Seemthawhnak 18 - Zanniat Bible

Isaac Tehnak Thukham

¹ Bawipa tu Mamre ai hlokhli thingkung hmunah a ummi Abraham hnenah lar i. Abraham tu a riahbuk dawngkham ah, sun nisa laitak ah to ai,

² a sik fangin cammalak in mite pathum ding tlang hmu i. A hmu sawngpah in a hmuak tuhin a dawngkham in dawp i. A hmai laipua tong tianin bok ai,

³ “I bawipate, ning i hio le i sikhaw i inn ah cawlum loin i khel teu mah ih. Ning sal pa ing ai ning daih angin ning ruaihtu tuh ing.

⁴ Ning kesomhnak tuh hrang ti koihruai tuhai he thingkung hniaah com rih tu ih.

⁵ Rong ning koih sah tuhai ning fehhnak lampui ah thazang nai tuh deuh i si. I inn ah ning hleng zo manin, ning tuamhlawmtu tuh ing,” tiin ti i. Anite in, “Nangmah naihhla, na relhnak angin bawn tu,” tiin ti tlang i.

⁶ Abraham tu a riahbuk songah rang ngai in lut ai Sarah hnenah, “Na sangvut lakai a phaber teh thum in suak tulai, rang ngai in sang bawn tu,” tiin ti i.

⁷ Cen a kawlpawrual lakah dawp ai kawlpaw dawnniu lu khat, a mom ber a sa ur laiteng khiah rang ngai in suang tuhin a hnenumte hnenah pe i.

⁸ Abraham in kawlpawhnawi thur, kawlpawhnawi le a suanghnak kawlpawsa khiah lang ai a mikhualte hmaiah ai tuhin dah sah i. Anite in ai tlang i; cen Abraham in thing hniaah ding in kil hlen i.

⁹ Cen a mikhualte in, “Na nupui Sarah tu akonah i?” tiin zawt tlang i. “Riahbuk songah um hlen i,” tiin sawn i.

¹⁰ Mikhual pakhat in, “Hmai kum tun camcu fangin na nupui Sarah in fapa nai tuh i; ciafangin heta ah kawi lehsal tuh ing,” tiin thu tiam i. Sarah in mikhual pa hnua lam riahbuk dawngkham in a thurelhnak ngai hlen i.

¹¹ Abraham le Sarah tu hlombawr kawm zo ai Sarah tu nupangdan nai lo ihang.

¹² Ciamanin Sarah in, “Kai tu i tar zo i, pasal thawn pawl dun in hiamhnak tang nai tuhlai ing maw? Ciahlaiah i bawipa le a tar ze ve zo i,” tiin a hni kongin ti i.

¹³ Bawipa in Abraham hnenah, “zaimanin Sarah tu a hni kongin, ‘I tar zo hnuaah fa nai thil tuh peupeu ini ing?’ ti i.

¹⁴ Bawipa ca a harhnak zaikhai um lo i? Hmai kum a can khim fangin na hnenah kawi lehsal tuhai Sarah in fapa nai tuh tengteng i,” tiin ti i.

¹⁵ Ikhalselai Sarah tu a thinlau ai, “Hni lo ing” tiin ti i. Bawipa in, “Hni isi,” tiin ti i.

Sodom Hrangah Abraham Sawngen I

¹⁶ Cen a mikhualte tu tho tlang ai, Sodom khua hmuthilhnak hmunah feh tlang i. Abraham in anite heh vaihla i.

¹⁷ Ciafangin Bawipa in, “Thil i bawntumhnak heh Abraham hnenin thup thil lo ing.

¹⁸ A tesinfate tu miphun lianpui le miphun hat ngai cang tuh sio ai, amah hmuifu i pe bangin laivum miphun hmuahhmuah in hmuifu i ngen tuh i.

¹⁹ A dik le a dikcang bawn in i thupeciahnak hlunthilhnak tuhin a fate le a songkhatte thuzirh tuhin amah ril zo ing. Ciamanin i thukhamhnak hmuahhmuah heh a vumah khimruai tuh sio ing,” tiin ti i.

²⁰ Cen Bawipa in, “Sodom le Gomorrah mite mawhhnak heh a lian ze le amahte sualhnak tam ze hlaihlawr zo i.

²¹ Zuktolh ta ngangkhaw amahte mawhhnak i zahnak heh cul tuhai thufiang ling tuh ing,” tiin ti i.

²² Abraham ai mikhualte pahnih tu Sodom khua lamah feh kawm i; ikhalselai Bawipa tu Abraham hnenah tang hlen i.

²³ Abraham in Bawipa hnen nong ai, “Mihrokhrawl pawl lakah mipha pawl khai siatsuah tuh sek thotho isim?

²⁴ Sodom khua songah mipha sawmnga um bang selai, a khuapuite veksen in siatsuah tum thotho isim? Mipha sawmnga him tuhin cia khua heh zuah tuh lo isim?

²⁵ Mihrokhrawl pawl thawn hmunkhat in mipha pawl khai rek tuh sek isim? cang thil lo i, ti tuh na um lo ing. Ciatihin bawn lesikhaw a mawhmi angin midikcangte khai cawhhnak tuar tuh ve im? Ciami tu a cang thil lohnak i. Lailung vum hmuahhmuah thukhantu in dikcanglairelhnak in thukhan tuh lo isim?” tiin Abraham in ti i.

²⁶ Ciafangin Bawipa in, “Sodom khua songah mipha sawmnga um lekhaw cia sawmnga manin khuasenpui in zuah tuh ing,” tiin ti i.

²⁷ Abraham in, “Aw Bawipa kai tu laivut le vutkuang ing ai na hnenah zaikhai relthilhnak nai lo ing. A ralphadan iti siang malaw.

²⁸ Sodom khuasong ah mipha sawmnga khim sam ngio ai sawmli le panga lek iselai tang ciami panga khim sam manin siatsuah tuh thotho isim?” tiin ti i. Ciafangin Bawipa in, “Mipha sawmli le panga um lekhaw siatsuah tuh lo ing,” ti i.

²⁹ Cen Abraham in, “Sawmli lek um selai tang,” ti lehthio i. Bawipa in, “Sawmli um lekhaw siatsuah tuh lo ing,” ti i.

³⁰ Abraham in, “Aw Bawipa na thinraw siang rih malaw, na zawt rih tuh ing; sawmthum lek um selai tang akontih tuh i?” tiin zawt lala i. Bawipa in, “Sawmthum um lekhaw siatsuah tuh lo ing,” ti i.

³¹ Abraham in, “Na zawt i ngamhnak heh, aw Bawipa, i ngaithiam tu hram; santehhnak ah kul lek tawk in tang akontih tuh i?” tiin zawt lala i. Bawipa in, “Mipha kul um lekhaw he khuapui heh siatsuah tuh lo ing” tiin ti thotho i.

³² Cen Abraham in, “Bawipa, na thinraw rih malai, vel khatniu na zawt rih ngang: sawmkhat lek tawk in tang zaitin ti tuh isi?” tiin zawt i. Bawipa in, “Sawmkhat um peupeu lekhaw siatsuah tuh lo ing,” tiin ti i.

³³ Abraham ai thu zawt ben fangin Bawipa tu feh teu ai Abraham khai a inn ah tlung i.