Seemthawhnak 44 - Zanniat Bible

A Paimi Ngun Khuat

¹ Joseph in a innkiltu a hnenum pa hnenah, “Hemite dip songah a phur ben zah in rong thun tulai, a dip song a vumta ber ah amahte paisa dah sah leh tu.

² Cen i ngun khuat heh a nauta ber pa dip song a vumta ber ah a tangka thawn dah sah leh tu,” tiin ti i. A thupeciahnak bangin a hnenum pa in bawn i.

³ A thangha zing khuavar sawng fangin laakte thawn tlungruai i.

⁴ Khua in a suak hnua a rai hlanah Joseph in a innkiltu a hnenum pa hnenah, “Rang ngai in cia minungte heh hnawh tu; na man fangin, ‘Zaimanin thilpha heh thilhnawm in rulthun i si?’

⁵ ‘Zaimanin i bawipa ngun khuat ru i si? I bawipa cabitti dinghnak de i ai, tlahsan fang hmang de i. Thil pha lo ze bawn zo i si,’ tiin ti tuh isi,” tiin ti i.

⁶ A hnenum pa in hnawh ai a man fangin Joseph relhnak bangin ti i.

⁷ Ciafangin a unaute in, “Bawipa hetih ai na ponghnak tu ziang na ti nuamhnak i? Ciabang lawmlam bawn tuhin ruat awng lo i ing.

⁸ Kin dip songai kin hmuhnak tangka heh Canaan ram an keng leh ai na hnenah na khirh leh sek zo heh ling isi. Cia hnuaah zaimanin na bawipa inn songai sui le ngun ru tuh i ing?

⁹ Ciamanin bawipa, kinmah lakai pakhatkhat in ru le ingkhaw, ciami pa heh rek tuar tuseh; cen a dangte khai sal cang tuhin kin pom tu,” tiin ti tlang i.

¹⁰ Ani in, “I, ning tihnak lung i khim i; ikhalselai ningmah lakai mi pakhatkhat hnenah ngun khuat tawk lengkhaw ciami pa lek i sal ah cang tuhai midangte tu tlung thil tuh i si,” tiin ti i.

¹¹ Ciafangin a rang ngai in amahte dip khiah hma ai hong tlang i.

¹² Joseph hnenum pa in upa ber pa dip in nauta ber pa dip tian fel ngai in si ai Benjamin dip songah ngun khuat khiah hmu i.

¹³ Ciafangin lungsia in amahte hnikpon zik tlang ai amahte laak vumah thilri heh phurh leh ai khua songah let tlang i.

¹⁴ Judah le a unaute Joseph inn ah a hleng leh tianin Joseph tu inn ah um lai hlen i. A hmaiah bok tlang ai,

¹⁵ Joseph in, “Ning thil bawnhnak heh zaibang i? Kaimah bang thunaitu bawi in tlahsanhnak hmangin kin pom ngah tuh thotho i ti ling lo i sim?” tiin ti i.

¹⁶ Ciafangin Judah in, “Bawipa, na hnenah ziang pong pha khai nai lo i ing? Akontih in na el thil tuh lo i ing? Akontih inkhai ngaithiam co thil tuh lo i ing, Pathian in kin mawhhnak larruai zo i. Ciamanin bawipa, a dip songai ngun hai hmuhnak pa lek ilo in kin veksen in na sal cang tuh i ing,” tiin ti tlang i.

¹⁷ Ikhalselai Joseph in, “Ihlah, ciatihin ti tuh lo ing. A dip songai i ngun hai a hmumi pa lek i sal cang tuh i. A tanglaimi midangte tu ning pa hnenah cak niu in tlung tu ih,” tiin ti i.

Judah In Benjamin Ca Ngen I

¹⁸ Judah in Joseph hnenah nong ai, “Aw i bawipa, ninghio niu in thurelhnak can i pe rih tu hram. I vumah thinraw malaw; bawipa, nang tu amah Egypt ram kumpibawi bang thotho i si.

¹⁹ Bawipa nangmah in, “Pa nai lai aw i sim? Unau dang tang nai lai aw i sim?” tiin na kin zawt fangin.

²⁰ ‘Pa nai ai tar zo ihang; a tar hnua ai a cawihnak fa kin nau pakhat nai i ing. Cen upasawn tu thi zo ai a nu songin suakkhat fate lakah amah lek nung ihang; ciamanin i pa in ani tu daih cuang i,’ na ti ita ing.

²¹ Ciafangin bawipa nangmah in, ‘I hnenah koih tu ih, a hmu i nuam i,’ kin ti fangin,

²² Kin pa hlum thil tuh lo i, hlum lekhaw kin pa thi thai pang i,’ na ti i ing.

²³ Cen nangmah in, ‘Ning naupa tu ningmah thawn koih hlahle i si, i hmel khai i hmu tuh lo i si,’ kin ti i si.

²⁴ Na sal pa i pa hnen kin tlung lehsal fangin, na tihnak bangin rel i ing.

²⁵ Ciafangin ani in, ‘Feh leh tu thio ilai, kin ca rong lai lehsal tu ih,’ kin ti i.

²⁶ Kin in, ‘Feh tuh lo i ing; zaimantifangin kin nauta ber pa tel hlah lekhaw kin relhnak pa hmai hmu thil tuh lo i ing. Kin nauta ber pa tel fang ian in feh tuh i ing,’ tiin kin ti fangin,

²⁷ kin pa in, “I nupui Rachel in fapate pahnih i cawi ai,

²⁸ Pakhat tu um lo ihang. Sahrang in parh sek in hlai sek zo ihang tiin ruat ing; zaimantifangin tunnia tian hmu leh nawn lo ihang ing.

²⁹ Ciahlaiah he a tang lai i fapa fehpui lala ai zaimaw tiin thi pang selai thinhar lungsia in i thi tuh ngaingai i,” tiin kin ti i.

³⁰ Ciamanin bawipa, i pa hnenah kinmah lek let in kin nau hmu hlah lekhaw kin pa tu thi tuh rori i. Kin pa nunhnak tu he pa nunhnak thawn zom dun i.

³¹ Ciamanin kin pa heh a tar hnuapui ah thihpuitlak lungsiahnak a vumah hlengruai tuh ngaingai i ing.

³² Ciahlaiah bawipa, kin naupa ca i pa hnenah i nunhnak in thukham ing. ‘Na hnenah he kin naupa letpui leh hlahle ingkhaw na hmaiah i nun song hmuahhmuah mawhhlukhnak tuar tuh ing,’ ti zo ing.

³³ Ciamanin bawipa, hemi naupang pa heh a ute thawn tlung siang leh tulai, kaimah sawn na sal ah tang tuh ing.

³⁴ Naupang pa tel loin akontih in i pa hnenah let ngam tuh i ing? I pa tuar tuh lungsiahnak heh akontih in hmu ngam tuh i ing,” tiin ti i.