Seemthawhnak 49 - Zanniat Bible

Jacob In A Fapate Ca Hnuataber Thucah

¹ Cen Jacob in a fapate ko ai, “Hmunkhat ah taikhawm tu ilai hmai lam ning vumah thil cang tuh thu ning rel cia tuh ing,” tiin ti i.

² Kawi tu ilai ngai tu ih, Jacob ai fate, Ning pa Israel thurelhnak ngai tu ih.

³ Reuben, i fapa upa ber, Nang heh i thazang isi, Patling hnua i fa naih hmasaber isi, I fapate lakah a hat ber le a hngal ber:

⁴ Nang tu tilian bangin mi thin bahlak isi, Mi thupui ber i tuh awng lo isi, Zaimantifangin na pa nusun rori sualpui isi, Na pa khuahluan vumah kai ai rimruai zo isi;

⁵ Simeon le Levi tu unau i; amahte vangsau heh mi thisan luanhnak ah hmang i.

⁶ Amahte thuthup relhnak ah tel tuh lo ing, amahte khuakhan hmunah tel tuh lo ing, zaimantifangin a thinraw fangin mi rek i, Hngalsakhnak in kawlpawcang kaiza sat i.

⁷ Amahte thinrawhnak vumah cukcamhnak um tuseh, zaimantifangin thinrawhnak a luar ze de i. Amahte thinpuarhnak vum ahkhai cukcam tuar tuseh, zaimantifangin misiakha ze i. Jacob ram songah piakruai tuh sek ing, Israel mite lakah piakruai tuh sek ing.

⁸ “Judah, nang tu na unaute in na thangphat tuh i, Na ralte a hawng in pom tuhai, Na hmaiah na unaute ut tuh i.

⁹ Judah tu chintit bang i, Sa na dawp ben fangin a khurkua ah let isi, I fapa, Judah tu chintit bang i; Dawk dumdo ai bok leh i, Aisu inkhai phawr ngam lo i.

¹⁰ A kumpibawi fung awh ai, A tesinfate tu a zomzet in mi uktu tuh i. Miphun tampui in siahkhon pe tuhai, Upathnak thawn a hmaiah ut tuh i.

¹¹ A laak niu tu cabit kuang ah khit i, cabit kung phaber ah, A hnikpon tu cabitti in sawp i, thi bang ai a san cabitti ah.

¹² Cabitti ding manin a mit tu thi bangin san riarua i; Kawlpaw hnawiti ding manin a kam tu vur bangin var i.

¹³ Zebulun tu tipui varkam ah um tuh i, A varkam tu lawng cawlum hmun cang tuh i, A ram tu Sidon tian kau tuh i.

¹⁴ Issakhar tu a tha hat ngai kalauk i, a phurhnak thil tom hnih lakah bok i;

¹⁵ A cawlumhnak a phadan le, A ram nuamdan a hmu manin, thilrit phur tuhin ut ai, naper har pertu sal cang i.

¹⁶ Dan tu miphun uktu cang tuh i, Israel miphun bang thotho tuh i.

¹⁷ Dan tu lampui hiangai rul bang cang tuh i, Lam hiangai a ru nai roh rulha bang i. siphuh keruh cik tuhai siphuh totu heh tungkar in a khel lamah lon tuh i.

¹⁸ Maw Bawipa, nangmah ai ohnak iang ing.

¹⁹ Gad tu rukote in rok tuh i; ikhalselai amah in tawng tuhai hnawt tuh sek i.

²⁰ Asher loram in rong pha suak tuh i; Kumpibawi ai aihtlak rong i tuh i.

²¹ Naphtali tu a dawp zuahzo kiho pui, Faniu mawi bikbik naitu bang cang tuh i.

²² Joseph tu hampalak ai laak, Cirhti hiangai a tlangtu laak bangin cang tuh i; Tlang vumai laak niu bang i.

²³ Ninghiohnak nai loin a ralte in kim i; li le thal thawn hnawh i.

²⁴ Ikhalselai Jacob ai Pathian Cungnungber a thacak le Israel ai lungpui, Israel khaltu thawmin A li khiah ek thil ve lo ai a ban tha tu hat roh i.

²⁵ Na pa ai Pathian, na bawmtu le, hmuifu na petu Cungnungber Pathian in, Van in hmuifu ruah bangin laihnia ahkhai tidap bangin te le fa, sumhnam hmuifu thawn.

²⁶ Fangvui fual le rong ben thawn, Ci cin lo rong hmuifuhnak, Khuahlan in umciahnak tlang ai hmuifuhnak, kumzangza a khomi tlang vumai, A daihkul thilte tu, A unau lakah mi hlaice tuhin, semsuahhnak, Joseph ai lu vumah hleng tuseh.

²⁷ Benjamin tu mehleng puar le a pak in umthaitu i; A dawpciahnak zing lam fangin ai de i, Zan lamai a ngahhnak sa tu parhruai sek de i,” tiin ti i.

²⁸ Hemite tu Israel miphun hinte hlaihnih i ai amahte hnenah a pa thucahhnak i. Pakhat hnua pakhat amahte phutua ṭen in hmuifu pe tlang i.

Jacob Thihnak Le Phumhnak

²⁹ Cen Jacob in a fapate hnenah, “I pu i pate hnenah feh tuh ihang ing. Canaan ram Mamre in nisuah lam Makpelah ah,

³⁰ Hit mi pa Epharon hnenin ram le khukua heh hlanmual tuhin Abraham in lai sa um i. Ciata ah i phum tu ih.

³¹ Ciata ah Abraham le a nupui Sarah vui awng i. Isaac le a nupui Rebecca khai vui awng thotho i. Kaimah inkhai i nupui Leah heh ciata ah vui zo ing.

³² Cia ram le a songai lungkhukua heh Hit mi pa hnenai lai awng i,” tiin ti i.

³³ A fapate hnenah thucah a ben fangin, Jacob tu khuahluan vumah a ke ton ai a haihawh bo i. Ciatihin a pu le a pate hnenah feh ihang.