SAAM LABU 9 - Zanniat Bible

A Dikcanghnak Manin Pathian Thangphathnak

¹ Aw Bawipa, i thinlung veksen in nangmah na thangphat tuh ing, Ngaihsunurkul na bawnhnak rel tuh ing.

² Nangmah manin ang ngai in la sa tuh ing. Aw Cungnungber, na hnenah thangphathnak la sa tuh ing.

³ Nangmah na lar fangin i ralte tu let i, Sawn ai thi tlang i.

⁴ Nangmah heh a dikcang thukhantu isi, Cen na tohkham vumah to isi; Kaimah ṭan in thukhan isi.

⁵ Pathian ling lo miphunte hnawl ai, Mihrokhrawl pawl heh siatsuah isi. Anite tu aisu inkhai hih tuh nawn lo i.

⁶ Kin tawngtu kin ralte bo zo sek ai kin linghnak i nawn lo i, A khuapuite tu hnawm sek ai, Ling thil leh tuh i nawn lo i.

⁷ Ikhalselai Bawipa tu kumzangza in kumpibawi i. Thu khan tuhin kumpibawi tohkham vumah to i.

⁸ Laivum pumpuhluk tu dikcanghnak thawn uk ai, ṭan bulhnak nai loin mi zongzong vumah thukhan i.

⁹ Naunehhnak a tuartu caah Bawipa tu relhhnak vingpui i. Harsahnak can ah himhnak vingpui i.

¹⁰ Aw Bawipa, na hming na lingtu in na rinsan tuh i, Zaimantifangin na hnen a kawitu heh zangtak awng lo isi.

¹¹ Zion in uktu Bawipa hnenah la sa tu ih. A thil bawnhnak heh mi zongzong hnenah rel tu ih.

¹² Mi rimsute ai tuarhnak tu Pathian in ling i, Amahte aihramhnak tu hai awng lo ai; Ciamanin thisan luangruaitute vumah phuzul i.

¹³ Bawipa, ning i hio tu hram. I huatute ai i hnawmcanhnak heh hmu tu hram law. Aw Bawipa, thihhnak in i o tu hram lai.

¹⁴ Jerusalem khuasong mite hmaiah ding in, Nangmah na thangphathnak thulate heh rel tuh ing. I o manin anghnak thu rel tuh ing.

¹⁵ Pathian ling lo miphunte tu amahte cohnak khur songah tlok i; Thangtoh tlang ai anite awk i.

¹⁶ Bawipa tu a dikcangmi a thukhanhnak in amah veve larruai i. Ikhalselai hrokhrawl mite tu amahte bawnhnak lala in awk dun i.

¹⁷ Mihrokhrawl pawl le Pathian a zangtaktu miphunte ai lampui tawphnak tu thihhnak i.

¹⁸ Ikhalselai mifarahte zamhnak tuar tuh ngio lo ai, Mirimsute ai umlamhnak tu kumzangza in namnuaihnak tuar tuh ngio lo i.

¹⁹ Aw Bawipa, tho tuhang; Minung in nangmah tawngcai in tluangkhawng nawn mahang seh. Miphun hmuahhmuah na hmaiah kokhawm tulai, amahte thukhan tu.

²⁰ Aw Bawipa, amahte thinlauruai tu; Mihing menma i ing ti khiah lingruai tu.