SAAM LABU 89 - Zanniat Bible

Harsa Can Ai La

¹ Aw Bawipa, a kho ngai na ithnak tu la in sa tuh ṭiode ing. Na rintlakhnak heh kumzangza in than tuh ing.

² A kho ngai na ithnak tu catloin kho tuhai, Rintlak na ihnak heh van bangin a zomzet in, kho tuh i ti ling ing.

³ Nangmah in, “I rilhnak pa thawn thukhamhnak bawn zo ing; I cengfa David hnenah thukham zo ing;

⁴ ‘Na tefate in catloin kumpibawi ṭuan tlang tuh i; Na ukhnak tu kumzangza in khoruai tuh ing,’ ti ing,” tiin rel isi.

⁵ Vante in ngaihsunurkul na bawnhnak heh thangphat tlang i; Bawipa, rintlak na ihnak heh, Vancung ai na thianghlim mite in la in sa tlang i.

⁶ Aw Bawipa, vancung ah Nangmah bang um lo i. Na bangtu pathian um lo i.

⁷ Thianghlim mite taikhawmhnak ah nang tu na upat tlang ai, Na hiangai a umtute in na kihzah tlang i.

⁸ Aw Bawipa Pathian, Cungnungber, nangmah bangin a hatmi aisu khai um lo i. Aw Bawipa, zaizongza ah nang tu rinsantlak isi.

⁹ Huham a nai roh tifingriat heh nangmah in uk ai, A hat ngai tilep heh dapruai isi.

¹⁰ Ramsa kihkul Rahab tu seu dek ai rek lio isi; Na ralte tu na hathnak in piakruai sek isi.

¹¹ Laivum heh nangmah ai i; Van khai cia thotho i. Laivum pumpuhluk heh nangmah in semsuah ai A songai umhnak khai bawn isi.

¹² Hlang lam le sak lam khai Nangmah ai semsuahhnak i. Tabor Tlang le Hermon Tlangte tu Lungawi in na hnenah la sa kawm i.

¹³ Huham na naidan heh! Na thazang a hatdan heh!

¹⁴ Na tohkham tu dikcanghnak le dikcanglairelhnak vumah toh isi; A kho ngai ithnak le rintlak na ihnak in zaizongza bawn isi.

¹⁵ La thawn na biatute tu mi lungawi i; Na mithmai pha tleuhnak songah A laileng mite khiah, Bawipa, Mihmuifu i.

¹⁶ Zaimantifangin nangmah manin sunnivui in nunnuam tlang i; Na phathnak manin nangmah heh thang na phat tlang i.

¹⁷ Ral nehhnak lian ngaingai pe isi; Ning kin hio ai nehtu ah kin bawn isi.

¹⁸ Zaimantifangin kin huptu heh, Bawipa nangmah ai na rilhnak i. Nang, Israel mite ai Mi Thianghlim in kumpibawi kin pe isi.

David Hnenah Pathian Ai Thukham

¹⁹ Hlanlaipui ah na larhnak in, Na cengfate hnenah thuphuang ai, “Ralkap hmingthang vumah, Kumpibawi lukhuk dah zo ing; A miphun songin rilmi pa hnenah, Kumpibawi tohkham pe zo ing.

²⁰ I cengfa David tu kaimah in ril zo ai, Ning kumpibawi tuhin thau thianghlim pawh zo ing.

²¹ I hathnak tu a hnenah um tuh ṭio ai, I huham in mihat ngai cangruai tuh i.

²² A ralte in a fimhnak hlaih tuh lo ai, Mihrokhrawl pawl in zaikhai ti ngam tuh lo i.

²³ A ralte tu kaimah in cil tuh dek ai, A huatute tu rek tuh ing.

²⁴ Ani tu a kho ngai ithnak thawn it tuhai, Kaimah in ngaihhar tuh ṭio ing. Ral nehtu ṭio in bawn tuh ing.

²⁵ A ukhnak ram tu Mediterranean Tifingriat in Euphrates Runpui tian kauruai tuh ing.

²⁶ Ani in, “Nang tu i pa le i Pathian isi; I lungpui le i otu isi,’ iti tuh i.

²⁷ Ani tu i fapa upa ber ah bawn tuhai, Kumpibawi lakah kumpibawi lianber ah bawn tuh ing.

²⁸ A hnenah i thukhamhnak khimruai tuhai, Amah thawn thukham i bawnhnak heh’ A kumzangza in kho tuh i.

²⁹ A tefa in kumpibawi ṭuan tuh ṭio ai, A ukhnak tu van bangin kho tuh i.

³⁰ Ikhalselai a tefate in i dan hlun tlang lo ai, Thukham i pehnak bangin nung hlah lekhaw,

³¹ I thupehnakte zaikhai siar tlang lo ai, I thukhamte hlun tlang hlah lekhaw,

³² Amahte sualhnak manin tingpum thawn cawh tuh ing. Amahte mawhhnak manin vit tuh ing.

³³ Ikhalselai David tu it tuh ṭio ai, A hnenah i thukhamhnak khai khimruai tuh ṭio ing.

³⁴ Amah thawn i thukham bal tuh lo ai, A hnenah i tiamciahnak thukham pakhatniu bangkhai bal tuh lo ing.

³⁵ Kumzangza hrang a hnenah i hming thianghlim in thukhamhnak bawn zo ing. David hnenah thudonrel tuh lo ing.

³⁶ Catloin tesinfa nai tuhai, Ni a suak song hmuahhmuah ah A ram ukhnak heh phaniu in sik tuh ing.

³⁷ Van ai a ummi thu lingpuitu Hlapui bangin a zomzet in kho tuh i,” ti awng isi.

David Ralsung Kahla

³⁸ Ikhalselai na rilmi kumpibawi vumah thin na raw i; Ani tu hlum zo isi ai hnawl zo isi.

³⁹ Na cengfa amah thawn thukham na bawnhnak hnawmcan zo sek isi. A kumpibawi lukhuk heh laipua lakah lon sah isi.

⁴⁰ A khuapui kulhhnak vingpui tu bal sah sek ai, A ralvingte heh siatsuah sah sek isi.

⁴¹ Suk le so ai a vaktute in a thilri ru sah ai, A innhnente in hnihsarelhnak in hmang i.

⁴² Ralnehhnak tu a ralte hnenah pe isi, Angruai sio isi.

⁴³ A ralthuamte tu santlai lo cangruai ai, Raltawnghnak ah sungruai isi.

⁴⁴ A kumpibawi faikiang tu sut leh ai, A kumpibawi tohkham heh laipua lakah tul sah isi.

⁴⁵ Tar cu lo napui tarruai ai, Zakthi mualphohnak in dimruai isi.

Luathnak Hrang Sawngen

⁴⁶ Aw Bawipa, kumzangza in relh tuh ngio isim? Zaikom tian na thinrawhnak heh mai bangin ko tuh ngio i?

⁴⁷ Aw Bawipa, minung nunhnak a com zia heh hai malaw; Mi zongzong thi leh tuhin Na bawnhnak khiah hih tu hram law.

⁴⁸ Thi loin a nungmi aisu um i? Sheol hleng loin a luatthaitu aisu um i?

⁴⁹ Aw Bawipa, nang in na kin ithnak a hlanai na larruaihnakte tu akonah um sek i? David hnenai thukham na bawnhnak heh tun akonah um sek i?

⁵⁰ Kaimah na cengfa zohsuam i tuardan heh hai hram malaw. Lawki mite ai nautathnak i tuardan khiah!

⁵¹ Aw Bawipa, na ralte in na ril sa Kumpibawi heh zohsuam tlang bang hlaihlawr ze hang! A feh hmuncang ah zohsuam tlang i.

⁵² Bawipa tu kumzangza in thangphat tuh ising! Amen, Amen!