Seemthawhnak 9 - Zanniat Bible

Noah Hnenai Pathian Thutiam

¹ Cen Pathian in Noah le a fapate heh hmuifu pe ai anite hnenah, “Fa tampui nai in pungzai tu ilai; laivum pumpuhluk ah ning tesinfate dim tuseh.

² Laivum ai umtu ramsa hinkhim, vaniute le ngate, le laipua vumai a vak thai a cik ber pawl ramsate tianin ningmah ning kih tuh i. Anite tu na kuthnia ah dah sio ing.

³ Cen ramsa a nungmi hmuahhmuah le hnahhing rongkungte ai tuh i si; ning rong hrangah ning pe ing.

⁴ Ikhalselai a sa songah a thisan a um laiah ai tuh lo i si. Zaimantifangin thisan tu nunhnak i.

⁵ Cen mi a rektu in rek tuar tuh ve i, mi a siatsuahtu ramsa in siatsuah tuar tuh ve i.

⁶ Mi a rektu heh mi kut in thi tuh ve i; Zaimantifangin minung tu Pathian in amah bangin bawn i.

⁷ Cen fa tampui nai tuhai ning tesinfate tu laivum ah dim in pungzai tuh i,” tiin ti i.

⁸ Cia hnuaah Pathian in Noah le a fapate hnenah,

⁹ “Tunin ningmah thawn thutiamhnak ing; ning tesinfate hnenah ituseh,

¹⁰ ningmah thawn lawng songin a suaktu ramsa hmuahhmuah, vaniu le, innzuat sumhnam le hampalak ramsate a veksen hnenah ituseh,

¹¹ thutiamhnak bawn ing; zaikom inkhai laivum ai nunhnak a naimi hmuahhmuah tilawi in cimpil tuh nawn lo i. Tilawi in laipua heh siatsuah tuh nawn lo ihang, tiin thu ning tiam ing,” tiin ti i.

¹² Cen Pathian in, “Nangmah le na hnenai a ummi ramsa hmuahhmuah hnenah i thutiam kumzangza hrang hnikhnaihhnak ah,

¹³ Mairo vumah bak kairuai ing. I thutiam lingruaihnak cang tuh i.

¹⁴ laivum ah mairo a zam cang fangin Mairo vumah bak hmu tuh i si.

¹⁵ Laivum ai nunhnak a naimi hmuahhmuah tilawi in siatsuah tuh nawn loin nangmah le ramsa miangmo hnenai i thukhamhnak hih tuh ngio ing.

¹⁶ Kaimah le laivum ai nunhnak a naimi hmuahhmuah lakah kumzangza i thutiam khiah mairo vumai bak a kai cang fangin hih tuh ngiode ing,” tiin ti i.

¹⁷ Cen Noah hnenah Pathian in, “Hemi tu laipua vumai nunhnak a naimi hmuahhmuah hnenah i thukham hnikhnaihhnak i,” tiin ti i.

Noah Le A Fapate

¹⁸ Lawng songin a suaktu Noah ai fapate tu Shem, Ham le Japhet i. Ham tu Canaan ai pa i.

¹⁹ Hemi Noah ai fapate pathum tu laivum ai umtu minung zongzong a sentute i.

²⁰ Noah tu lovai mi i ai a hmasaber cabit vuandum bawntu i.

²¹ Vaikhat ah cabitti ding ben fangin a ri ze manin kawngkolh in a hlam songah mitmu i.

²² Ciami heh Canaan ai pa Ham in hmu fangin a unaute pahnih hnenah rel i.

²³ Cen Shem le Japhet in pon lang kawm ai amahte kodar hnuaah zar ai a pa kawngkolh ai umhnak sik ngam loin khellet lamin hlam songah kawi kawm ai a pa heh amahte pon kenghnak in khuk kawm i. Hmundang her manin a pa kawngkolh ai um heh hmu kawm lo i.

²⁴ Noah cabit ri lawm ai a phawk hnua a fapa nauta ber in a vumai bawnhnak thu a ling fangin,

²⁵ “Canaan tu cukcam tuar tuseh; a unaute ai sal cang tuseh!

²⁶ Shem ai Pathian tu thangphat in um tuseh, Canaan tu Shem ai sal cang tuseh!

²⁷ Pathian in Japhet tu pungzairuai tuseh, A tefate tu Shem ai minungte thawn um tlang tuseh; Canaan tu Japhet sal ah cang tuseh!” tiin ti i.

²⁸ Tilawi khelleh ah Noah tu kum za thum le sawmnga nung ai,

²⁹ kum za kua le sawmnga fangin thi i.