Seemthawhnak 45 - Zanniat Bible

Joseph Phuangdunhnak

¹ Ciafangin Joseph tu a lungzur sup ben nawn lo hang manin a hnenumte hnenah, “Mi hmuahhmuah suakruai tusek ih,” tiin ruai i. Mi suak ben fangin a unaute hnenah Joseph ing tiin phuang ai cia laitak ah a hiangah aisu khai um lo i.

² Joseph tu cawm ngai in kap hiangho manin Egypt mite inkhai za tlang i. Cia thu heh Pharoah inn tianin thang i.

³ Joseph in a naute hnenah, “Joseph ing. I pa tang nung aw lai im?” tiin zawt i. Ikhalselai a naute in a lau ze manin sawn ngam tlang lo i.

⁴ Joseph in, “I nong ah kawi tu ih,” tiin ti ai a hnenah kawi tlang fangin Joseph in, “Egypt ramah ning zuar awnghnak ning naupa Joseph ing.

⁵ Ikhalselai he ramah i zuar awng manin ning lungsia in mawhhluk dun mah ih. Mi nunohnak tuhin heta ah i hlengruaitu ngaingai heh Pathian i.

⁶ Tun kum heh he ram songah rian kumte a kum hnihhnak lek lai i. Rian kum nga lam tang lai manin cia songah lovai le rongkhawm ti khai um tuh lo i.

⁷ Ning tesinfate tianin ning nung thil tuh ca ning hlanah Pathian in i hlengruai i. Mi tampui nun o thil tuhin le ningmah khai ning nung tuhin i hlat i.

⁸ Ciamanin heta i hlengruaitu ngaingai heh ning ilo i si, Pathian sawn i. Pathian in Pharoah ai pa bangin i bawn ai a ram song hmuahhmuah heh i ṭuanvo i ai Egypt ram hmuahhmuah uktu ing.

⁹ Ciamanin i pa hnenah rang ngai in tlung tu ilai na fapa Joseph in, “Pathian in Egypt ram hmuahhmuah uktu in i bawn zo i. I hnenah rang ngai in kawi tu.

¹⁰ Kaimah thawn nong dun tuhin Goshen ah um tuhai nangmah le na fate le na tesinfate le na sumhnam; tuu, me le kawlpaw hmuahhmuah thawn um tuh isi.

¹¹ Goshen ah ning um fangin tu ning kilkhawl thil tuh ing. Rian kum nga sam lai manin nangmah le na innsang le na naihnak sumhnamte in ai pha nai loin um tuh i daih lo i, na ti i,” ti tu ih.

¹² Tunin ningmah le i nau Benjamin in ning hnenah a pongtu heh kaimah Joseph ing, ti ning mit rori in hmu zo i si.

¹³ Egypt ram songah i huham naidan heh i pa hnenah rel tu ilai, ning tawkhnak le ning hmuhnak hmuahhmuah a dangte khai rel tu sio ih. Rang ngai in let tu ilai amah koih tu ih,” tiin ti i.

¹⁴ Joseph in a naupa Benjamin heh kuah ai kap i. Benjamin inkhai kuah ai kap ve i.

¹⁵ Cia hnuaah Joseph in a ute pakhat hnua pakhat kap kongin kuah ai thut zianzo i. Cia hnuaah a ute thawn to ai thunuam rel tlang i.

¹⁶ Joseph ai unaute hleng i ti thu heh kumpibawi inn tianin thang sio ai Pharoah le a kuthnia tlangsuakte hmuahhmuah khai ang tlang i.

¹⁷ Ciafangin Pharoah in Joseph hnenah, “Na unaute tu amahte laak thawn rong phur tu selai Canaan ramah tlung tlang rih tuseh.

¹⁸ Ning pa le ning innsangte hawl tu selai i hnenah kawi tlang tuseh. Egypt ram songai ram phaber pe tuhai kin ram songai suakhnak a phaber pawl ai tlang tuh i.

¹⁹ Ning nupuite le ning faniute to tuhin Egypt ram an siphuhleng khai keng tuseh. Ning pa koih tuseh ti felfai niu in rel tu.

²⁰ Ning thilri hlum tuh heh pamhmaih mah ih. Zaimantifangin Egypt ram songai a phaber pawl heh ningmah ai tuh pam i,” tiin ti i.

²¹ Jacob ai fapate inkhai a relhnak bangin bawn tlang i. Pharoah ai thupeciahnak bangin Joseph in siphuhlengte khai pe ai lamfakte khai ken i.

²² Ciahlaiah a unaute tu hnikpon thlenghnak tuh khai sum i. Ikhalselai a nau Benjamin tu tangka za thum le hnikpon zun nga sum i.

²³ Egypt ram songai suakhnak thilri phaber pawl laak sawmkhat phurh in a pa kuat i. Cen a pa kawihnak tuh lamfak hrangah rong, sang le rong phun dangdang kalauk sawmkhat phurh kuat fawn i.

²⁴ A unaute heh hla ai, “Lamlak ah hau tlang mah i law,” tiin thucah i.

²⁵ Egypt ram an suak tlang ai Canaan ram a pa Jacob hnenah hleng tlang i.

²⁶ “Joseph nung lai nakhaw! Egypt ram hmuahhmuah uktu i,” tiin a pa rel tlang i. A pa tu a aican in thingsut ai sang thil hrimhrim lo i.

²⁷ Ikhalselai Joseph relhnak hmuahhmuah rel salawn fangin le Egypt ram fehhnak tuh hrangah Joseph ai kuathnak siphuhlengte khai a hmu fangin Jacob tu a lungawi in a hla tlung leh i.

²⁸ Ciafangin Jacob in, “I fapa Joseph heh nung ngaingai ti i fiang i, i rel mahang ih. Feh tuhai i thi hlanah tawk tuh ing” ti i.