SAAM LABU 72 - Zanniat Bible

Kumpibawi Ca Sawngen

¹ Aw Pathian, dikcanglairelhnak thawn thukhantu a canghnak tuhin nangmah in kumpibawi heh zirh tu. Na nunfelhnak coruai tu ve lai,

² Ciatihin na minungte fel ngai in thukhan sah thil tuhai cawh a tuar mite nunfelhnak thawn uk thil tuh i.

³ Hemi ram an nunnuamhnak co tu selai nunfelhnak a songah leng tuseh.

⁴ Kumpibawi in mifarahte ai thu heh dik ngai in rel tuseh. Mitlasamte bawm tu selai, Mi zohsuamtute foncih tuseh.

⁵ Na minungte in ni a tlang song hmuahhmuah le, Hlapui a tleu song hmuahhmuah, san tong tian, Nangmah na bia tlang tu ngio seh.

⁶ Kumpibawi tu hampa vumah ruahsihnak bang itu selai, Lairam vumah ruahsihnak bang cang tu hram seh.

⁷ A nun song hmuahhmuah ah nunfelhnak karhzai tu selai, Hlapui a um song hmuahhmuah ah daphnak um tu ṭio seh.

⁸ A ram ukhnak tu tifingriat in tifingriat tian; Euphrates Runpui in laivum a tawphnak tian kau tuh i.

⁹ Nelrawn ai minungte a hmaiah ut tlang tuhai, A ralte tu laivut lakah bok tlang tuh i.

¹⁰ Spain ram kumpibawite le tikulh kumpibawite in lehsawng pe tlang tuh i. Arabia le Ethiopia kumpibawite inkhai siahkhuai pe tlang tuh i.

¹¹ Kumpibawi hmuahhmuah in upathnak thawn, A hmaiah ut tlang tuhai Miphun hmuahhmuah in na ruaih tlang tuh i.

¹² Amah a kotu mifarahte tu osuak i; Mitlasam le hnuaphnal mite khai hup i.

¹³ Mi thanau le mifarahte vumah ninghiohnak nai ai, Amahte nunhnak luangtlan i.

¹⁴ Zohsuamhnak le thisan luanghnak songin hup i; Anite nunhnak tu amah caah a songlawi i.

¹⁵ Kumpibawi tu a nun sau tuseh. Arabia ramai sui a hnenah pe tlang tuseh. Catloin amah caah sawngethnak um tu ṭio seh. Pathian hmuifu a vumah um tu ṭio seh.

¹⁶ Hemi ram songah rong tampui um tuseh; Tlangte heh lo rong in dim tuseh, Lebanon ai thingthai bangin a thai tam tu ngai seh. Khuapuite minung in dim tu selai, Hampalak ai hampa zah cang tuseh.

¹⁷ A hming tu zaikom inkhai hai tlang maseh. Ni a tlang song hmuahhmuah a hmingthang tuseh. Miphun hmuahhmuah in ani tu thangphat tlang tuseh. Kumpibawi tu hmuifu pe ai, Ciabangtluk in hmuifu co tuh ve in Midang in Pathian hnenah ngen tlang tu ve seh.

¹⁸ Bawipa thangphat tu ih; Israel ai Pathian cenin! Amah ian in hebang ngaihsunurkul bawn i.

¹⁹ A hming songlawi kumzangza in thangphat tu ih; A songlawihnak laivum pumpuhluk ah dim tuseh. Amen, Amen.

²⁰ Jesse fapa David ai sawngen a tawphnak i.