Seemthawhnak 40 - Zanniat Bible

Joseph In Thawngtlate Ai Manglethnak

¹ Can a rai deuh fangin Egypt kumpibawi ai cabitti petu le sangbawn hotu pa in a bawipa a thinrawtiar kawm i.

² Pharoah tu a tlangsuakte pahnih vumah a thinraw ai,

³ Joseph dahhnak, kumpibawi innkiltu bawipa ai inn ah thawngtoh kawm ve i.

⁴ Kumpibawi innkiltu bawipa in Joseph khiah ciami thawngtlate pahnih hnenah dah ai a naper perruai i. Ciatihin thawng songah can raipui um tlang i.

⁵ Zan khat tu thawnginn ah Egypt kumpibawi ai cabitti petu le sangbawn hotu pate pahnih in a sullam nai mang man kawm veve i.

⁶ Zingniu in Joseph khiah anite hnenah kawi ai thinhar ngai in um kawm ngio khiah hmu i.

⁷ Joseph in, “Zaimanin tunnia tu thin ning hnawm cuang i?” tiin a zawt fangin,

⁸ anite in, “Mang man kawm veve ai a sullam kin let sahbentu aisu khai um lo i,” tiin ti kawm i. Ciafangin Joseph in, “Mang letthiamhnak tu Pathian pehnak i. Ning mangte i rel tu ih,” ti i.

⁹ Ciafangin cabitti petu in, “I mang ah cabit kuang pakhat i hmaiah hmu ai,

¹⁰ a kakte kak thum um i, cabit kakte heh mem ai a cer sawng fangin a par suak ai a thaite khai hmin i.

¹¹ Pharoah ai khuat awh in cabit thaite khiah loih in khuat songah sut ing. Cen Pharoah hnenah pe ing,” tiin ti i.

¹² Ciafangin Joseph in, “A sullam tu hetihin i: a kakte kak thum tu ni thum tica i.

¹³ Ni thum songah Pharoah in na hlat tuh i; na ngaithiam tuhai na naper kel per leh tuh isi; Cabitti petu na i bangin cabit khuat heh Pharoah hnenah pe leh tuh isi.

¹⁴ Ciatihin na lampui a tluang fangin he thawnginn in i suak thai tuh i hai malai i thula heh Pharoah hnenah rel tu hram law.

¹⁵ Thungai in ti lesingkhaw, Hebrew mite ram an ruhnak mi ing. Heta ah khai thawng i toh tuhin zaikhai bawnsualhnak nai lo ing,” tiin ti i.

¹⁶ Joseph ai mang lethnak heh thupha lamin sangbawn hotu pa in hmu fangin, kai inkhai mang nai ve ing; i mang ah i lu vumah sang kho thum um ai,

¹⁷ a vumta ber kho songah Pharoah ca sang em hinkhim um i. Ikhalselai cia sang heh vaniute in ai tlang dekdo i,” tiin ti i.

¹⁸ Ciafangin Joseph in, “A sullam tu hetihin i; khote pathum tu ni thum tica i;

¹⁹ ni thum fangin Pharoah in na suah tuhai na hawng na tan tuh i. Na luang tu thingkung vumah tar tuhai vaniute in na sa ai tlang tuh dekdo i,” tiin ti i.

²⁰ Ciatih ngaingai in ni thumhnak nia, Pharoah tenia ah, Pharoah in a kuthnia ai tlangsuakte hmuahhmuah ca puai bawn ai cabitti petu le sangbawn hotu pa heh thawng songin suah ai a bawite hmaiah kawiruai i.

²¹ cabitti petu pa tu a hlan naper kel perruai leh i.

²² Ikhalselai sangbawn hotu pa tu a hawng in tar ai thi i. Joseph ai let bawnsahhnak bangin amahte mang a sullam khim sio i.

²³ Ikhalselai cabitti petu pa in Joseph khiah ling nawn loin hai leh meng i.