Seemthawhnak 4 - Zanniat Bible

Cain le Abel

¹ Cen Adam le a nupui Eve heh pawl dun ai, Eve in naupai i. Fapa in nai ai, “Bawipa bawmhnak in fapa nai ing,” tiin ti i. Ciamanin a hming Cain tiin bawn i.

² Cia hnuaah a naupa Abel cawi nengno i. Abel tu tuukhal i ai Cain tu lovai mi i.

³ A can rai deuh fangin Cain in a lo songsuak rongte heh Bawipa hnenah sel i.

⁴ Cia hnuaah Abel inkhai a tuu faniu a hmasaber tehnak pawl ro ai satit a pha hmun ber Bawipa sel ve i. Abel vumah le a selhnak vumah Bawipa tu a lungkhim i.

⁵ ikhalselai Cain le a selhnak cenin Bawipa in hnawl i. Ciafangin Cain tu a thinraw in a mithmai sia i.

⁶ Ciafangin Bawipa in Cain hnenah, “zaimanin thinraw isi? zaimanin mithmai na sia i?

⁷ A pha bawn silai na cosang tuh napui ing; ikhalselai a hnawm na bawn manin sualhnak in na neh tuhin sahrang bangin dawngkham in na bawh ihang; na uk tum i; ikhalselai nangmah in neh ben kul tuh isi,” tiin ti i.

⁸ Cen Cain in a naupa Abel hnenah, “Hampalak ah feh kawm ngasing” tiin ti i. Hampalak a hleng kawm fangin Cain in Abel heh zoi ai rek i.

⁹ Ciafangin Cain heh Bawipa in, “Na naupa Abel akonah i?” tiin zawt i. Cain in, “Ling lo ing. I naupa lentu tuhin aisu in i bawn i?” tiin sawn i.

¹⁰ Cen Bawipa in, “Zaimanin hebang a laukul thil bawn isi? Phuzul nuam ai auhnak aw bangin na naupa thisan in laipua an i ko i.

¹¹ Tunin nangmah heh cukcamhnak tuar ai na umhnak an hnawthnak tuar tuh isi; zaimantifangin na kut ai na suahhnak na naupa thisan khiah a ka ka ai donghnak bangin laipua in hawp zo i.

¹² Rong na cing inkhai laipua in zaikhai suak tuh lo ai inn nai loin mivakvai na cang tuh i,” tiin ti i.

¹³ Ciafangin Cain in Bawipa hnenah, “Na cawhhnak heh a har ze ngelngo i.

¹⁴ Hemi ram le na mithmuh in i hnawt ta vumai laivum ah inn nai lo le mivakvai i cang tuhai i hmutu hmuahhmuah in i rek tuh ihang,” tiin ti i.

¹⁵ Ikhalselai Bawipa in, “Ciatihin tu i tuh lo i; na rektu heh phuzulhnak a let sarih tuar tuseh,” tiin ti i. Ciamanin Cain a hmutu mi zongzong in rek mawh ngai tiin Bawipa in hnikhnaihhnak dah i.

¹⁶ Cia hnuaah Cain tu Bawipa mithmuh in tlan ai Eden vuandum nisuah lam Nod tihnak ramah um i.

Cain Ai Tesinfate

¹⁷ Cain le a nupui in fapa nai ai a hming Enoch tiin bawn i. Cen Cain in khuapui pakhat toh ai a fapa hming cuangin Enoch khua tiin bawn i.

¹⁸ Cen Enoch in fapa nai ai a hming Irad bawn i; Irad ai fapa tu Mehujael i; Mehujael ai fapa tu Methusael i; Methusael ai fapa tu Lamech i.

¹⁹ Lamech in nupuite pahnih nai i; pakhat tu Adah i ai pakhat tu Zillah i.

²⁰ Cen Adah in fapa nai ai Jabal tiin ko i. Jabal tu kawlpaw khaltu le ponhlam ai a umtute sentu i.

²¹ A naupa tu Jubal i ai tingriset le titilu tumtute sentu i.

²² Cen Zillah in fapa nai ai Tubal Cain i. Tubal Cain tu thir le dar pumsuthiam pawl sentu i. Tubal Cain ai farnu heh Namah i.

²³ Cen Lamech in a nupuite hnenah, “I nupui Adah le Zillah, i ngai kawm tu ih, I vit manin tlangval pakhat rek ing. I tuahmawh manin mi rek ing.

²⁴ Cain a rektu vumah a let sarih in phuzul lekhaw, Kai i tuahmawhtu in A let sawmsarih le let sarih in Phuzul kul tuh i,” tiin ti i.

Seth Le Enosh

²⁵ Cen Adam le a nupui in a dang fapa pakhat nai i. “Cain in Abel rek ai a tumrul ah Pathian in fapa i pe i,” tiin Eve in ti ai a hming ah Seth bawn i.

²⁶ Seth in fapa pakhat nai ai a hming Enosh tiin bawn i. Ciata ai pan minungte in Bawipa heh a hming thianghlim ko in bia tlang i.