Seemthawhnak 42 - Zanniat Bible

Joseph Unaute Egypt Ram Hlenghnak

¹ Jacob in Egypt ramah rong um i, ti a za fangin a fapate hnenah, “Zaimanin hetihin um tlang menma i si?

² Egypt ramah rong um i ti ling ing. Rong loin kin thi lohnak tuhin ciata ah feh tu ilai rong lai tu ih,” tiin ti i.

³ Ciamanin Joseph ai ute sawmkhat khiah Egypt ramah rong lai tuhin feh tlang i.

⁴ Ikhalselai Jacob in Joseph thawn nukhat fa Benjamin tu feh siang lo i. Zaimantifangin tuahmawhhnak tawk pang tuh lau i.

⁵ Canaan ram songah rian tlung ve manin midang camra in Jacob ai fapate tu rong lai tuhin feh tlang ve i.

⁶ Joseph tu Egypt ramah uktu bawi cang zo manin ram cangcang ai a kawitu mi zongzong hnenah rong zuarh i. Ciafangin Joseph ai ute khai Joseph hmaiah kawi ai upathnak thawn laikhun in ut tlang i.

⁷ Joseph in a hmu fangin a ute ti khiah ling hlen napui ling lo bangin um khel i. Pon huho roh in anite hnenah, “Akonan kawi i si?” tiin zawt i. Anite in, “Rong lai tuhin Canaan ram an kawi i ing,” tiin sawn tlang i.

⁸ Joseph in a ute i ti ling napui anite incen ling tlang lo i.

⁹ A mang ai amahte thula man awnghnak khai hih leh ai, “Ning tu micultute i si. Kin ram thanauhnak hmun sik tum ai kawi tlang i si,” tiin ti i.

¹⁰ Ikhalselai anite in, “Bawipa, midikcang i ing, micultute i hrimhrim lo i ing. Na salte kinmah heh rong lai tuh lek rori in kawi i ing.

¹¹ Kin veksen in unau tlang i ing. Bawipa, midikcang i ing; micultute i hrimhrim lo i ing,” tiin ti tlang i.

¹² Ikhalselai Joseph in, “Ihlah, kin ram a thanau hmun cul hiam manin kawi i si,” ti thotho i.

¹³ Cen anite in, “Kin veksen in unaute hlaihnih i ing ai Canaan ramai mi pakhat ai fapate i ing. Kin nau a nauta ber tu tunin kin pa hnenah inn ah um ai kin nau pakhat tu thi zo ihang,” tiin rel tlang i.

¹⁴ Joseph in, “I ti zo bangin ning tu micultute i si.

¹⁵ Ning i le ilo fiangruai tuhin hetihin ning cu tuh ing; Pharoah hming in thu ning kham ing; ning nau nauta ber heta ah koih hlah le i sikhaw tlung thil tuh lo i si.

¹⁶ Ningmah lakai mi pakhatkhat in lang tuseh. Ning thu a fiang hlanlo thawng ning toh tuh ing. Ciahlahle Pharoah hming sal in rel ing: ningmah heh micultute i tengteng i si,” tiin ti i.

¹⁷ Ciatihin amahte unau tlang in ni thum song thawng toh i.

¹⁸ A ni thumhnak ah Joseph in, “Pathian hmai i zah manin hetihin bawn le i sikhaw thihhnak in ning luat tuh i.

¹⁹ Mi dik ngaingai le i sikhaw tun ning umhnak thawnginn ah pakhat tang rih tu selai a dangte tu rikam ai umtu ning innsang hnenah ning laihnak rong thawn tlung tuseh.

²⁰ Ikhalselai ning ponghnak dik i ti ling thil tuhin ning nauta ber heh i hnenah koih tu tengteng ih. Ciatihin bawn le i si ning thi tuh lo i,” tiin ti i. Ciami heh amahte unau tlang in lungkhim tlang hek i.

²¹ Amahte veve tu, “Kin naupa Joseph khiatih in kin ti awng heh kin mawh roh i. Harsahnak a tuar cuahco laiah hmu tlang hlen napui ning i hiotu ih tiin ngaihhar kin kun hlelhhlo napui ninghio nuam awng lo ising. Ciamanin i, tunin hetihin harsahnak kin tuar heh,” ti dun tlang i.

²² Reuben in a unaute hnenah, “Kin naupa vumah zaikhai thilpha lo bawn mah i law, ning ti awng tho ing? I thu i ngai sah nuam lo i si. Ciamanin a thih man phuzulhnak tuar ihang sing,” tiin ti i.

²³ Ciatih ai anite ponghnak heh Joseph in ling sio i; ikhalselai anite in kin ling sio i ti ling tlang lo i. Zaimantifangin Joseph thawn a pon dun fangin ponglettu hmang i.

²⁴ Ciafangin Joseph tu hmundang ah feh ai kap i. A kap ben fangin anite hnenah kawi lehsal ai a ute lakin Simeon heh pom tlang ai amahte mithmuh rori ah penruai i.

Joseph Ai Ute Canaan Ah Tlung I

²⁵ Joseph in, “Amahte dip dim in rong thun tu ih, a paisa heh amahte dip song ṭen ah thun leh tu sio ilai lamfak ken tu ih,” tiin thupe ai a thupeciahnak bangin a ute ca bawt tlang i.

²⁶ A ute in a rong laihnak heh laak vumah phurh ai tlung tlang i.

²⁷ Cia zan amahte riahbuk ah a unau pakhat in a laak rong pe tuhin dip hong ai dip song a vumta ber ah paisa hmu i.

²⁸ “Kin paisa kin khirh i, i dip songah um i,” tiin au ai a unaute rel i. Thin lau tlang roh ai hlawng kongin, “Pathian in kin vumah ziang thil bawn heh ini?” tiin pakhat le pakhat zawt dun i.

²⁹ Canaan ramai a pa Jacob hnen a hleng fangin amahte tawkhnak le tuarhnak hmuahhmuah a pa hnenah rel tlang i.

³⁰ “Egypt ram uktu bawipa in kin vumah pon huho roh in micultute i si, tiin sual kin puh i.

³¹ Micultute ilo i ing, midikcang sangtlak mi i ing.

³² Pa pakhat fa unaute hlaihnih i ing, kin nau pakhat tu thi zo ihang, a nauta ber tu Canaan ramai kin pa hnenah um i, tiin rel i ing.

³³ Ikhalselai cia bawipa in, sangtlak ning i le ilo i ling thil tuhin i hnenah pakhat tu tang tuh i si, a dangte tu rikam ai a umtu ning innsang ca rong phur tu ih.

³⁴ Cen ning nauta ber koih tu ih. Ciahnua fangin micultu ilo in sangtlak midikcang ning ihnak i ling ngah hnua fangin ning unau pa hlat tuhai kin ramah ning nuam bangin thil zuar in thil lai thil tuh i si,” kin ti i, tiin a pa hnenah rel tlang i.

³⁵ Cen amahte phurhnak rong suah fangin amahte dip song ṭen ah a tangka ṭen hmu ai a pafa tlang in thinlau tlang roh i.

³⁶ Ciafangin a pa Jacob in, “Fate pakhat loin maw i zam tuh i si. Joseph tu thi zo i; Simeon le pai zo fawn i. Tun Benjamin lang tum nengno i si; Kai heh a tuartu ing!” tiin ti i.

³⁷ Ciami a za fangin Reuben in, “Benjamin na hnenah na tlut leh hlahle ingkhaw, i fapate pahnih heh rek tu. Benjamin heh i kut songah dah tulai letpui leh tuh rori ing,” tiin a pa hnenah ti i.

³⁸ Ikhalselai a pa in, “I fapa tu hlat thil tuh lo ing. A upa le thi zo ai tun amah lek tang ihang. Lampui lakah a ilolo tawk pang tuh i. Ciabang lungsiahnak tuar ben tuh nawn lo ing; i tar ze hang ai i thi tuh ngaingai i,” tiin ti i.