Seemthawhnak 37 - Zanniat Bible

Joseph Le A Unaute

¹ Jacob tu a pa umhnak Canaan ramah um hlen i.

² Jacob ai innsang tluanthu tu hetihin i. Joseph tu tlangval niu kum hlaisarih i ai a pa ai nusunte Bilhah le Zilpah ai fapate, a ute thawn tuu le me khal ve de i. A ute ai thilsual bawnhnak tepawl heh a pa hnenah rel de i.

³ Joseph tu a pa Jacob in a tar hnua ai naihnak manin a dang fapate tahin it cuang i. Ciamanin angki banfual khui sah i.

⁴ Ciatihin a pa in Joseph a daih deuh khiah a ute in hmu fangin Joseph heh hua ai awkam pha in pon awng lo i.

⁵ Vaikhat ah Joseph in mang man ai a ute hnenah rel i. A mang a rel fangin a ute in cim tlang amam i.

⁶ Anite hnenah, “I mang manhnak ngai tu ih.

⁷ I mang ah kin veksen in lo feh tlang ai sangvut tel tlang ising; ciafangin i sangvut tel heh tho ngualngo ai a cang ngai in ding i. Ning sangvut telte in i sangvut tel ai cingkim ah ut tlang i,” tiin ti i.

⁸ Ciafangin a ute in, “Kin vumah kumpibawi cang tuhin le kin uk tuhin ruat isim?” tiin zawt tlang i. Ciatihin a mang a manhnak rel manin roh amam in cim tlang i.

⁹ Cia hnuaah Joseph in mang a dang man lehthio ai a ute hnenah, “Mang man ai i mang ah ni le hla le arsite hlaikhat heh i hmaiah a ut tlang hmu ing,” tiin rel i.

¹⁰ A mang a pa le a ute hnenah a rel fangin a pa in, “Ziang mang ngelcel man isi? Na nu le na ute le kaimah tianin na hmaiah ut tuh i ing maw? tiin hau dekdo i.

¹¹ A ute in iksik amam i. Ikhalselai a pa cenin ciami thulate a thinlung niu ah dah hlen i.

Egypt Ah Joseph Zuar Le Fehpui

¹² Cen a ute tu a pa ai sumhnam khal tuhin Shechem ah feh tlang i.

¹³ Cen a pa Jacob in Joseph hnenah, “Na ute tu sumhnam khal in Shechem ah um tlang i. Pai tulai amahte hnenah na hlat tuh ing,” tiin ti i. Ciafangin Joseph in, “Man ihang ing,” tiin ti i.

¹⁴ A pa in a hnenah, “Feh ta tulai na ute le sumrualte cak tlang nalai maw sik ta tu. Let leh tulai i rel tu,” tiin ti i. Ciamanin a pa in Joseph tu Hebron phairawn in fehruai i. Cen Joseph tu Shechem ah a hleng fangin,

¹⁵ mi pakhat in hampalak ah a vak hnelhno hmu i. Ciami pa in “Ziang si isi?” tiin Joseph zawt i.

¹⁶ Ciafangin Joseph in, “I ute si ing; sumhnam a konteng ah khal ini, i rel tu,” tiin ti i.

¹⁷ Mipa in, “Heta ah um lo ihang. Dothan lamah feh tlang ngasing ti dun ngawn ling ing,” tiin ti i. Ciamanin Joseph tu Dothan ah feh ai a ute hnenah hleng i.

¹⁸ A ute in amahte hnen a hleng hlan a hlapui an hmu tlang cia i. Ciafangin amahte in thusia sawm tlang ai a rek tuhin tum i.

¹⁹ “Mangmantu pa hleng ihang.

²⁰ Kawi tu ih, rek ngasing khaw a luang heh namkum car pakhatkhat ah lon ngasing. Sahrang in dawp i ti tuh ising. Cen a mang manhnakte akontih in cang nitur maw sik tlang ngasing,” tiin pakhat le pakhat ti dun i.

²¹ Ciatihin amahte tihnak Reuben in a za fangin Joseph heh hup tum i. Reuben in, “A rek lawmlam tu rek hlah sing ih.

²² Joseph heh rek mah ih. Hemi hampalak ai namkum ro pakhatkhat songah lon tu ih. Ikhalselai ani tu tuahmawh mah ih,” tiin ti i. Himniu in hupsuak thil lengkhaw a pa hnenah hla leh tuhin Reuben in lo tumtek i.

²³ Joseph tu a ute hnen a hleng ngaingai fangin a ute in a korfual hawk sah i.

²⁴ Pom ai namkum ro songah lon tlang i.

²⁵ Rong ai tlang laitak ah khualtlawng mi rual khat Ishmael mite Gilead in Egypt ram a feh tlang khiah rin lopui in hmu tlang i. Amahte kalaukte in farhnai, thinghnai, le thingham hmui pawl phur i.

²⁶ Ciafangin Judah in a unaute hnenah, “Kin naupa rek ai mirek kin ihnak heh thup singlai ziang phathnem i?

²⁷ Hemi Ishmael mite hnenah zuar sawn ngasing ih. Ciatihin zuar lesingkhaw amah tuahmawh kul lo i; thungai in tifangin kin nau i ai kin thi le kin sa i,” tiin ti i. Ciatihin a tihnak tu a unaute inkhai lungkhim tlang i.

²⁸ Ciami Midian mi sumtuahtute a hleng fangin Joseph tu namkum songin suah ai Ishmael mite hnenah ngun tangka kul in zuar i. Ciatihin Ishmael mite in Joseph heh Egypt ramah fehpui teu i.

²⁹ Cen Reuben in namkum song a sik fangin Joseph a um nawn lo man in a lungsia ai a lungsia larruai tuhin a hnikpon zik sek i.

³⁰ Cen a unaute hnenah let ai, “Kin naupa namkum songah um lo i. Akontih in ti tuh ing?” tiin ti i.

³¹ Cen a unaute in me ro ai Joseph korfualpui heh me thisan songah nim i.

³² Ciami korfualpui heh a pa hnenah tlut ai, “Hemi tawk i ing, na fapa ai ini im, sik tu?” tiin ti tlang i.

³³ Ciafangin a pa in Joseph ai korfualpui i ti khiah ling zual ai, “I, amah ai i! sahrang in dawp zo i ni tur im?” Joseph tu ciardiak in hlikhlai zo dek ihang,” tiin ti i.

³⁴ Jacob in a hnikponte zik sek ai a lungsiahnak larruai tuhin buri sil ai a raipui mithi ngai in um cuahco i.

³⁵ A fapate le a fanute kawi ai hnem tlang i; ikhalselai hnem ben lo i. “Amah hnen mithi khua i hleng ve lai hlanlo, i fapa ngai in um tuh ing,” tiin ti i. Ciamanin a fapa ngai in nisiar kap hnelhno i.

³⁶ Cen Joseph tu Midian mite in Egypt ramah fehpui ai Egypt kumpibawi ai innkiltu ralbawipa Potiphar hnenah zuar tlang i.