Seemthawhnak 35 - Zanniat Bible

Pathian In Bethel Ah Jacob Hmuifu Pe I

¹ Pathian in Jacob hnenah, “Tun rori in Bethel ah feh tulai um tu. Na u Esau hnenin na tlan laiah na hnenai a lartu Pathian ca hibawlhnak puleng tiang tu,” tiin ti i.

² Ciafangin Jacob in a songkhat le amah thawn umtu minungte hnenah, “Ramdang mite khuavang milim hmuahhmuah lon tusek hang ih; ning ruangpum cianghlimruai in hnikpon cianghlim sil tu ih.

³ Heta in suak ngasing khaw Bethel ah feh tuh ising. Ciata ah i thinlau lai ai i muangruaitu le i vakvaihnak hmuncang ah i umpuitu Pathian ca puleng pakhat tiang tuh ising,” tiin ti i.

⁴ Ciamanin amahte naihnak ramdang khuavang lim le amahte vuh lai bilvuhte lang ai Jacob hnenah pe tlang i. Jacob in Shechem khua hiangai um hlokhli kungpui hniaah phum sek i.

⁵ Jacob le a fapate ciata in suak fangin, a hiang cingkim ai khuasong mite tu thinlau ai khuasik mulpalaih tlang manin Jacob le a fate tu a khel lamin aisu inkhai hnawh ngam tlang lo i.

⁶ Jacob tu Canaan ram Bethel ti ai kohnak Luz khua ah a minungte thawn hleng tlang i.

⁷ Ciata ah puleng tiang ai a upa hnenin a tlan fangin cia hmunah Pathian a hnenah lar awng manin cia hmun heh El-Bethel tiin a hming bawn i.

⁸ Ciafangin Rebecca lentu nu Deborah thi ai Bethel hlang lamai hlokhli hniaah vui tlang i. Ciamanin ciami thingkung heh, “Allon Bacuth” tiin ti i.

⁹ Jacob tu Masopotamia ram an a let lehsal fangin Pathian a hnenah lar lehthio ai hmuifu pe i.

¹⁰ A hnenah, “Na hming tu Jacob i. Ikhalselai tunai panin Israel tuh ihang si,” tiin ti i. Ciamanin ani tu Israel tiin ko ihang.

¹¹ Cen Pathian in a hnenah, “Kai tu Cungnungber Pathian ing. Fa tampui nai in na ci tampui in pungzai tu selai a hrekkhat tu kumpibawite cang tuh i. Na tesinfate tu tam tuh ze ai miphun tampui in cang tuh i.

¹² Abraham le Isaac hnenai i pe sa ram heh nangmah hnenah na pe tuh ing. Cen na hnua ai na tesinfate hnen ahkhai pe tuh ing,” tiin ti i.

¹³ Ciata ai amah thawn pon dun hmunah Jacob heh Pathian in hlum i.

¹⁴ Ciata ah Jacob in hihhnak khanlung bir ai hibawlhnak cabitti a burh hnuaah sathau burh i.

¹⁵ Cia hmun heh Bethel tiin a hming bawn i.

Rachel Thihnak

¹⁶ Bethel hlum ai Ephrath khua rin a hleng man hlanah Rachel tu a nihla khim ai a naukai ur i.

¹⁷ Ciafangin naudongtu nu in, “Lau malaw, fapa i,” tiin ti i.

¹⁸ Ikhalselai Rachel tu a haihawh bo i; a thidawn a hnukcat teng fangin a fapa heh Ben-oni tiin a hming bawn i; ikhalselai a pa in Benjamin tiin ko i.

¹⁹ Rachel tu thi ai tunai Bethlehem tihnak Ephrath khua feh hmun lampui ah phum i.

²⁰ Cen Jacob in a hlanmual ah hihhnak lung bir ai, “Rachel hlan” ti i ai tunnia tianin um lai i.

²¹ Cen Jacob tu vak betbo ai Eder lungdawl ai ralkhat ah riahbuk zar i.

Jacob Ai Fapate

²² Jacob ciata ai a um laiah, a pa ai nuzawl Bilhah heh Reuben in sualpui i. Ciami heh a pa Jacob in za fangin a thinraw roh i. Jacob tu fapate hlaihnih nai i.

²³ A nupui Leah thawn naihnak fapate: upa ber ah Reuben, cen Simeon, Levi, Judah, Issakhar Zebulun i.

²⁴ Rachel thawn naihnak fapate tu Joseph le Benjamin i.

²⁵ Rachel sal nu Bilhah thawn naihnak fapate tu Dan le Naphtali i.

²⁶ Cen Leah sal nu Zilpah thawn naihnak fapate tu Gad le Asher i. Hemi fapate tu Jacob in Masopotamia ah a naihnak i.

Isaac Thihnak

²⁷ Abraham le Isaac umhnak Mamre khua ah a pa Isaac hnenah Jacob hleng i. (Mamre tu Kiriath Arba ihlahle Hebron ti inkhai ko i).

²⁸ Isaac tu tarkun tianin nung ai kum za le kum sawmriat khim fangin thi i.

²⁹ Cen a fapate Esau le Jacob in vui kawm i.