Suahhlannak 10 - Zanniat Bible

Khokhuak

¹ Bawipa in Moses hnenah, “Pharoah hnenah feh tu. Hetluk ngaihsunurkul i bawn tuhhnak ah amah le a kuthnia tlangsuakte ai thinlung ruhruai zo ing.

² Amahte lakah hetluk ngaihsunurkul bawn ai Egypt mite khiah hnihsa menma ai i hmang heh ning tu le ning fate hnenah rel tuh hrang i. Bawipa ing ti khiah ning veksen in ling tuh i si,” tiin ti i.

³ Ciamanin Moses le Aaron tu Pharoah hnenah kawi kawm ai a hnenah, “Hebrew mite ai Pathian, Bawipa in a relhnak tu: ‘I hmaiah zaicam tian thinnem hniatacuh nuam loin um tuh isi? Kaimah i bia thil tuhin i minungte feh tuseh.

⁴ I minungte hlat tuhin el thotho lesikhaw thangha ah na ram songah khokhuak hlat tuh ing.

⁵ Khokhuak tam tuh ze ai laipua a tlawmniu khai lar loin khuk tuh mimmum i. Rial ai a siatsuah lomi thil hmuahhmuah ai tlang tuh sek ai na ramsong ai thingkung hmuahhmuah ai tuh sek i.

⁶ Cia lek zolo in na kumpibawi inn, na kuthnia tlangsuakte ai inn le na minungte hmuahhmuah ai inn khai dim tuh sio i. Na nu le na pate le ning sentute he ram a hleng tlang ai panin amahte tawk awng kel lo thil siava i tuh i,’ ti i,” tiin ti i. Cen a khelher ai Pharoah hnenin suak i.

⁷ Ciafangin Pharoah ai kuthnia tlangsuakte in, “Zaicam tian he pa in hnaihnokhnak kin pe tuh ini? Bawipa amahte Pathian bia thil tuhin pasalte feh tu ngawn hang seh. Zaimantifangin Egypt ram hnawm zo heh hmu lo isim?” tiin Pharoah khiah ti tlang i.

⁸ Ciafangin Moses le Aaron khai ko lehsal ai Pharoah in anite hnenah, “Feh in ning Bawipa ning Pathian bia tuhang ih! Ikhalselai aisute feh tuh i si?” ti i.

⁹ Cen Moses in, “Kin veksen in feh tuh i ing; kin naupang le kin nutar le kin patarte khai tel tuh i. Kin fapa kin fanu, kin tuu le kin me le kin kawlpawte thawn feh tuh i ing, zaimantifangin Bawipa caah hibawlhnak puai bawn tuh i ing,” tiin ti i.

¹⁰ Ciafangin Pharoah in anite hnenah, “Pha i, Bawipa in ning bawm tuseh! Ikhalselai ning fate le ning nupangte tu fehpui mah ih. Kin ca harsahnak suakruai tuhin i engsan thliahthlo i si, ti fiang i.

¹¹ Anite feh lamlam maseh! Pasalte lek feh tu ilai Bawipa bia tu ih. Ning ngenhnak tu ciami heh in,” tiin ti i. Ciafangin Pharoah hnenin anite heh a hnawt in hnawt i.

¹² Ciafangin Bawipa in Moses hnenah, “Egypt ram songah khokhuak hleng thai tuhin na kut pharh tu. Thingkung hampa a nungmi hmuahhmuah rial ai siatsuah lohnak hmuahhmuah ai tuh sek i,” tiin ti i.

¹³ Ciamanin Moses in a faikiang dang ai Bawipa in nisuah lamin hlivua zuangruai ai sunnivui le zankhuavar in zuang i. Zing lamah hlivua in khokhuakte khiah zuanpui diamdo i.

¹⁴ Egypt ram khua cangcang ah hleng ai a ram pumpuhluk in dim i. Khokhuakte tu a tam ze ai ciabang hmu awng kel lo i. Hmai lam ahkhai ciabang hmu tuh nawn lo ihang.

¹⁵ Lai dak loin khuk sio ai a khuk ze in a thim in thim mimmum i. Rial ai siatsuah lohnak thingkung hamkung le thingthai hmuahhmuah ai tlang sio i. Egypt ram song hmuahhmuah ah thingkung le hampa vumah hnah hing pakhat khai tang nawn lo i.

¹⁶ Ciafangin Pharoah in Moses le Aaron heh a rangrang in ko ai, “Bawipa ning Pathian hmai le ningmah hmaiah i sual zo i.

¹⁷ Ciamanin tunai vel khat tu sual i zah tu ilai he ning pehnak a laukul cawhkuan heh i hnenin lang leh tuhin, Bawipa ning Pathian hnenah i ngen sah tu hram ih,” tiin ti i.

¹⁸ Cen Pharoah hnenin Moses heh suak ai Bawipa hnenah sawngen i.

¹⁹ Ciafangin Bawipa in nisuah lam hlivua khiah nitlak lam khuahu roh ngai ah cang ai cia hlivua in khokhuakte tu Tipui San songah hla sek i. Egypt ram pumpuhluk ah Khokhuak pakhat khai tang nawn lo i.

²⁰ Ikhalselai Pharoah ai thinlung tu Bawipa in ruhruai thotho manin Israel mite tu fehruai nuam cuang lo i.

Khuathimpui

²¹ Bawipa in Moses hnenah, “A sah ze manin a pel kul a dai thai khuathimpui in Egypt ram song khuk tuh sio in na ban van ah pharh tu,” tiin ti i.

²² Ciamanin Moses in a ban van ah pharh ai Egypt ram khuathimpui sah bol in ni thum song khuk mial i.

²³ Ciatihin khua a thim manin Egypt mite tu pakhat le pakhat hmu dun thil lo ai ni thum song aisu khai sumpua suak thil lo i. Ikhalselai Israel mite umhnak ahcen khua var hlen i.

²⁴ Pharoah in Moses ko ai a hnenah, “Bawipa bia tuhin feh tu ih. Ning nupangte le ning naupangte khai ning hnenah feh tu ve seh. Ikhalselai ning tuu, ning me le ning kawlpawte ngawn hlum tu ih,” tiin ti i.

²⁵ Cen Moses in, “Bawipa kin Pathian hnenah maitai hibawlhnak le hibawlhnak a dangdang hrang a kulhnak sumhnamte tu nangmah in kin ruat sah na kul tuh i.

²⁶ Ciamanin kin sumhnamte tu kinmah thawn feh kul tuh sio i; pakhat khai hlum thil tuh lo i ing. Bawipa kin Pathian biahnak in hmang tuhhnak sumhnam heh ril tuhai a hmun kin hleng hlanah kinmah inkhai Bawipa kin biahnak ah akon ber hmang tuh i ing ti ling lai lo i ing,” tiin ti i.

²⁷ Ikhalselai Pharoah ai thinlung tu Bawipa in ruhruai manin Israel mite heh feh siang thotho lo i.

²⁸ Ciafangin Pharoah in Moses hnenah, “I hmuh ban lo hmunah tlan tu. I mithmuh ah um tuh nawn loin ralring tu, zaimantifangin na hmu leh citcet lengkhaw cia nia heh na thi nia tuh i,” tiin ti i.

²⁹ Cen Moses in, “Na tihnak bangin ituseh. Zaikom inkhai i hmai hmu tuh lo ihang si,” tiin ti i.