Seemthawhnak 39 - Zanniat Bible

Joseph Le Potiphar Ai Nupui

¹ Joseph tu Ishmael mite in Egypt ramah hlenpui ai Egypt kumpibawi innkiltu bawi Egypt mi Potiphar hnenah zuar i.

² Bawipa tu Joseph hnenah um manin amah ca zaizongza tluang sio i. Joseph tu Egypt mi a bawipa inn ah um i.

³ Cen Bawipa Pathian tu a hnenah um ai a bawnhnak hmuahhmuah ah a hlawhtling heh a bawipa in hmu i.

⁴ Joseph ai ziaza heh Potiphar in a hmu fangin a lungkhim ze manin a innsang le a naihnak hmuahhmuah kilkhawltu tuhin bawn i.

⁵ Ciata ai panin Joseph manin Egypt mi pa inn heh Pathian in hmuifu pe i. A inn songai a naihnak le a lo ai zaizongza khai Bawipa in hmuifu pe i.

⁶ Potiphar in a naihnak hmuahhmuah Joseph kut songah dah sek ai a aih tuh rong siarlo a ruat tuh zaikhai um lo i. Joseph tu a ruangsuak pha ze ai mipiang ngai i.

⁷ Can a rai deuh fangin a bawipa ai nupui in Joseph khiah irhnak mit thawn sik ngiode i. Vaikhat ah a bawipa ai nupui in, “I hnenah it tu,” tiin Joseph sawm i.

⁸ Ikhalselai Joseph in el ai a hnenah, “Kaimah heta ah um manin i bawipa in hemi innsang thulate zaikhai a thincawlkul loin um i. A naihnak thilri hmuahhmuah kilkhawltu tuhin i bawn i.

⁹ Hemi inn songah amah tlukin thunai ai a nupui nangmah siarlo a dang zaikhai kaimah ca hmundithnak nai lo i. Ciamanin akontih in ciatluk thil siava bawn tuhin Pathian hmaiah sual thil tuh ing,” tiin ti i.

¹⁰ Joseph tu a bawipa ai nupui in nisiar in zawl hlelhhlo de napui a thu ngai loin vaikhat khai itpui lo i.

¹¹ Ikhalselai ni khat ah Joseph tu innsang naper per tuhin lut ai midang aisu khai inn songah um lo i.

¹² Ciafangin a bawinu in Joseph heh a angki in awh meng ai, “I hnenah it tu,” tiin ti i. Ikhalselai Joseph tu sumpua ah suak teu ai a angki ciah a bawinu hnenah hlum tlap i.

¹³ Joseph in angki hlum ai sumpua ah suak teu a hmu fangin,

¹⁴ a bawinu in a innsang hnenumte ko ai, “Sik tu ih, I pasal in he Hebrew pa heh kin innsang ah kin tlut i, ikhalselai tunah zoh i suam i. I khan songah lut ai amah thawn it tuhin i sawm i; ikhalselai au dekdo ing.

¹⁵ Ciatihin i au manin i hiangah a angki hlum in dawp ai sumpua ah suak teu i,” tiin ti i.

¹⁶ Cia nu in Joseph ai bawipa a hleng hlanlo Joseph angki heh a hnenah dah hlen i.

¹⁷ A pasal a hleng fangin ciami thu heh rel i. “Hebrew sal pa na tlutmi pa in i zohsuam tum in i khan songah lut i.

¹⁸ Ikhalselai i au fangin a angki lek i hiangah hlum ai tlan teu i,” tiin rel i.

¹⁹ Joseph ai bawipa tu a nupui in, “Na sal pa in ciatihin iti i,” tiin a rel fangin a thinraw i.

²⁰ Joseph khiah pom ai kumpibawi ai thawngtlate khumhnak thawnginn ah dah i. Ciata ah Joseph tu thawng songah um i.

²¹ Ikhalselai Bawipa Pathian tu Joseph hnenah um ai ninghio manin thawnginn uktu bawipa khai Joseph vumah ninghiohnak thinlung nairuai i.

²² Ciamanin thawngtlate kilkhawltu ah Joseph heh bawn ai thawnginn song thil canghnak hmuahhmuah siktu ah dah i.

²³ Joseph ai ṭuanvo langhnak hmuahhmuah ah thawnginn uktu bawipa in sikkul hrimhrim lo i. Zaimantifangin Bawipa Pathian heh Joseph hnenah um ai a thil bawnhnak hmuahhmuah ah hlawhtlingruai i.