Seemthawhnak 32 - Zanniat Bible

Jacob In Esau Tawk Tuhin Pai I

¹ Jacob tu feh ai lamlak ah Pathian vancungmite in tawk i.

² Jacob in a hmu fangin, “Pathian ai ralkapte i,” ti i. Ciamanin cia hmun heh Mahanaim tiin a hming bawn i.

³ Cen Jacob in Edom ram Sair tihnak hmunah umtu a upa Esau tawk tuhin mi hlat i.

⁴ A nalangte hnenah, “I bawipa Esau hnenah kihzahhnak thawn na cengpa kaimah Jacob in thu na cah i. Laban hnenah kum raipui um ai tun fangin tlung lehsal ing.

⁵ Kawlpaw le laakte, tuu le me le sal nu sal pa nai ing. I upa na mithmai pha co thai tuhin he thu na cah i,” tiin rel tuhin ruai i.

⁶ A nalangte a let fangin, “Na u Esau hnenah feh ta ai ani tu a na tawk tuhin kawi zo i. Minung za li thawn kawi i,” tiin rel i.

⁷ Cia thu a za fangin Jacob tu a thinlau in hlawng i. Ciamanin a hnenah umtu minungte le tuu le me, kawlpaw le kalaukte heh bur hnih in khan i.

⁸ Zaimanin ciatihin bawn ini ti fangin, “Esau in bur khatta rek ta sek inkhai bur khat tang tuh lai i,” tiin a ruat manin i.

⁹ Ciafangin Jacob tu sawngen ai, “Aw Pathian, i pu Abraham le i pa Isaac ai Pathian, i ngai tu hram. Bawipa, nangmah in, ‘Na khua le na songkhatte hnenah tlung lehsal tulai na lampui tluangruai tuh ing,’ iti awng isi.

¹⁰ Kai na sal pa hnenai na hlengruaihnak na ninghiohnak le rinsantlak na ihnak heh a cotu tuhin a tlawmniu khai i tlak lo i. Zaikhai nai loin hemi faikiang pakhat lek thawn Jordan runti tan awng ing; tun ahcen minung le sumhnam bur hnih thawn let ihang ing.

¹¹ Ciamanin i u Esau kut songin, maw Bawipa, i osuak tu hram. I u Esau hleng tuhai nupang le naupang khai zuah loin kin rek mawh sek ngai tiin thin i lau ze i.

¹² ‘Na lampui tluangruai tuhai tesinfate tampui na pe tuh ing; na tesinfate tu tipui kamai siatnawi zah in tam tuhai siar cawk tuh lo i,’ ti ai nangmah in thu i khamhnak khiah hih tu hram law,” tiin ti i.

¹³ Ciata ah zankhat a cam hnuaah, a upa Esau lehsawng pe tuhin a naihnak songin a hnia lamai bangin ril i.

¹⁴ Mepui lu zahnih le mecang lu kul, tuupui lu zahnih le tuucang lu kul,

¹⁵ hnawi sut laitak kalauk pui lu sawmthum le a fate ṭen, kawlpawpui lu sawmli le kawlpawcang lu hra, laak nu lu kul le laakcang lu hra i.

¹⁶ Sumhnam phunkhat tu a hnenum pakhat kilruai ai a hnenumte hnenah, “I hmaiah feh tu ilai burkhat le burkhat tu a hla dun thah in feh tuh i si,” tiin ti i.

¹⁷ A hlantaber fehtu hnenah, “I u Esau in na tawk fangin, ‘Na bawipa aisu i? kon feh tuh isi? Na hmai ai sumbur heh aisu ai i? tiin na zawt lekhaw,

¹⁸ ‘Hemi sumbur heh na cengpa Jacob ai i. A bawipa nangmah Esau ca lehsawng na pehnak i. Amah Jacob tu kin hnuaah lai i,’ ti tuh isi,” tiin ti i.

¹⁹ A hmasaber fehtu hnenah a relhnak bangin pahnihhnak le pathumhnak le anite veksen hnenah a bangvek liang in thupe i. “Esau ning tawk fangin,

²⁰ ‘Na sal pa Jacob tu kin hnuaah lai i,’ ti tuh i si,” tiin ti i. Jacob in, i hmai ai fehhnak lehsawng in a thin nem tuh deuh ai i tawk ngaingai fangin i ngaithiam thai pang i, tiin ruat i.

²¹ A lehsawngte a hmaiah fehruai ai amah tu cia zan riahbuk ah cam i.

Jacob le Vancungmi Ruangtawnghnak

²² Cia zan khua a thim fangin Jacob tu tho ai a nupuite pahnih le a nusunte pahnih le a fate hlaikhat thawn Jabbok rawnti tan tlang i.

²³ A innkuapuite rawn ralah a hla sek hnuaah a naihnak dang hmuahhmuah khai rawn ralah thawn sek i.

²⁴ Amah lekin tang i. Cia zan ah mi pakhat in Jacob heh varciang tian buan dekdo i.

²⁵ Jacob a neh ben lo khiah a tawngtu in a ling fangin Jacob kawngpui thungkhep sawh ai, a buan dun laitak ah Jacob ai kawngpui ruh bol pelh er i.

²⁶ Ciafangin mi pa in, “I hlat tuhang, khuavar dawn ihang!” tiin ti i. Ikhalselai Jacob in, “Hmuifu i pe hlahle sikhaw na hlat tuh lo ing,” tiin ti i.

²⁷ Cen mi pa in, “Na hming aisu isi?” tiin zawt ai Jacob in, “Jacob ing,” tiin ti i.

²⁸ Cen mipa in, “Tunai panin na hming tu Jacob tiin na ko tuh nawn lo ihang. Minung thawn ituseh, Pathian thawn ituseh buan dun ai nangmah sawn in neh manin na hming Israel tuh ihang,” tiin ti i.

²⁹ Ciafangin Jacob in, “Na hming i rel tu,” tiin ngen i. Ani in, “Zaimanin i hming i zawt isi?” tiin ti ai cia hnuaah Jacob khiah hmuifu pe i.

³⁰ Jacob in, “Pathian khai hmaiton niu in hmu zo ing; ikhalselai i nung lai i,” tiin ti ai cia hmun heh Peniel tiin a hming bawn i.

³¹ Peniel in a feh sawng fangin ni suak serso i. Jacob tu a kawngbai i; zaimantifangin a kawngruh bol pelh manin i.

³² Ciamanin tun san tianin Israel ai tesinfate in sa kawngruh ai satit ai lo in dit tata i; zaimantifangin Jacob kawngruh sawh ai pelh awng manin i.