Seemthawhnak 30 - Zanniat Bible

¹ Ikhalselai a pasal Jacob ca fa pakhat khai a cawi lo Rachel in a ruat fangin a unu Leah heh iksik i. Jacob hnenah, “Fate i pe tu; ciahlahle thi tuh ing,” tiin ti i.

² Ciafangin Jacob a thinraw ai, “Pathian tu akontih in aiawh thil tuh ing? Fate na nairuai lotu heh amah Pathian i,” tiin ti i.

³ Cen Rachel in, “Ilekhaw kaimah ca fate nai ai ciatihin kaimah khai nauniu nu cang thai tuhin i sal nu Bilhah thawn pawl dun tu ih,” tiin Jacob khiah ti i.

⁴ Ciatihin Rachel in a sal nu Bilhah heh a pasal hnenah pe ai a pasal in itpui i.

⁵ Bilhah in naupai ai Jacob ca fapa nai sah i.

⁶ Ciafangin Rachel in, “Pathian tu kaimah lam ṭangin thurel i. I sawngenhnak ngai ai fapa i pe zo i,” tiin ti ai a hming ah Dan bawn i.

⁷ Cia hnuaah Bilhah in naupai lehsal ai Jacob ai fapa pahnihhnak nai i.

⁸ Ciafangin Rachel in, “I u neh tuhin a roh ngai in zuam ai nehsuak zo ing,” tiin ti ai nau hming ah Naphtali bawn i.

⁹ Leah inkhai fa nai thil leh zual lo a ling fangin a sal nu Zilpah heh Jacob ai itpui tuhin pe i.

¹⁰ Cen Zilpah in fapa nai i.

¹¹ Ciafangin Leah in, “Bawng i pha i,” ti ai a hming Gad bawn i.

¹² Leah ai sal nu Zilpah in fapa nai lala ai,

¹³ Leah in, “Zaitlukin lung i awi i. Tun tu nupang hmuahhmuah in mi lungawi tiin i ko tuh i,” tiin ti ai a hming ah Asher bawn i.

¹⁴ Cen Sangvut at can ah Reuben tu hampalak feh ai lengai thai hmu ai a nu Leah hnenah tlut i. Ciafangin Rachel in Leah hnenah, “Na fapa ai tawkhnak lengai thai tlawmniu in i sum tu ve,” tiin ngen i.

¹⁵ Ikhalselai Leah in, “I pasal i long sah heh tawk ti lai lo isim? I fapa ai lengai thai khai lang tuhlai isim,” tiin ti i. Cen Rachel in, “Na fapa ai lengai thai i pe lesikhaw tun zan tu Jacob hnenah it tuh isi,” tiin ti i.

¹⁶ Cia zan lamah Jacob tu hampalak in a tlung fangin Leah in hmuak ai a hnenah, “Tun zan tu nang heh i hnenah it kul isi, zaimantifangin i fapa tawkhnak lengai thai in Rachel hnenin na zawng zo ing,” tiin ti i. Ciatihin cia zan tu Leah thawn it kawm i.

¹⁷ Cen Pathian in Leah ai sawngenhnak tu ngai sah manin naupai ai Jacob heh fapa a pangahnak nai sah i.

¹⁸ Ciafangin Leah in, “I sal nu heh i pasal hnenah pe manin Pathian in i lehsawng i pe zo i,” tiin ti i. Ciamanin a fapa heh Issakhar tiin a hming bawn i.

¹⁹ Leah tu naupai lala ai fapa a parukhnak nai i.

²⁰ Ciafangin Leah in, “Pathian in lehsawng songlawi i pe i. Fapate paruk nai sah zo hang manin tun tu i pasal in i daih tuh ihang,” tiin ti i. Ciamanin a fapa hming ah Zebulun bawn i.

²¹ Cia hnuaah fanu pakhat nai ai a hming ah Dinah bawn i.

²² Ikhalselai Pathian in Rachel tu hai lo i. A sawngenhnak ngai sah ai fa nai thai in bawn leh i.

²³ Rachel tu naupai ai fapa nai i. Ciafangin, “Fate nai thil loin i zakthihnak heh pathian in i lang sah zo i.

²⁴ Pathian in a dang fapa i pe rih tu hram seh,” tiin a hming ah Joseph bawn i.

Jacob le Laban Thu Eldunhnak

²⁵ Joseph te hnuaah Jacob in Laban hnenah, “I hlat tuhang, i khua le i ramah tlung i nuam ihang.

²⁶ I nupuite le i fate hmuah khai i pe tulai tlung tuh ing; anite co nuam in zaitlukin na naper phatak ngai in per ing ti ling isi,” tiin ti i.

²⁷ Ciafangin Laban in, “Thurel can i pe rih tu! Nangmah i hnenah um manin Bawipa in hmuifu i pe ai i khangso i, ti khiah mipol tlahsanhnak in ling ing.

²⁸ Ciamanin na hlawhman i rel tulai na pe tuh ing,” tiin ti i.

²⁹ Jacob in, “Zaitlukin na naper per ai na sumhnamte i khal songah zaitlukin pungzai i ti khiah ling sio isi.

³⁰ Na hnenah i hleng sawng fangin tuu tlawmniu lek na naihnak heh tunah siar cawk lo ihang. Kaimah manin Bawipa in hmuifu na pe taktak i. Tun tu kaimah pumpak ca i ruat can ve ihang,” tiin ti i.

³¹ Ciafangin Laban in, “Ilekhaw ziang na pe tuh ing?” tiin zawt i. Jacob in, “Hlawh man zaikhai i daih lo i. I ngenhnak i pe tuh lesikhaw na sumhnamte heh kilkhawl rih tuh ing. I ngenhnak tu:

³² tunnia na sumhnamte lakah vak tuhai, tuuniu a hang hmuahhmuah le tuu ngan hmuahhmuah ngancip ai nganhnak ituseh, ngankau ai ngahhnak ituseh lang tuh ing. Cen me ngan hmuahhmuah ngancip ai nganhnak ituseh, ngankau ai nganhnak ituseh lang tuh ing. Ciami lek heh i hlawhman ah i daih i.

³³ Ciatihin i fel le fel lo hmai lamah ling tuh isi. I nihlawh heh na ling nuam in na zong fangin tuu a hang lo le me a ngan lo nai i hmu lesikhaw a ru ai ruhnak i ti ling tuh isi,” tiin ti i.

³⁴ Ciafangin Laban in, “Pha i, na relhnak angin bawn tuh ing,” ti i.

³⁵ Ikhalselai ciami nia rori ah Laban in mecang ngancip le ngankau ai ngan hmuahhmuah, ihlahle a ngo ai ngan hmuahhmuah le tuu hmul hang hmuah khai tumce sek ai a fapate ai khal tuhin dah sek i.

³⁶ Cen Jacob umhnak an ni thum ban ah fehpui i. Cen a tanghnak Laban ai tuu le mete ciah Jacob in khal de i.

³⁷ Cen Jacob inkhai, nempan le hiang kung ai a kakte lang ai a kawng hrekkhat a ngan in kok sek ai fungkek niuniu bawn i.

³⁸ Ciami fungkek ngan tepawl heh sumhnamte ai tikuang songah tung ai sumhnamte lamah hoih in dah i. Zaimanin hetihin dah i tifangin sumhnamte ti ding tuh a kawi tlang fangin pawl dun murhmo de man i.

³⁹ Ciatihin fungkek ngan hmaiah mete heh rai dun betbo ai fate a naihnak khiah a ngan, ngancip le ngankau ciang i.

⁴⁰ Cen Jacob in Laban tuupuite heh tumce sek ai a cang thawn a dang ah dah sek i; ciaben fangin Jacob ai tuucang a ngan le a hang tepawl thawn pawldunruai i. Ciatihin Laban ai tuurual songah Jacob in tuu hmulngan suak thai in bawn ai pungzairuai betbo i.

⁴¹ Cen sumhnam lakai a ci pha le a hat pawl a pawl dun fangin fa ngan nai thai tuhin a fungkek ngan tepawl heh tikuang songah amahte hmaihoih in dah sah i.

⁴² Ikhalselai sumhnam a hnawmtam pawl a pawl dun fangin fungkek ngan dah sah lo i. Ciamanin sumhnam a hnawmtam pawl tu Laban covo cang ai a hat deuh pawl tu Jacob covo cang i.

⁴³ Ciatihin a rai hlanah Jacob tu milian ngai cang i. Sumhnam tampui, sal nu le sal pa, kalauk le laak tampui nai i.