SAAM LABU 74 - Zanniat Bible

Luathnak Hrang Sawngen

¹ Aw Pathian, zaimanin kin zam isi? Na tuute kin vumah kumzangza in thin na raw tuh im?

² Nangmah ai tuhin hlanlaipui in na rilciahnak, Na minungte tu hai malaw. Nangmah ai ro na miphun cang tuhin na tlan mite cenin! Na umhnak Zion Mual heh hih tu ṭiode law.

³ Kawi tulai he hnawmcanhnak vumah vak tucuk! Kin ralte in Biakinn song thilri hnawmcan zo sek i.

⁴ Na minungte na tawk dehnak na Biakinn ah, Na ralte tu au tlang dekdo i, Ciata ah nehhnak thantar tar tlang i.

⁵ Anite tu thing vawngtute bang i, Haihpui in thing vawngtute bangin.

⁶ Amahte haihpui le vang in Thing ai bawnhnak, dawngkham le A dangdang a mawiruaihnak tepawl heh, Cek tlang ai khoi sek i.

⁷ Na Biakinnpui heh bal ai mai in tai tlang i; Nangmah kin biahnak hmun cianghlim ningrimtiar tlang i. Zaizongza hnawmcan sek i.

⁸ Kin cihmit tuh sio tum tlang i. Kin ram songai hmun thiang hmuahhmuah heh, mai in tai sek i.

⁹ Hnikhnaihhnak cianghlim kin naihnak tu a bo ihang; Prophet pakhat khai um thil nawn lo i; Hemi bangin zaikom tian cang tuh i ti cenin, Aisu inkhai ling lohnak i.

¹⁰ Aw Pathian, zaikom tian kin ral in, Hnihsarelhnak in kin hmang tuh i? Na hming tu kumzangza in maw relsia tlang tuh i?

¹¹ Zaimanin kin bawm na nuam lo i? Zaiman in na kut khel lamah sih isi?

¹² Ikhalselai Bawipa, a hampan in nang tu, Kin kumpibawi isi; laivum ah ohnak a hlengruaitu khiah nangmah isi.

¹³ Na hathnak in tifingriat heh khan isi; Tifingriat ai rulhreng lian ngaingai lute khai nangmah in sep ai khoi sek i.

¹⁴ Leviathan tihnak rulhrengte ai lu heh a vut in rial ai, A sa heh nelrawn ramsate aih tuhin pe isi.

¹⁵ Nangmah in cirhti le tihnarte luangruai ai, Runpui ti khai carruai isi.

¹⁶ Nangmah in sun le zan bawn isi, Ni le hlapui khai amahte umhnak ṭen ah dah isi.

¹⁷ Nangmah in laivum ai ramri heh bawn ai, khal can le khuasik can khai bawn isi.

¹⁸ Ikhalselai aw Bawipa, na ralte in, Hnihsarelhnak ah na hmang khiah hai malaw. Pathian ling lote in na hming zohsuam tlang i.

¹⁹ Zaikhai ling thil lo na minungte tu, Ninghiohnak nai lo a ralte kut songah hnawl hram malaw.

²⁰ Kinmah thawn thukham na bawnhnak khiah hih tu ngio law; Hemi ram khuathimhnak hmuncang ah, mi hnawmcanhnak um i.

²¹ Zohsuam le cawh tuar mite tu, Zakthi in umruai malaw. Ikhalselai farah le tlasamte in, Thang na phat tlang tuseh.

²² Aw Pathian, tho tulai na thula heh dinpui tu; Pathian ling lotute in sunnivui hnihsarelhnak in na hmang tlang khiah hih tuṭio law.

²³ Na ralte thinraw in auhnak le, Ral na caitute catloin thawmvang nai tlang khiah hai malaw.