Seemthawhnak 27 - Zanniat Bible

Isaac In Jacob Hmuifu Pehnak

¹ Isaac tu hlombawr zo ai a mit khai vai ihang. Ciamanin a fapa upa sawn Esau ko ai, “I fapa,” tiin ko i. Esau in, “Heta ah um ing,” tiin ti i.

² Isaac in, “Hlom i bawr zo ihang, i thi cing tuh i.

³ Na vang, na li le thal lang tulai, kaimah ca hampalak ah sa zul ta tu.

⁴ Cia sa tu i duhdan in a ur niu in suang tulai i pe tu. Ai tuhai i thi hlanah hmuifu na pe tuh ing,” tiin ti i.

⁵ Ciatihin Isaac in a fapa Esau hnenai a ponghnak heh Rebecca in ngai hlen i. Cen Esau in a pa ca hampalak lamah sa a zul laitak ah,

⁶ Rebecca in Jacob hnenah, “Na pa in Esau hnenah,

⁷ ‘Sa i tlut tulai rong ur niu i suan tu. Ai tuhai i thi hlanah Bawipa ai hmaiah hmuifu na pe tuh ing,’ tiin mitua niu ah a ti za ing.

⁸ Ciamanin i fapa, i thu i ngai tulai i relhnak bawn tu.

⁹ Kin sumrual lakah feh tulai, me niu lu hnih in pom tulai i hnenah i koih sah tu. Sua tuhai na pa duhdan in bawn tuh ing.

¹⁰ Ciatihin na pa hnenah a ai tuh pe tuh isi, a thi hlanah hmuifu na pe tuh i,” tiin ti i.

¹¹ Ikhalselai Jacob in a nu hnenah, “I nu, i upa Esau tu hmul tampui nai ai kai tu taksa nalmi ing ti ling isi.

¹² I pa in i dai pang selai i zawl i, ti i ling tuh thotho lo im? Ciatihin hmuifu co ngah loin cukcamhnak sawn i vumah hleng pang tuh i,” tiin ti i.

¹³ Ciafangin a nu in, “I fapa, cukcamhnak hleng lekhaw i vumah hleng tuseh, i relhnak bawn tu sawn; feh tu taito lai me niu i pom sah tu,” ti i.

¹⁴ Jacob tu feh ai a nu hnenah me niu koih i; Cen a nu in a pa duhdan in suan i.

¹⁵ Cen Esau ai thilthuam phaber, a nu ai dahsahhnak heh Rebecca in lang ai Jacob silruai i.

¹⁶ A nu in Jacob ai bante le hmul um lo hmun a hawng ah mephaw in tuam sah i.

¹⁷ Cen rong ur ngai le sang a bawnhnak heh a nu in Jacob koihruai i.

¹⁸ Ciatihin Jacob tu a pa hnenah kawi ai, “I pa” tiin ko i. A pa in, “Awi, i fa, aisu sawn isi?” tiin zawt i.

¹⁹ Jacob in, “Na fa upa Esau ing, na relhnak bangin bawn zo ing. Ninghioniu in to tulai i suanghnak sa ai in hmuifu i pe tu,” tiin ti i.

²⁰ Isaac in, “Akontih in ciatihin rang ngai in ngah isi, i fapa,” ti i. Ciafangin Jacob in, “Bawipa na Pathian in i bawm manin ngah ing,” tiin ti i.

²¹ Cen Isaac in Jacob hnenah, “Kon i, na dai thai tuhin i nong tu deuh. I fapa Esau peupeu maw, ilo isi?” tiin ti i.

²² Jacob in a pa khiah a nong fangin a pa in dai ai, “Na aw tu Jacob aw bang napuikhaw na ban tu Esau ban bang fawn i,” tiin ti i.

²³ Isaac in Jacob tu lingthiam lo i, zaimantifangin Esau ban bangin hmul nai ve sio i. Hmuifu a pe tum fangin a pa in,

²⁴ “I fapa Esau peupeu aw sim?” tiin zawt lala i. Jacob in, “Ing,” tiin ti i.

²⁵ Ciafangin Isaac in, “Na suanghnak sa i pe tu; ai tuhai hmuifu na pe tuh i ing,” tiin ti i. Jacob in sa heh pe ai a dit tuhin cabitti khai pe i.

²⁶ Cen a pa in, “I fapa, i nong ah kawi tulai i thut tu,” tiin ti i.

²⁷ Ciatihin Jacob tu a pa hnenah kawi ai a pa a thut fangin a pa in a hnikpon rim hnim ai cia hnuaah hmuifu pe i. “Hemi i fapa rimhmui niu cenin, Bawipa ai hmuifu pehnak hampalak rim bang i.

²⁸ Pathian in van ai nai fim na burh in, Na lairam heh rampha cang tuseh. Fang le Cabitti tampui na pe tuseh.

²⁹ Miphun tampui in na naper per tlang tuseh. Mi tampui na hmaiah ut tlang tuseh; Na songkhatte vumah lal na cang tuseh. Na unau ai tesinfate tu na hmaiah ut tlang tuseh; Cuk na camtute tu cukcamhnak tuar tu ve seh, hmuifu na petute tu hmuifu co tu ve seh,” tiin ti i.

Esau In Isaac Ai Hmuifu Ngen I

³⁰ Ciatihin a pa Isaac in hmuifu a pe ben fangin Jacob heh suak i. Ciaben sawng fangin a sa zul hmun an Esau tlung i.

³¹ Ani inkhai rong ur niu suang ve ai a pa hnenah koih i, “I pa, ninghio niu in to tulai, na fapa ai koihhnak sa ai in hmuifu i pe tuhang law,” tiin ti i.

³² Isaac in, “Aisu isi?” tiin zawt i. Ani in, “Na fapa upa Esau ing,” tiin ti i.

³³ Ciafangin Isaac tu a pumpuhluk hlin in thing biakbo ai, “Ciatih ilekhaw sa kap ai i hnenah a koihtu heh aisu i? Na hleng hlanniu ah ai zo ing. A hnuataber i hmuifu heh amah pe zo ai kumzangza in amah ai ihang,” ti i.

³⁴ Esau in ciami a za fangin, lungsia in kap ruangro i; “I pa, na hmuifu i pe tu ve,” tiin a kap kongin ngen i.

³⁵ Ikhalselai Isaac in, “Na nau kawi ai i zawl i. Na hmuifuhnak co zo sek ihang,” tiin ti i.

³⁶ Cen Esau in, “Tun a vel hnih i zawlhnak ihang. Jacob tiin a kohnak heh dik i. Hmasa ah upahnak i long zo ai; tun i hmuifuhnak i long lala i. Kaimah ca hmuifuhnak zai niu tengtal i khawi lo isim?” tiin ti i.

³⁷ Ciafangin Isaac in, “Ani tu na vumah Bawi tuhin bawn zo ai a songkhatte tianin a naper pertu tuhin bawn zo sio ing. Rong le cabitti khai pe zo sio ing. Zaiber nangmah ca tang tuh ihang? i fapa” tiin Esau heh ti i.

³⁸ Ikhalselai Esau in ngen rih thotho ai, “Maw i pa, hmuifu pakhat lek nai isim? Kai khai hmuifu i pe tu ve, tiin ti ai Esau tu roh ngai in kap i.

³⁹ Ciafangin Isaac in, “Na caah lai le ram pha um lo ihang, Na lairam ca van ai nai khai um lo i.

⁴⁰ Na vangsau ring in nung nga sikhaw, Na nau ai cengfa na cang tuh i. Ikhalselai ral na tho fangin, a ukhnak songin suak tuh isi,” tiin ti i.

⁴¹ A pa in Esau co tuhhnak hmuifu heh Jacob pe sek manin Esau in Jacob khiah hua ai, “I pa khai a rai nung tuh lo ngawn ihang, a thi hnuaah i nau Jacob heh rek leh tuh ing,” tiin a thinlung niu in ruat i.

⁴² Ikhalselai Esau tumhnak tu Rebecca in a ling fangin Jacob heh ko i. “Ngai tu, na upa Esau in nangmah na rulthun tum ai na rek tum i.

⁴³ Ciamanin, i fapa i relhnak bangin bawn tu. Rang ngai in pai tulai Haran khua ai i hmingpa Laban hnenah tlan tu.

⁴⁴ Na upa thinrawhnak a lawm ai,

⁴⁵ a vumai na thil bawnhnak a hai sek tian na pu hnenah um tu. Cia hnuaah mi pakhatkhat hlat tuhai na ko leh tuh ing. Zaimanin ni khat songah i fapate pahnih pairal tuh akontih in siang thil tuh ing?” tiin ti i.

⁴⁶ Cen Rebecca in Isaac hnenah, “Esau ai hoihnak miphundang a nupuite heh i ning ze ai i kham ze i. Hebang Hit phun nupang Jacob in hoi ve lekhaw kai tu thi sawn lengkhaw pha tuh sawn i,” tiin ti i.