SAAM LABU 71 - Zanniat Bible

Hlombawr Sawngen

¹ Aw Bawipa, nang tu i buan hmun isi; Zaikom inkhai zakthi in i umruai malaw.

² Na dikcang manin i bawm tulai i hup tu hram law. Na bil in i ngai tulai i o tu.

³ I buan hmun lungpui cang tulai, I huptu vingkulh pha bik cang tu hram law; Nang tu i lungpui le i vingkulh isi.

⁴ Aw i Pathian, hrokhrawl mite kut songin i hup tu; Ninghiohnak nai lo le misiavate kut songin!

⁵ Aw Bawipa, i umlamhnak cenin nangmah ah um i; Aw Bawipa, i sen lai in nangmah na rinsan zo ing.

⁶ I nunsong hmuahhmuah nangmah na rinsan ing; I te sawngpah in nangmah in i hup isi; Thang na phat tuh ṭio ing.

⁷ Mi tampui caah i nunhnak heh ralringhnak petu i; Ikhalselai nang tu a kho ngai i vingpui isi.

⁸ Sunnivui nangmah thang na phat tuhai, Na songlawihnak than tuh ing.

⁹ A hlombawr i tiin i hnawl hram mah; A santlai lo i tiin i zam hram mah.

¹⁰ I ralte in a rek i nuam tlang i; Relkhawm tlang ai i engsan i.

¹¹ Anite in, “Pathian in zam zo i. Hnawh ngasing khaw pom ngasing; A huptu tuh aisu khai um lo i,” ti tlang i.

¹² Aw Pathian, lam hlapui ah i umsan malaw; Aw i Pathian, rang ngai in tunah i bawm tu law.

¹³ I tawngtute tu zakthi in um tlang tu selai siatsuahhnak tuar tlang tuseh. I tuahmawh tumtute tu zakthi le mualpho in um tlang tuseh.

¹⁴ I umlamhnak cenin na hnenah dah tuh ṭio ing. Nang tu thang na phat tuh amam ing.

¹⁵ Na dikcanghnak rel tuh ing, Na ohnak sunnivui in rel tuh ing; I ling cawk lo inapui ai!

¹⁶ Aw Cungnungber Bawipa, Na hathnak thangphat tuh ing. Na dikcanghnak, nangmah ai dikcanghnak ian aupui tuh ing.

¹⁷ Aw Pathian, i naupang lai in nangmah in i zirh zo isi; Tun tian na thil bawnhnak ngaihsunurkul rel ṭio ing.

¹⁸ Aw Pathian, tar zo ai puak par zo i, tiin i zam malaw. A hleng tuhhnak santhar hnenah na huham le, Na hathnak i aupui fangin i hnenah um tu hram law.

¹⁹ Aw Pathian, na dikcanghnak in van tong i; Thil thupui ngaingai bawn zo isi; Nangmah bangtu aisu khai um lo i.

²⁰ Harsahnak le rimsuhnak i vumah hlengruai isi; Ikhalselai i thazang cen in nangmah in khimruai leh tuhai, Hlanmual in i o tuh i.

²¹ A hlan tahin i cawisang tuh i. Nangmah in i hnem leh tuh isi.

²² I congcing thawn thang na phat tuh hrimhrim ing; Aw i Pathian, na rintlakhnak heh thangphat tuh ing; I lemlawi tum kongin na hnenah la sa tuh ing; Aw nang, Israel mite ai Mi Thianghlim.

²³ Nangmah ca awmawi i tum kongin lungawi in au tuh ing; I o zo manin i nunhnak veksen in la sa tuh ing.

²⁴ I siatsuah a tumtute, zakthi le mualpho in um tlang zo manin, Sunnivui in na dikcanghnak thu rel tuh ing.