Seemthawhnak 29 - Zanniat Bible

Jacob Tu Laban Inn Hleng I

¹ Cen Jacob tu feh betbo ai Nisuah lam mite ram lamah feh i.

² Cen rinlopui in hampalak ai namkum pakhat ah hleng ai a hiangah tuurual, rual thum bual tlang khiah hmu i. Ciami namkum ai ti khiah tuute dingruai de i. Namkum sinhnak lungtleppui tu a lianpui i.

³ Tuu hmuahhmuah a hleng khim fangin tuukhalte in lungtleppui thawn ai a tuute ti tul de i. Ti ding ben fangin sin leh de i.

⁴ Jacob in anite hnenah, “I rualte, akon lamin kawi i si?” tiin zawt ai anite in, “Haran khua an,” tiin sawn i.

⁵ “Nahor ai fapa Laban ling aw i sim?” tiin a zawt fangin, “Ling i ing,” tiin ti tlang i.

⁶ “Cak aw lai im?” tiin a zawt lala fangin anite in, “I, cak i; sik tu, a fanu Rachel heh a pa tuurual thawn kawi bang hang!” tiin ti tlang i.

⁷ Cen Jacob in, “Ni sangpui lai ai tuu tlun cu lai lo napui zaimanin ning tuute ti tul in hlat leh lo i si?” tiin ti i.

⁸ Anite in, “Ciatih ilo i; tuurualte hleng khim fangin lungto pui heh thawn hmasa tuh i ing; cia hnuaah ti tul tuh i ing,” tiin ti i.

⁹ Ciatihin Jacob le tuukhalte a pon dun laitak ah Rachel tu a pa tuurual thawn hleng i. A pa tuukhaltu heh amah Rachel i.

¹⁰ Cen a pu Laban ai tuurual thawn Rachel kawi khiah Jacob in a hmu fangin namkum ah kawi ai lungtleppui heh tul ai a pu Laban tuurual heh ti tul sah i.

¹¹ Cen Rachel heh thut ai awsuak in kap i.

¹² Rachel hnenah, “Na pa ai farnu Rebecca ai fapa ing,” tiin rel i. Ciafangin Rachel heh dawp teu ai a pa hnenah rel i.

¹³ A pa Laban in a tupa Jacob thu a za fangin a hmuak tuhin dawp ai a tawk fangin kuah in thut i. Cen a inn ah tlun i. Cen Jacob in a thu hmuahhmuah heh a pu Laban hnenah a khimniu in rel i.

¹⁴ Laban in, “I thi le i tisa ngaingai isi,” tiin ti i. Ciatihin Jacob tu a pu hnenah hlakhat pum um i.

Jacob In Laban Ai Naper Per I

¹⁵ Laban in Jacob hnenah, “I songkhat na imanin a lovang in naper tuh tu cang thil lo i; na hlawhman zaizah na pe tuh ing?” tiin zawt i.

¹⁶ A pu Laban tu fanute pahnih nai i; a fanu upasawn hming tu Leah i ai a nauta sawn hming tu Rachel i.

¹⁷ Leah tu a mit mawi i; Rachel tu ruangrai pha ai a hmel khai pha i.

¹⁸ Jacob in Rachel daih manin a pu Laban hnenah, “Na fanu nauta Rachel co tuhin na naper kum sarih song per tuh ing,” tiin ti i.

¹⁹ Laban in, “Pha tuh i, i hnenah um tu. Midang hnenah i fanu umruai tahin na hnenah umruai i nuam sawn i,” tiin ti i.

²⁰ Ciamanin Jacob tu Rachel co tuhin kum sarih song naper i; ikhalselai Rachel a daih ze manin cia kum sarih heh camkhatniu vuah i.

²¹ Cen Jacob in Laban hnenah, “Kin nitiamhnak khim zo ai i nupui tuhin na fanu i hoiruai tuhang,” tiin ngen i.

²² Ciamanin Laban in hoidunhnak puai bawn ai khuasen in sawm i.

²³ Ikhalselai cia zan ah Rachel tumrul ah Leah sawn a pa in Jacob hnenah pe ai Jacob tu Leah thawn it kawm i.

²⁴ Laban in a fanu Leah kilkhawltu tuhin a sal nu Zilpah heh Leah hnenah pe i.

²⁵ A thangha fang ian in Leah i ti khiah Jacob in ling i. Ciafangin Jacob in Laban khiah, “I vumah zaimanin hetihin bawn isi? Rachel co tuhin na naper per ta lo ing? Zaiman hetihin i zawl isi? tiin ti i.

²⁶ Cen Laban in, “Kin ramah fanu upa pasal nai hlanah fanu nauta sawn pasal naidan lo i.

²⁷ A dang kum sarih song i naper per rih tuh lesikhaw mopuai zarh khat song iang rih tulai Rachel na pe tuh ing,” tiin ti i.

²⁸ Ciami tu Jacob inkhai a lungkhim ai zarh khat song hoidunhnak puai a bo fangin Laban in a fanu Rachel heh Jacob nupui tuhin pe i.

²⁹ Rachel kilkhawltu tuhin a sal nu Bilhah khai Rachel hnenah pe i.

³⁰ Cen Jacob in Rachel khai itpui ai Rachel tu Leah tahin daih sawn i. Ciatihin Laban ai naper per in a dang kum sarih um lehthio i.

Jacob Ai Fate

³¹ Jacob in Leah tu daih deuh lo i ti khiah Bawipa Pathian in a hmu fangin fa nairuai i. Ikhalselai Rachel tu fa nai loin um ngio i.

³² Leah tu naupai ai fapa nai i. Cen, “Bawipa in i rimsuhnak i hmu zo i; tun tu i pasal in i daih tuh ihang,” tiin ti ai a fapa hming ah Reuben bawn i.

³³ Cen fa pai lehsal ai fapa nai i. Cen Leah in, “Pasal ai daihhnak ilo ing ti khiah Bawipa in i ling i; ciamanin fapa i pe i,” tiin ti ai a fapa hming ah Semeon bawn i.

³⁴ Fa pai ai fapa nai lala i. Ciafangin, “Fapate pathum nai hang manin i pasal tu i hnenah kop deuh tuh ihang,” tiin ti ai a fa hming ah Levi tiin bawn i. (Levi tihnak tu Hebrew in kop tihnak thawn a awsuah bang dun i).

³⁵ Cia hnuaah naupai ai a dang fapa pakhat nai lehthio ai, “Tun tu Bawipa thangphat tuh ing,” tiin ti ai a hming ah Judah bawn i. Ciahnua tu fa nai lo ihang.