Suahhlannak 16 - Zanniat Bible

Manna Sang Le Vahnimte

¹ Israel mite miburpui tu Elim in suak tlang ai, Egypt ram songai a suak hnua Hla hnihhnak ni hlainga nia ah Elim le Sinai karlak ai umhnak Sin nelrawn ramkhing ah hleng tlang i.

² Cen ciami nelrawn ramkhing ah anite veksen in Moses le Aaron vumah cam tlang murhmo ai,

³ Egypt ramah Bawipa in kin rek berh ta sawn selai kin hiam sawn i! Egypt ramah sa dai kim in rong kin duhzah ai i ing. Ikhalselai ningmah in kin suakpui ai heta nelrawn ramkhing ah rikam in kin thiruai tuh sek ihang i sim,” tiin ti tlang i.

⁴ Ciafangin Bawipa in Moses hnenah, “Tunin ning veksen ca van in ruah bangin sang khiah siruai tuh ing. Israel mite tu nisiar in amahte riahbuk in suak tuhai cia nia hrang tham in sang khiah khul tlang tu de seh. Ciatihin i thupeciahnak hlun le hlun lo cu tuh ing.

⁵ Ni rukhnak nia ah ni dang ai a khulhnak de a let hnih tam in khul tu selai ai tuhin khawi tuseh,” tiin ti i.

⁶ Ciamanin Moses le Aaron in Israel mite a veksen hnenah, “Tun zan zan lam Egypt ram an kin suahtu khiah Bawipa i ti ling tuh i si.

⁷ Cen zing lamah Bawipa ai songlawihnak hmu tuh i si. A vumah ning phuncam murhmo za zo i. I! Bawipa vumah cam tlang i si, zaimantifangin kin tu cam tlak khai ilo i ing?” tiin ti i.

⁸ Cen Moses in, “Zan lam aih tuhin sa ning petu tuh le zing lam aih tuhin ning duhzah sang ning petu tuh heh Bawipa i. Zaimantifangin vel tampui a vumah ning phuncamhnak za zo i. Kin bang rongra tu ziang titlak khai ihlah ing! Ning phuncamhnak tu kin vumah ilo i; Bawipa vum sawn ah i,” tiin ti i.

⁹ Moses in Aaron hnenah, “Israel mite a veksen hnenah, ‘Kawi tu ilai Bawipa ai hmaiah ding tu ih; zaimantifangin ning phuncamhnak za zo i,’ tiin rel tu,” tiin ti i.

¹⁰ Amahte veksen hnenah Aaron a pong sawng fangin nelrawn lamah hoi tlang ai cia sawngpah Bawipa songlawihnak tleu mairo vumah lar i.

¹¹ Ciafangin Bawipa in Moses hnenah,

¹² “Israel mite phuncam murhmo za zo ing; amahte hnenah, ‘Zan lam nitla sawng fangin aih tuh sa ngah tuhai zing lamah ning duhzah rong ngah tuh i si. Ciafangin Bawipa kaimah heh Pathian ing ti khiah ling tuh i si,’ tiin rel tu,” tiin ti i.

¹³ Cen zan lamah vahnim tampui hleng bialbo ai Israel mite riahbuk pumpalah ah dim sio i. Zing lamah riahbuk cingkim ah nai a sah roh in tla i.

¹⁴ Ciami nai ro fangin nelrawn laipua vumah thil phunkhat, a padiar ai a bek ngai, vur khal padiar bang khiah laipua lakah um bial i.

¹⁵ Ciami heh Israel mite in hmu fangin ziang i ti ling loin pakhat le pakhat, “Hemi tu ziang ini?” tiin zawt dun tlang murhmo i. Ciafangin Moses in, “Hemi tu Bawipa in aih tuhin sang amah in ning pehnak i.

¹⁶ Bawipa ai thupeciahnak bangin ningmah hlanlam ning kulzah rut tu ilai mi pakhat ca khuat li ian rut tu ih. Mi pakhat in a riahbuk songai umtu veksen ca a kulzah ian lang tu ih,” ti i.

¹⁷ Israel mite in Moses ai relhnak bangin bawn tlang i; mi hrekkhat in tam deuh rut tlang ai mi hrekkhat in tlawm deuh rut i.

¹⁸ Ikhalselai a teh fangin a tam deuh a ruttute in tampui nai cuang lo ai a tlawm deuh a ruttute inkhai, tlawm deuh nai cuang lo i. A ruttu hmuahhmuah in amahte kulzah ngaingai ṭen lek rut i.

¹⁹ Ciafangin Moses in, “Aisu inkhai thangha hrang tiin dah mah ih,” tiin ti i.

²⁰ Ikhalselai mi hrekkhat tu Moses thu ngai nuam loin sang tlawmniu khiah thangha hrang tiin dah i. A thangha fangin uih sek ai zang in dim manin uih roh i. Ciafangin Moses tu anite vumah a thinraw i.

²¹ Israel mite in zingsiar in amahte kulzah ian rut tlang de i; Ikhalselai sun ah ni sa fangin laipua vumai a tanghnak tu zul sek de i.

²² Nirukhnak nia fangin rong khiah a let hnih tam in minung pakhat ca khuat riat ṭen in rut tlang de i. Israel mite konghoitute kawi ai cia thu heh Moses hnenah rel tlang i.

²³ Ciafangin Moses in, “Hemi tu Bawipa ai thupeciahnak i, ‘Thangha tu cawlum nia, Bawipa ca a thianghlim Sabbath nia i. Em ning hiam lekhaw em tu ilai, a suang ning nuamhnak tunin suang tu ih. Ning valhnak hmuahhmuah a dangniu in khawi tu ilai thangha hrang dah tu ih,’ ti i,” tiin ti i.

²⁴ Cen Moses ai relhnak bangin a valhnak tu a thangha tian dah ai uih hrimhrim lo i, zang khai um lo i.

²⁵ Ciafangin Moses in, “Hemi tu tunnia ai tu ih; zaimantifangin tunnia tu Bawipa ai Sabbath nia imanin sumpua lamah zaikhai tawk tuh lo i si.

²⁶ Niruk song rut tuh i si, ikhalselai ni sarih nia fangin Sabbath nia imanin, zaikhai um tuh lo i,” tiin ti i.

²⁷ Ikhalselai mi hrekkhat tu rong si tuhin sumpua lamah suak in si thotho napui tawk tlang lo i.

²⁸ Ciafangin Bawipa in Moses hnenah, “Zaicam tian i thupehnak le i dante hlun nuam loin um tuh i si?

²⁹ Sabbath ning bawnsahtu heh Bawipa kaimah ing ti khiah ling tu ih. Ciamanin ni hnih hrang a tham in ni ruk nia ah rong ning pe ing. Ni sarih nia tu aisusu inkhai mah umhnak ṭen ah um tuhhnak i. ningmah umhnak ah um tu hlen ih. Aisu khai mah inn in suak tuh lo i si,” tiin ti i.

³⁰ Ciamanin ni sarih nia ah Israel mite tu cawlum tlang i.

³¹ Israel mite in ciami rong heh manna tiin ko i. Manna tu hlaici ngo bang i. A ngo i ai a urdan tu khoitizu roihhnak sangper ang i.

³² Cen Moses in “Bawipa ai thupehnak tu hetihin i, ‘Manna sang heh dawng pakhat songah dah tu ih. Egypt ram an ning suakruai ai nelrawn songah ning vak laiah ning aih tuhin i pehnak rong i, tiin ning tesinfate hmu thil tuhin phaniu in khawi tu ih,’ ti i,’ tiin Israel mizapui hnenah ti i.

³³ Cen Moses in Aaron hnenah, “Bel pakhat lang tulai manna sang khuat li a songah thun tu; na tesinfate ca Bawipa hmaiah dah tu,” tiin ti i.

³⁴ Bawipa in Moses hnenah thu a pehnak bangin Aaron in bawn ai thukham dahhnak kuang hmaiah a himhnak tuhin dah i.

³⁵ Israel mite in Canaan ram a hleng hlan, kum sawmli song tu manna ai tlang i. Manna tu amahte umhnak khurhnak Canaan ram a hleng tianin ai tlang i.

³⁶ (Omer pakhat tu Ephah pakhat ai seu hra seu khat i).