Seemthawhnak 28 - Zanniat Bible

Isaac In Laban Hnenah Jacob Hlat I

¹ Cen Isaac in Jacob heh ko ai hmuifu a pe hnuaah, “Canaan nupang tu hoi tuh lo isi.

² Thilpai tulai Masopotamia ram, na nu ai pa Bethuel ai inn ah feh tu. Ciata ai nupang, na pu Laban ai fanu pakhatkhat hoi tu.

³ Cungnungber Pathian in ning hoidunhnak hmuifu pe tu selai fate tampui nai in miphun tampui ai pa na cangruai tuseh.

⁴ Pathian in Abraham hmuifu a pe bangin nangmah le na tesinfate heh hmuifu ning pe tuseh; Pathian in Abraham hnenah a pehnak na umhnak ram heh co tu law,” tiin ti i.

⁵ Cen Isaac in Jacob heh Masopotamia ram Aram mi Bethuel ai fapa Laban hnenah hlat i. Laban tu Jacob le Esau nu Rebecca ai hmingpa i.

Esau In Nupui Dang Nai I

⁶ Cen Isaac in Jacob tu hmuifu pe ai mohoi tuhin Masopotamia ramah hlat i ti khiah Esau in ling i. Ciahlaiah a pa in Jacob hmuifu a pe fangin Canaan mi nupang tu hoi tuh loin kham ai,

⁷ Jacob in a nu le a pa thu a ngai manin Masopotamia ramah a fehhnak thu khai ling fawn i.

⁸ Ciafangin a pa Isaac in Canaan nupangte tu daih lo i, ti khiah Esau in ling ngah i.

⁹ Ciamanin Abraham ai fapa Ishmael hnenah Esau feh ai, a hoi sa nupuite hlai in a dang pakhat, Ishmael ai fanu Nebaioth ai farnu, Mahalath hoi i.

Bethel Ah Jacob Ai Mang

¹⁰ Cen Jacob tu Beersheba in suak ai Haran lamah feh i.

¹¹ Hmun pakhat ah hleng ai ni tla zo manin ciata ah cam i. Lungto pakhat a lukhum in hmang ai it i.

¹² Cen a mang ah lai in van a khun kaipum saupui hmu i. Pathian vancungmite khai ciami kaipum vumah kai tuak tolh tuak hnelhno i.

¹³ Cen Bawipa tu a hiangah ding i. Ciafangin Bawipa in, “Kai tu na pa Abraham le Isaac ai Pathian Bawipa ing. Na ithnak hmun le ram heh nangmah le na tesinfate ning pe tuh ing.

¹⁴ Na tesinfate tu laivum ai laivut zah tuh i. Amahte ram heh nisuah nitlak, sak lam le hlang lamah kau tuh betbo i. Nangmah le na tesinfate hmuifu i pe bangin laivum ai miphun hmuahhmuah inkhai hmuifu i ngen tuh i. Nangmah le na tesinfate hmuifu i pe bangin lailung vum mi zongzong in hmuifu i ngen tuh i.

¹⁵ Na hnenah um tuh ing, na feh hmuncang ah na huphim tuhai he ramah na letruai leh tuh ing. I thukhamhnak hmuahhmuah i khimruai hlanlo na zam tuh hrimhrim lo ing, ti khiah hai malaw,” tiin ti i.

¹⁶ Ciafangin Jacob heh phawk ai, “Bawipa tu he hmunah lo um ziar napui ling loin um ing,” tiin ti i.

¹⁷ Cen Jacob tu a thin lau in, “Zaitlukin tihikkul hmun i. Vancung kotka le Bawipa ai inn ngaingai ilo im?” tiin ti i.

¹⁸ A thangha zingniu in Jacob tu tho ai a lukhum lungto heh hihhlenhnak lung hrangah bir i. Cen sathau burh ai Pathian hnenah ap i.

¹⁹ Jacob in ciami hmun heh Bethel tiin a hming bawn i. Hlanlai ah cia khua heh Luz tiin ko awng i.

²⁰ Cia hnuaah Jacob in Bawipa Pathian hnenah, “I hnenah um ai, i fehhnak lampui ah i huphim ai, aih tuh rong le silh tuh hnikpon i pe hlaiah,

²¹ i pa inn ah himniu in hleng ben lengkhaw Bawipa nangmah heh i Pathian ngaingai tuh isi.

²² Hemi i birhnak hihhlenhnak lungphum heh Pathian nangmah ai inn i tuhai na pehnak hmuahhmuah songin sawm ah pakhat na pe tuh tengteng ing,” tiin thukhamdunhnak bawn i.