Seemthawhnak 20 - Zanniat Bible

Abraham Le Abimelech

¹ Abraham tu Mamre in Negev ramah thawn ai Kadesh le Shur karlak ah um i. Ciahnua Gerar ah a um laiah,

² Abraham in a nupui Sarah heh i farnu i, ti manin Gerar kumpibawi Abimelech in a nupui tuhin lang i.

³ Cia zan tu Abimelech ai mang ah Pathian lar ai Pathian in, “Na thi tuh i, zaimantifangin Sarah heh mi nupui i,” tiin ti i.

⁴ Ikhalselai Sarah tu Abimelech in pawl lai lo manin, “Bawipa, mipha khai rek tuh pah isim?

⁵ Abraham in i farnu i, ti ai amah Sarah inkhai Abraham heh i hmingpa i ti fawn i. Ciamanin thil i bawnhnak heh Thinlung ciang niu ai i bawnhnak i; sualhnak nai lo ing,” tiin Abimelech in ti i.

⁶ A mang thotho ah Pathian in, “I, thinlung thiangniu in bawn isi ti ling ing; ciamanin kaimah hmaiah misual na cang tuh loin Sarah na dairuai lo ing.

⁷ Ikhalselai tunah Sarah khiah a pasal hnenah fehruai leh tu. A pasal tu prophet i ai na thi tuh loin nangmah ca saw na nget tuh i. Ikhalselai letruai leh hlahle sikhaw nangmah le ning songkua in ning thi tuh tengteng i; ralringhnak tunin ning pe ing,” tiin ti i.

⁸ A thangha zingniu in Abimelech tho ai a hnenumte ko sio ai ciami thu heh a khimliang in rel i. A hnenumte tu a thinlau ngai i.

⁹ Cen Abimelech in Abraham khiah ko ai a hnenah, “Zaimanin kin vumah hebang bawn isi? Ziang sualhnak na vumah bawn manin hetluk thil laukul heh kaimah le i ram vumah hlengruai isi? I vumah na bawnhnak heh aisu inkhai bawn awng lo i.

¹⁰ Zaimanin hetihin bawn isi?” tiin zawt i.

¹¹ Ciafangin Abraham in, “Pathian a kihzahtu he ramah um tuh lo ai i nupui co nuam manin i rek tuh zel i, tiin ruat manin ing.

¹² Ciahlaiah Sarah tu i farnu taktak i. Ani tu i pa ai fanu i, ikhalselai i nu ai fanu tu ilo i; ciamanin hoi ing.

¹³ Ciamanin Pathian in i pa inn in ramdang ah i hlat fangin, “I vumah sangtlak na ihnak larruai tuhin, i hmingpa i tiin kin hleng hmuncang ah ti tuh isi,” tiin Sarah heh tiam cia ing,” tiin ti i.

¹⁴ Ciafangin Abimelech in Sarah heh Abraham hnenah pe leh i; ciahlaiah tuu, kawlpaw le sal tampui khai pe cih i.

¹⁵ Cen Abraham hnenah, “Hemi ram hmuahhmuah heh kaimah ai i; na hiam hmunhmun ah um tu,” tiin ti i.

¹⁶ Cen Sarah hnenah, “Na hmingpa hnenah ngun tangka thawng khat pe ing. Ciami tu na hiangai a umtu minung hmuahhmuah hnenah mawh nai lo na ihnak larruaihnak i. Mi zongzong in sualhnak zaikhai bawn lo i ti na ling tuseh,” tiin ti i.

¹⁷ Abraham nupui Sarah vumah ciatihin thil bawn tlang manin Bawipa in Abimelech innsong ai nupang hmuahhmuah khai fa nai thil loin bawn sek i.

¹⁸ Ikhalselai Abraham in Abimelech ca sawnget ai Pathian in Abimelech le a nupui le salnute heh cakruai leh ai fate khai nai thil leh i.