SAAM LABU 86 - Zanniat Bible

Bawmhnak Hrang Sawngen

¹ Aw Bawipa, kaimah lam hoi tulai i sawn tu, Zaimantifangin mi thanau le bawmtu nai lo ing.

² Thihhnak in i hup tu, Zaimantifangin nangmah na ringtu ing. Nun i o tu law, zaimantifangin na cengfa ing, Nangmah na rinsantu ing.

³ Aw Bawipa, nang tu i Pathian na imanin i vumah ninghiohnak nai tu hram law. Sunnivui na hnenah sawngen ing.

⁴ Aw Bawipa, na cengfa heh a nun nuamruai tu, Zaimantifangin i sawngenhnak na hnenah hleng i.

⁵ Aw Bawipa, nang tu na pha ai mi ngaithiam isi; Na hnenah saw a ngentute ca ahcen A kho ngai ithnak in na dim i.

⁶ Aw Bawipa, i sawngenhnak ngai tu; Ninghio ngen ai i auhnak ngai tu hram law.

⁷ Harsahnak i tawk fangin nangmah na ko ing; Zaimantifangin i auhnak za de isi.

⁸ Aw Bawipa, nangmah na bangtu pathian dang um lo i. Na bawn benhnak a bawn bentu aisu khai um lo i.

⁹ Na semsuahmi miphunte hmuahhmuah in na hnenah kawi tlang tuhai amahte lu ut tlang tuh i. Na hming thangphat tlang tuh i.

¹⁰ Zaimantifangin Pathian nangmah ian a hatmi isi, Nangmah ian mangbangkul a bawntu isi.

¹¹ Aw Bawipa, bawn tuh na daihhnak heh i zirh tulai, Rintlak ngai in na thu hlun tuh ing. Thin runruh in na naruaihtu cang tuhin nangmah in i zirh tu law.

¹² Bawipa i Pathian, i thinlung veksen in thang na phat tuh ing. Na thawmlian zia heh kumzangza in tlangaupui tuh ing.

¹³ A kho ngai na ithnak kaimah caah a liandan heh! A thukmi Sheol in i o ciazo isi.

¹⁴ Aw Pathian, mihngalte i ral tuhin kawi tlang i; Mi ninghio nai lote in i rek tum tlang i. Nangmah zai a siar lote tu!

¹⁵ Aw Bawipa, nang tu mi ninghiotu le mi ittu Pathian isi; Mi thinsau isi ai thinpemhnak nai ṭiode isi; Rintlak Pathian isi.

¹⁶ Kaimah lam hoi leh tulai ning i hio tu hram law; Tha i hatruai tulai i o tu hram law. Zaimantifangin i tetu i nu in na ruaih bangin, Nangmah na ruaih ing.

¹⁷ Aw Bawipa, na phadan heh larruai tu hram law; Na pehnak hnemhnak le bawmhnak a hmu tlang fangin i huatute tu zakthi tlang tuh i.