³⁰ Ning kawlpaw ituseh, ning tuu ituseh, a te hmasaber heh i hnenah i pe tuh i si. A fa upa ber heh a nu hnenah ni sarih um tuhai, ni riat nia ah i hnenah i pe tuh i si.

³¹ “Ningmah heh kaimah ca minung i tuh i si; ciamanin sahrang ai dawp sa ramsa heh ai tuh lo i si. Uico paih tuh sawn i si.