Seemthawhnak 48 - Zanniat Bible

Epharaim Le Manasseh Hmuifu Pehnak

¹ Can tawkfang a rai hnuaah Joseph tu, “Na pa ur i,” tiin rel i. Ciamanin Joseph in a fapate pahnih Manasseh le Epharaim thawn a pa fan tuhin feh tlang i.

² “Na fapa Joseph na fan tuhin hleng i,” tiin a rel fangin Jacob tu a tho ben lo kongin khuahluan vumah to i.

³ Jacob in Joseph hnenah, “Cungnungber Pathian tu Canaan ram Luz khua ah i hnenah lar ai hmuifu i pe awng i.

⁴ Pathian in, ‘Tefa tampui na pe tuhai na tesinfate tu miphun tampui in cang tuh i. Hemi ram tu na tesinfate hnenah kumzangza in amahte caah pe tuh ing,’ tiin ti i.

⁵ Na fapate pahnih Egypt ram i hleng hlanai na naihnakte tu i fapa rori in siar tuh i. Reuben le Simeon khai i fapa i bangin Epharaim le Manasseh khai i fapa cang tuh i.

⁶ Ikhalselai amahte hnua ai na naihnak na fate tu nangmah ai tuh i. Rocohnak ahcen a ute Epharaim le manasseh thawn hmunkhat in co tuh ve i.

⁷ Hetihin i tihnak tu zaimanin i tifangin Masopotamia ram an tlung leh ai Canaan ram Ephrath kin hleng hlanniu ah, i lungsiahnak lianber na nu Rachel thi ai Ephrath lam hiangah phum awng i ing,” tiin ti i. (Ephrath tu tunah Bethlehem ti inkhai ko i)

⁸ Jacob in Joseph ai fapate pahnih a hmu fangin, “Hemi naupangte tu aisute i?” tiin zawt i.

⁹ Ciafangin Joseph in, “Anite tu Egypt ramah Pathian ai i pehnak i fapate i,” tiin ti i. Cen Jacob in, “I hnenah koih tulai hmuifu pe tuh ing,” tiin ti i.

¹⁰ A tar hang manin Jacob tu a mit vai ai phantak in khua hmu thil lo ihang. Joseph in a fapate tu a pa nong ah koih sah ai a pa in huam kawm ai thut i.

¹¹ Jacob in Joseph hnenah, “Na tawk leh tuhin ruat awng lo ing. Ikhalselai tun tu Pathian in na fate tian i hmuruai i,” tiin ti i.

¹² Ciafangin Joseph in a pa kawng vuman a fate lang ai a pa hmaiah laikhun in ut ai upathnak pe i.

¹³ Joseph in a fapate pahnih tu amahte kut veve in awh ai a pa Jacob kekeh lam sawn ah um thai in Epharaim tu a kiahhan lam kut in hoi ai, a pa kiahhan lam sawn ah um thai in Manasseh tu a kekeh lam kut in hoi ai fehpui i.

¹⁴ Ikhalselai Jacob in a kut kalh dun in a nauta sawn Epharaim lu vumah a kiahhan lam kut suan ai upa sawn Manasseh lu vumah a kekeh lam kut suan i.

¹⁵ Cen Joseph khiah hmuifu pe ai; “I pu Abraham le i pa Isaac in amahte nun song a ruaihmi Pathian, Ciami Pathian in ning tu hmuifu ning pe tuseh. Tunnia tian i kilkhawltu Pathian in ning tu hmuifu ning pe tuseh.

¹⁶ Siatsuahhnak phunkhim songin i nun otu vancungmi in Ning tu hmuifu ning pe tuseh; I hming le i pu Abraham le i pa Isaac hming tu Amahte thawmin nung tu ngio seh; Te le fa tampui nai in, Laivum ah miphun tampui in cang tuseh,” tiin ti i.

¹⁷ Cen a pa ai kiahhan lam kut tu Epharaim lu vumah a suan khiah hmu fangin a thinkhim lo manin a pa kut heh Epharaim lu vuman Manasseh lu vumah thawn tuhin lang sah i.

¹⁸ Cen a pa hnenah, “I pa, ciatih ilo i. Hemi pa tu fapa upa sawn imanin a lu vumah na kiahhan lam kut dah tu,” tiin ti i.

¹⁹ Ikhalselai a pa in, “Kaimah in ling ing, i fapa, kaimah in ling ing. Manasseh ai tesinfate khai miphun lianpui in cang tuh ve i. Ikhalselai ani tahin a naupa lian tuh sawn ai a tesinfate tu miphun lianpui cang tuh i,” tiin ti i.

²⁰ Ciatihin cia nia ah hmuifu pe i; “Israel mite in midang ca Pathian ai hmuifu a ngen fangin: ‘Epharaim le Manasseh hmuifu co ai um bangin, Pathian in hmuifu ning pe tuseh’ ti dun tuh i,” tiin ti i. Ciatihin Jacob in Epharaim tu Manasseh hlanah dah i.

²¹ Cen Jacob in Joseph hnenah, “Kai tu thi tuh i nong ihang. Ikhalselai Pathian tu na hnenah um tuhai na pupate ramah na letruai leh tuh i.

²² Cen Amor mite hnenin i li le i ralvang thawn i langhnak ram hmuahhmuah lakai ram phaber Shechem heh na unaute coruai loin nangmah na pe tuh ing,” tiin ti i.