Seemthawhnak 15 - Zanniat Bible

Abram Hnenai Pathian Thukham

¹ Cia hnuaah Abram hnenah Bawipa lar ai, “Abram, na thinlau mah; kaimah heh na huptu lum ing. Na hnenah lehsawng heh uak ngai in na pe tuh ing,” tiin rel i.

² Ciafangin Abram in, “Aw Pathian Bawipa, fa nai lo ing. I hnenah na pe tuhhnak lehsawng heh ziang phathnem i? I rocotu heh Damascus khuami Eliezer lek i.

³ Fa pakhat khai nang in i pe lo ai, ciamanin i ro heh i sal pakhat in cokul tuh i,” tiin ti i.

⁴ Cen Bawipa in Abram hnenah, “Hemi na sal pa heh na rocotu tuh ilo i; na rocotu heh nangmah ai fapa rori i tuh i,” tiin rel lehsal i.

⁵ Bawipa in Abram heh sumpua ah suahpui ai, “Van sik tulai arsite siar ben lesikhaw siar tu; khia arsite zah in na tesinfate tam tuh i,” tiin ti i.

⁶ Cen Abram in Bawipa heh sang ai ciami sanghnak khiah Bawipa in dikcanghnak ah co sah i.

⁷ Cen Bawipa in Abram hnenah, “Kai tu Bawipa ing. Hemi ram heh nangmah ai cangruai tuhin Chaldia ram Ur khua an na thawnruai ing,” ti i.

⁸ Ikhalselai Abram in, “Aw Pathian, i Bawipa akontih in kaimah ai i ti ling thil tuh ing?” tiin zawt i.

⁹ Ciafangin Pathian in, “I hnenah kum thum khim kawlpawla lu khat, kum thum khim me la lu khat, kum thum khim tuucang lu khat, khuro pakhat le laileng pakhat koih tu,” tiin ti i.

¹⁰ Abram in Pathian hnenah amahte veksen in koih ai, a laiteng ṭen in a tlambok in tlam ai a tlambok khatta heh a dang pakhat hmaiah artlang in tluan hnih in dah i; vaniu sa tu tlam lo i.

¹¹ Langtarte in sa a fem tum fangin Abram in hung ai hnawt i.

¹² Zan lam nitla cuahco fangin Abram tu mitmu muang ngai in mitmu i. Ciafangin a hnenah a laukul khuathim hleng i.

¹³ Bawipa in a hnenah, “Na tesinfate ramdang ah mi vaivak cang tuh i. Cia ramah sal cang tuhai kum za li song saltang tuh i.

¹⁴ Ikhalselai na tesinfa a hnawmcantu ram heh cawh tuh ing; hlawnthil tampui thawn anite tu cia ram an suak leh tuh i.

¹⁵ Nang tu nunnuam in tarkun tian hlombawr in na nung tuhai thinnuam niu in na thi tuh i; cen na phum tuh i.

¹⁶ Na tesinfate tu san lihnak fangin he ramah tlung lehsal tuh i; zaimantifangin heta ai Amor mite heh mihrokhrawl ah cang tuhai cawhhnak a tuar fang ian in he ram an hnawt tuh sek ing,” tiin ti i.

¹⁷ Cen nitla ai khua a thim fangin, cammalak in khu ai a ko hluahhlo bel le ko hluahhlo maifar khiah lar ai sa tluan hnih ai pumhnak karlak in kan zuahzo i.

¹⁸ Cia nia ah Bawipa in Abram hnenah thutiamhnak bawn ai, “Hemi ram hmuahhmuah heh na tesinfate hnenah pe tuh ing tiin thu na kham ing. Egypt ramri ai rawnti in Euphrates runpui tian tuh i.

¹⁹ Cen Ken ram, Keniz ram, Kadmon ram,

²⁰ Hit ram, Perizz ram, Rephaim ram,

²¹ Amor ram, Canaan ram, Girgash ram, Jebus ramte khai tel i,” ti i.