Suahhlannak 11 - Zanniat Bible

Fa Upaber Thihhnak Thuphuang

¹ Bawipa in Moses hnenah, “Pharoah le Egypt mi hnenah cawhhnak pakhat lek hlengruai tuh ihang ing. Cia hnuaah ning fehruai tuh ihang. A ngaingai in, ning hlat fangin he ram an a hnawt in ning hnawt tuh taito ngawn i.

² Ciamanin Israel mite hnenah rel tu: nupang inkhai pasal inkhai a ompuite heh hlawnthil sui le ngun ngen tu ṭen seh,” tiin ti i.

³ Bawipa in bawn manin Egypt mite in Israel mite heh upat ai, Moses khai tlangsuakte in ituseh mizapui in ituseh mi songlawi bik in ruat tlang i.

⁴ Moses in Pharoah hnenah, “Bawipa ai ponkam tu hetihin i: ‘Seulai fangin Egypt mite hnenah feh tuhai;

⁵ Egypt ram songai fapa upa ber hmuahhmuah, kumpibawi rocotu tuh Pharoah ai fapa upa ber ai panin fangrialhnak ai napertu sal nu ai fapa upa ber tianin thi tuh sek i. Ramsa hmuahhmuah ai fa upa ber khai thi tuh sek i.

⁶ Tun hlanah khai um awng lo ai kin hmai lam ahkhai um tuh nawn lo kap le aihnak heh Egypt ram songah dim tuh i.

⁷ Ikhalselai Bawipa in Egypt mite le Israel mite tu hlaihdan tuh i, ti ning linghnak tuhin Israel mite tu uico pakhat bang inkhai, ramsa ituseh minung ituseh, bo tuh lo i,’ ti i.

⁸ Ciafangin na kuthnia tlangsuakte hmuahhmuah i hnenah kawi tuhai, amahte lu ut in, ‘Feh tu ih; nangmah le na minungte feh tu hram hang ih,’ ti tlang tuh i. Ciafangin feh tuh ing,” tiin ti i. Cen Moses tu a thinraw roh kongin Pharoah khiah hlum i.

⁹ Moses hnenah Bawipa in, “Egypt ram songai ngaihsunurkul tam deuh i bawn thil tuhin Pharoah in na thu ngai tuh lo i,” tiin ti i.

¹⁰ Moses le Aaron in Pharoah ai hmaiah ngaihsunurkul hezah bawn zo i. Ikhalselai Pharoah ai thinlung tu Bawipa in ruhruai ai Israel mite in a ram hlum tuh heh siang hrimhrim lo i.