Seemthawhnak 8 - Zanniat Bible

Tilawi Kanghnak

¹ Pathian in Noah le amah thawn lawng songai a umtu ramsa hinkhim hmuahhmuah heh hih hlen i. Ciamanin laipua vumah hlivua zuangruai ai ti khiah kang betbo i.

² Lai hnia ai tipui in tilu phulhnak le vancung dawngkham hmuah pit leh sek i. Vanruah khai hang ai,

³ ti kang leh rianro i. Ni za le sawmnga hnua fangin ti niam deuhdeuh ai,

⁴ hla sarihhnak ni hlaisarih nia ah, lawng heh Ararat mual vumah tang i.

⁵ Tilawi kang rianro ai hla hrahnak ni khat nia fangin mual phundir pawl dak i.

⁶ Ni sawmli hnuaah Noah in lawng tukvirh hong ai,

⁷ langak pakhat hlat i. Langak tu let lo i, laivum ai tilawi a kang sek hlan lo rong le ra in zuang i.

⁸ Cen Noah in tilawi kang na hang maw ti ling nuam manin khuro pakhat hlat i.

⁹ Ikhalselai tilawi in laivum khuk lai hlen thotho manin khuro in a khop hmun tuh tawk thil lo i. Ciamanin Noah in a kut suah ai khuro heh lawng songah khum i.

¹⁰ Ni sarih a iang hnuaah khuro hlat lehthio i.

¹¹ Cia zan lam fangin khuro let ai a kahmur ah olive thinghnah hing a thiar khiah Noah in hmu i. Ciafangin ti kang ngaingai zo ihang tiin Noah in ling i.

¹² Cen Noah in ni sarih iang ai ciami khuro hlat lala i. Ciami khuro tu let nawn lo i.

¹³ Noah kum zaruk le kum khat a khim kum, hla hmasaber, ni khathnak nia ah laipua vumah ti kang sio ihang. A lawng khukhnak hong ai a sik fangin laipua ro sio hmu i.

¹⁴ A hla hnihhnak, ni kul hluansarih nia ah laipua ro ngah sio i.

¹⁵ Ciafangin Pathian in Noah hnenah,

¹⁶ “Na nupui, na fapate le a nupuite thawn lawng songin suak tu ih.

¹⁷ Ramsa hmuahhmuah, vaniu, innzuat sumhnam le a vak thai hmuahhmuah tianin fehpui tusek lai laivum ah cizai in pungzai tuseh,” tiin ti i.

¹⁸ Ciatihin Noah tu a nupui le a fapate le amahte nupuite thawn lawng songin suak tlang i.

¹⁹ Cen hampalak ramsa ituseh, innzuat sumhnam ituseh, vaniu le a vak thai hmuahhmuah tianin, amahte phun ṭen a burbur in lawng songin suak tlang i.

Noah In Hibawlhnak Sel I

²⁰ Cen Noah in Bawipa ca puleng tiang ai a cianghlim ramsa le vaniu khai phunkhat in pakhat ṭen pom ai mai puleng vumah Pathian ca maitai hibawlhnak sel i.

²¹ Noah ai selhnak rimhmui heh Bawipa in a hnim fangin a thinlung in, “Minung ai thil bawnhnak manin laivum khiah cukcam tuh nawn lo ing. Minung tu a dawn lai in phat lohnak lek ruat i ti ling ing. Ikhalselai tunai bangin zaikom inkhai a nung mite cimpil tuh nawn lo ing.

²² Lailung a him song hmuahhmuah, Hlaici pawi camcu le rongkhawm camcu um tuh i; Khuasik le khualum, khuafur le khuakhal camcu um tuh i, Sun le zan um tuhai, Zaikom inkhai bo tuh nawn lo i,” tiin ti i.