Seemthawhnak 50 - Zanniat Bible

¹ Ciafangin Joseph in a pa luang heh kuah ai a kap kongin thut i.

² Cen a kuthnia a napertu sibawite tu a pa luang hnawm thai tuh loin thingham thau matruai ai a ruaihnak bangin thau mat tlang i.

³ Mithi luang hmon thai tuh loin a bawn fangin a rai de bangin ni sawmli song rai i. Cen Egypt mite in Jacob khiah ni sawmsarih song kah tlang i.

⁴ A pa kahhnak ni khel fangin, Joseph in Pharoah ai tlangsuakte hnenah, “Ning i hio le i sikhaw Pharoah hnenah i rel sah tu ih;

⁵ ‘I pa a thi hlanniu ah Canaan ramah amah ca ai a co awnghnak hlankua songah kaimah in vui tuhin thukhamhnak i bawnruai ai thukham awng ing. Ciamanin i pa phum tuhin i hlat siang tu. A rang ngai in let tuh ing,’ tiin i rel sah tu ih,” tiin ti i.

⁶ Cen Pharoah in, “Na thukham bangin a phum tuhin feh tu,” tiin thu khirh i.

⁷ Ciamanin Joseph tu a pa phum tuhin feh i. Pharoah kuthnia tlangsuak bawi hmuahhmuah, a innsang ai miupate deuh le Egypt ram songai bawi upate le a pa songkhatte inkhai Joseph hlun tlang i.

⁸ Joseph ai innsang a veksen le a unaute le a pa songkhatte khai feh tlang sio i. A naupangte le tuu, me le kawlpawte lek Goshen ramah tang tlang i.

⁹ siphuhleng in ituseh, siphuh vuman ituseh feh ai mi tampui i.

¹⁰ Jordan runpui in nisuah lamai um Atad fangcil hmun tualrawn hleng fangin mithi vui pumkhawm bawn tlang i. Cen Joseph in a pa ca lungsia zunngaihnak ni sarih bawn i.

¹¹ Cia ram Canaan mite in Atad fangcil hmun tualrawn ai lungsiadan lianpui bawn hmu fangin, “Egypt mite in mithi ngaihnak lianpui bawn i,” tiin ti tlang i. Ciamanin cia hmun heh a hming ah Abel Mizraim tiin ko ai Jordan runpui nisuah lamah um i.

¹² Ciatihin Jacob thucahhnak bangin a fapate in bawn tlang i.

¹³ Canaan ramah a luang heh phur ai Hit miphun Epharon hnenah hlanmual hrang Abraham ai lai awnghnak ram, Mamre in nisuah lam Makpelah ai um lungkhukua songah phum tlang i.

¹⁴ A pa vui ben hnuaah Joseph tu a unaute le a pa vui tuhai a fehtute hmuahhmuah thawn Egypt ramah tlung leh i.

Joseph In A Unaute Thinnuamruai I

¹⁵ Amahte pa thi hnuaah Joseph unaute in, “Joseph in kin hua ziar lai in a vumai harsahnak kin hlengruaihnak hmuahhmuah manin kin lehrul thun tum selai akontih in ti tuh ising,” tiin ti dun ai thinlau tlang roh i.

¹⁶ Ciamanin Joseph hnenah mi hlat ai, “Na pa in a thi hlanah thu kin cah awng i:

¹⁷ ‘Joseph hnenah rel leh tu ih, thilpha lo na vumah na unaute bawnsualhnak awng le phatlohnak heh ngaithiam tuseh,’ na ti i. Ciamanin kinmah na pa ai Pathian ai salpate heh kin ngaithiam tu” tiin thu kin cah i. Cia thu a rel ngah fangin Joseph heh kap i.

¹⁸ Cen a unaute kawi ai a hmaiah lu ut kongin, “Na hmaiah na sal kin cang zo ihang,” tiin ti tlang i.

¹⁹ Ikhalselai Joseph in, “Lau mah ih, Pathian aiawhtu ilo ing.

²⁰ Kaimah siatsuah tuhin khua ruat awng i si, ikhalselai Pathian cenin thilpha cangruai i. Ciatihin tunnia kin hmu bangin mi tampui himhnak hrang i.

²¹ Ciamanin ning thinlau mah ih. Ningmah ituseh ning fate ituseh, ning cawm tuh ing,” tiin ti i. Ciatihin Joseph in awka hlum niu in hnem manin thin nuam tlang i.

Joseph Thihnak

²² Joseph tu Egypt ramah a pa innsangte thawn um ai kum za le kum hra a khim fangin thi i.

²³ A thi hlanah Epharaim ai fate suan thum tianin hmu man i. Manasseh ai fapa Machir in fate a nai fangin Joseph in amah songkhat in siar i.

²⁴ Cen a unaute hnenah, “I thi tuh ihang. Ikhalselai Pathian in ning kilkhawl tuhai he ram an ning suah tuh i; Abraham, Isaac le Jacob hnenai a thukham cia ramah ning hoi tuh tengteng i,” tiin ti i.

²⁵ Cen Joseph in Israel ai fate tu cukcam in thukhamruai ai, “Pathian in ning hoi can hleng ai he ram an ning suah fangin i ruh lang tu ilai i fehpui tu ih,” tiin ti i.

²⁶ Ciatihin Joseph tu a kum za le kum hra fangin Egypt ramah thi i. Hmon thil tuh loin sathau mat ai mithi thingkuang songah Egypt ramah dah tlang i.