Seemthawhnak 16 - Zanniat Bible

Hagar Le Ishmael

¹ Cen Abram ai nupui Sarai in fa pakhat khai nai lo i. Ikhalselai Sarai in Egypt miphun Hagar tihnak sal nu pakhat nai i.

² Sarai in Abram hnenah, “Sik tu, Bawipa in fa i nairuai lo i! Zaimanin i sal nu thawn it kawm ngawn lo i si? amah in kaimah ca fa nai thai hmio i,” tiin ti i. Cen Abram in Sarai thu ngai i.

³ Ciamanin Sarai in a sal nu, Egypt miphun Hagar heh Abram nupui tuhin pe i. Canaan ramah Abram kum hra a um hnuaah thil canghnak i.

⁴ Abram le Hagar tu pawl dun ai Hagar in naupai i. Hagar in naupai ing ti a ling fangin puarthau ai a bawinu Sarai heh zohsuam i.

⁵ Ciafangin Sarai in Abram hnenah, “Hagar in hetihin zoh i suam heh nangmah mawhhnak i. I sal nu heh kaimah in na pe ing. Ikhalselai naupai zo ing ti a ling sawngpah in zoh i suam dekdo i. Bawipa in nang maw kaimah, aisu dik sawn deuh ti thu kin khan tu hram seh,” tiin ti i.

⁶ Cen Abram in, “Hagar heh na sal nu i; nangmah in uk isi; na nuam angin bawn tu,” tiin Sarai hnenah ti i. Ciafangin Sarai in Hagar heh tlatsia ngai in reem ai Hagar ciah tlan teu i.

⁷ Ciatihin Hagar tu Shur lamah tlan ai ramcar ai cirhti hiangah Bawipa ai vancungmi in tawk i.

⁸ Vancungmi in a hnenah, “Sarai ai sal nu Hagar, akonan hleng ai akonah feh tuh isi?” tiin zawt i. Hagar in, “I bawinu Sarai hnenin tlan ing,” tiin ti i.

⁹ Vancungmi in, “Sarai hnenah tlung lehsal tulai a kuthnia ah um tu,” tiin ti i.

¹⁰ “Aisu inkhai siar cawk lo, Tesinfa tampui na pe tuh ing;

¹¹ Fapa nai tuhai, a hming Ishmael tiin bawn tu; Zaimantifangin Bawipa in na rimsu tuarhnak na ngai sah i.

¹² Ikhalselai na fapa tu Laak he bang cang tuh i. Mi zongzong ralcai tuhai, Mi zongzong in ral thun tuh ve i; A songkhatte thawn khai um tlang tuh lo i,” tiin ti i.

¹³ Ciafangin Hagar in, “Pathian tu hetengah tawk rori ai nung tang i nung ilai im? tiin amah veve ti dun i. Cen a hnen kawi ai a pongtu Bawipa khiah a hming ah, “El-roi,” tiin ko i.

¹⁴ Ciamanin Kadesh le Bered karlak ai tikhur heh mi zongzong in, “Beer-lahai-roi,” tiin ko de i.

¹⁵ Cen Hagar in Abram ai fapa nai ai a hming heh amah Abram in Ishmael tiin bawn i.

¹⁶ Abram tu Hagar ai fapa a nai fangin a kum sawmriat le kum ruk i.